Tornike Sharashenidze (IPN)

ხელისუფლების მიმართ იმედგაცრუება, ოპოზიციური პარტიების მიმართ უიმედობა და ზოგადად ვითარებაში გაურკვევლობა  – ასეთია NDI-ის მიერ საქართველოში ჩატარებული სოციოლოგიური კვლევის  პოლიტიკური ნაწილის შედეგი, რომელიც ოფიციალურად ოთხშაბათს გამოქვეყნდა.

იმ ფონზე, რომ ქვეყანაში ეკონომიკური მდგომარეობა სულ უფრო უარესდება და ეს კარგად ჩანს ეროვნული ვალუტის კურსზეც, რომელიც  ყოველდღიურად უფასურდება და  ხელისუფლებას ფაქტობრივად არც ერთი წინასაარჩევნო დაპირება არ შეუსრულებია,  მოსახლეობის ასეთი გამწყობა  გასაკვირი  ან დაუჯერებელი არ უნდა იყოს. თუმცა, ხელისუფლებას პრობლემების აღიარება არ სურს და ამბობენ, რომ მათ ამ კვლევების შედეგების არ სჯერათ.

კვლევის შედეგების თანახმად ყველაზე წარუმატებელ მინისტრად დასახელებული ნოდარ ხადური NDI-ის კვლევას არ ენდობა. მის მუშაობას დადებითად მხოლოდ  გამოკითხულთა 6% აფასებს. ყველაზე მეტად მოსახლეობას ჯანდაცვის მინისტრი მოსწონს.

გამოკითხულთა  52%-ს არც პარლამენტის საქმინობა მოსწონს. საკანონმდებლო ორგანოს მოწონების 10 %-ით რეიტინგში ერთ–ერთი ბოლო ადგილი უკავია.

მოწონების რეიტინგში,  პოზიციები წინა კვლევებთან შედარებით, 14 ერთეულით დათმო პრემიერ–მინისტრმა. ირაკლი ღარიბაშვილი 54-ის ნაცვლად ახლა 40%–ს მოსწონს. პერსონალური მოწონების ყველაზე მაღალი მაჩვენებელი პატრიარქს აქვს. მეორე ადგილზეა პრეზიდენტი გიორგი მარგველაშვილ  52%-ით.

შემდე ხმები ასე ნაწილდება: ირაკლი ალასანია – 51%, დავით უსუფაშვილი – 45%, დავით ბაქრაძე –  44%.

გამოკითხულთა 26 %-ს ნინო ბურჯანაძე მოსწონს, თუმცა დემოკრატიული მოძრაობის ლიდერი, ლიდერია კვლევაში დასახელებულ იმ პოლიტიკოსებში, ვინც გამოკითხულებს ყველაზე მეტად არ მოსწონთ. ეს მონაცემი კი იმით არის მნიშვნელოვანი, რომ ბურჯანაძე ყველაზე აქტიური პრორუსი პოლიტიკოსია.

უპრეცედენტოა პარტიების რეიტინგებიც.

კითხვაზე, ხვალ რომ საპარლამენტო არჩევნები იმართებოდეს , რომელ პარტიას მისცემდით ხმას, კატეგორია “არ ვიცი” აირჩია გამოკითხულთა 27%-მა, ამის შემდეგ მოდის კოალიცია “ქართული ოცნება 24%-ით, “ერთიანი ნაციონალური მოძრაობა” – 16%.

კითხვაზე პასუხზე უარი განაცხადა 12%-მა, არც ერთ პარტიას არ მისცემდა ხმას 6%, რესპონდენტთა 5% მხარს დაუჭერდა “თავისუფალ დემოკრატებს”, 4% – “პატრიორტთა ალიანსს”, 3% – კი “ლეიბორისტულ პარტიას”. რაც შეეხება დანარჩენ 3%-ს – ის მოდის კატეგორიაზე “სხვა”.

ასევე მნიშვნელოვანია ის, რომ  გამოკითხულთა 44%  დღეისთვის არჩევნებში მონაწილეობას არ მიიღებდა.

კვლევის მიხედვით, გამოკითხულთა უმეტესობის აზრით, მათ შეხედულებებთან ახლოს არც ერთი პარტია არ დგას.

ეს მონაცემები ძალიან ახლოსაა ცოტა ხნის წინ  IRI-ის  მიერ გამოქვეყნებულ მონაცემებთანაც, სადაც დაახლოებით იგივე სურათი შეიქმნა არსებულ ვითარებასთან დაკავშირებით. თუმცა, იმ კვლევაში, რომელიც მარტის ბოლოს გამოქვეყნდა, მმართველ პარტიას გაცილებით მაღალი რეიტინგი ჰქონდა.  IRI-ის  კვლევის მონაცემებით, მმართველ პარტიას 36% უჭრდა მხარს, მეორე ადგილზე მყოფ პარტიას „ნაციონალურ მოძრაობას“ კი – 14%. ახლა კი ეს მაჩვენებლები  კიდევ შეცვლილია.  „ქართულ ოცნებას“ 24% უჭრს მხარს, „ნაციონალურ მოძრაობას“  კი – 16%.

ხელისუფლების ოპონენტებიც და  პოლიტიკურ და ეკონომიკურ საკითხთა სპეციალისტებიც ამბობენ, რომ ეს კვლევა ცალსახად მიუთითებს ხელისუფლების ნდობის დაკარგვაზე, რაც, მათივე შეფასებით, „არსებული მგომარეობის ადეკვატურია“.

“ქართული ოცნების” პოპულარობა ეცემა და თუ ხელისუფლება ამას ვერ ხვდება, მაშინ უფრო მძიმედ ყოფილა საქმე,“ – ამბობს „დფვოჩთან“  GIPA-ს (საზოგადოებრივ საქმეთა ინსტიტუტი)  პროფესორი,  საერთაშორისო ურთიერთობებისა და პოლიტიკურ მეცნიერებათა დოქტორი, თორნიკე შარაშენიძე.

ის ასევე აქცენტს აკეთებს იმ მაღალ მაჩვენებლზე, რომელიც  ამბობს, რომ არ იცის, ვის მისცემს ხმას და ამის მაჩვენებელი კვლევაში გამოკითხულთა 45%-მდეა. მისი თქმით, „ეს კატეგორია, დიდი ალბათობით, „ქართლი ოცნების“ ყოფილი მხარდამჭერები არიან და მათი ეს პოზიცია იმედგაცრუებამ გამოიწივია“.

„ამ სიტუაციაში, ალბათ, უფრო და უფრო ქვემოთ წავა “ოცნების” რეიტინგი. ჯერჯერობით, ალბათ, არ მოიმატებს არც ერთი სხვა პარტიის პოპულარობაც, მათ შორის არც “ნაციონალური მოძრაობის”, მაგრამ თუ რაღაც ისეთი ან შეიძლება ნაკლებად ძლიერი სკანდალი მოხდება, როგორიც ე.წ. ცოცხების სკანდალი იყო, არ არის გამორიცხული, რომ სიტუაცია რადიკალურად შეიცვალოს და გადაუწყვეტელთა მასა აღმოჩნდეს ოპოზიციის რიგებში  –  რომელი ოპოზიციის, ამას დრო გვიჩვენებს”, – განაცხადა თორნიკე შარაშენიძემ.

მისივე აზრით, შექმნილ სიტუაციაში ხელისუფლებამ NDI-ის რეიტინგებს არა თუ უნდობლობა უნდა გამოუცხადოს, არამედ ის მიიღოს, როგორც დამაფიქრებელი მესიჯი.

თუმცა, ხელისუფლებაში  ამბობენ, რომ ისინი ამ კვლევებს არ ენდობიან.

NDI-ის კვლევის საველე სამუშაოები 27 მარტი – 19 აპრილის პერიოდში, საქართველოს მასშტაბით 4360 პირისპირ ინტერვიუს წარმომადგელობითი შერჩევის საფუძველზე ჩატარდა.

NDI-ის კვლევებს აფინანსებს შვედეთის საერთაშორისო განვითარების და თანამშრომლობის სააგენტო (Sida) და ატარებს CRRC-საქართველო.

The post NDI: ხელისუფლების რეიტინგი განახევრებულია appeared first on Democracy & Freedom Watch.

(Interpressnews)

ევროპის რეკონსტრუქციისა და განვითარების ბანკმა (EBRD) მიმდინარე წელს საქართველოს ეკონომიკური ზრდის პროგნოზი შეამცირა.

როგორც EBRD-ის მიერ გამოქვეყნებულ “რეგიონული ეკონომიკური პერსპექტივების” ანგარიშშია აღნიშნული, 2015 წელს საქართველოში რეალური მშპ-ს ზრდა სავარაუდოდ, 2,3 პროცენტამდე შემცირდება, 2016 წელს კი – 2,6 პროცენტამდე.

EBRD-ის იანვარში გაკეთებული პროგნოზის თანახმად, საქართველოს რეალური მშპ-ს ზრდის პროგნოზი 4,2% იყო.

“ევროზონაში მონეტარული შეზღუდვების შემსუბუქების წყალობით, ცენტრალურ და სამხრეთ-აღმოსავლეთ ევროპაში ეკონომიკური პერსპექტივები უფრო ოპტიმისტური ხდება, თუმცა რეგიონის აღმოსავლეთით განვითარება უარესდება რუსეთის გაზრდილი რეცესიის გამო”, – ნათქვამია ანგარიშში.

ეს კი იმ დროს, როდესაც საქართველოში EBRD-ის ყოველწლიური შეხვედრა იმართება, სადაც 60-ზე მეტი ქვეყნის 1500-ზე მეტი წარმომადგენელი მონაწილეობს და საქართველოს ხელისუფლება საუბრობს იმაზე, რომ ქვეყანაში ეკონომიკა ვითარდება.

სწორედ ამ შინაარსის განცხადებები გააკეთეს ხუთშაბათს EBRD-ის 24-ე შეხვედრის ოფიციალური გახსნისას.

ბოლო თვეების განმავლობაში, რაც  ეროვნულმა ვალუტამ დაცემა დაიწყო და ბოლო დღეების განმავლობაში კურსის ვარდნამ რეკორდულ მაჩვენებელს მიაღწია (1 აშშ დოლარი უკვე 2.41 ლარზე მეტია. 2014 წლის ნოემბერში კი, როდესაც ლარის კურსმა დაცემა დაიწყო, 1 აშშ დოლარი 1,75 ლარი ღირდა, მანამდე კი წლების განავლობაში 1 აშშ დოლარი 1,65 ლარის ფარგლებში მერყეობდა), ხელისუფლებას ოპონენტები და ეკონომიკური და ფინანსური საკითხების სპეციალისტები ხელისუფლებას მუდმივად ქმედითი ნაბიჯების გადადგმისკენ მოუწოდებენ. ხელისუფლება ამ კრიტიკას არ  იღებს და არც ფინანსურ და ეკონომიკურ პორბლემებს აღიარებს.

ერთ-ერთი რეკომენდაცია და ამ ბოლო თვეების განმავლობაში ბიუჯეტის ხარჯვითი ნაწილის  შემცირება იყო.  წლის დასაწყისში,  როდესაც ლარის კურსი სწრაფი ტემპით ეცემოდა და „ეროვნულნა ბანკმა“ გააკეთა განცხადება, რომ საჭირო იყო ბიუჯეტის ხარჯვითი ნაწილის შემცირება, აღმასრულებელი ხელისუფლების მხრიდან გაკეთდა განცხადება, რომ ბიუჯეტის, რომელიც 8 მილიარდი ლარია, დაახლოებით 3,5 მილიარდი აშშ დოლარი დღევანდელი კურსით, კორექტირება მოხდებოდა. მაგრამ ეს დაპირება არ შესრულდა და  ისიც ითქვა მთავრობის მხრიდან, რომ ამის საჭიროება არ იყო მიუხედავად იმისა, რომ  დამტკიცებული ბიუჯეტში ინფლაციის და ეკონომიკური ზრდის საპროგნოზო მაჩვენებლები შეიცვალა.

EBRD-ის მიერ  ანგარიშის გამოქვეყნბების შემდეგ კი ეკონომიკის მინისტრმა გიორგი კვირიკაშვილმა ხუთშაბათს ჟურნალისტებთან თქვა, რომ „მეორე კვარტლის ბოლოს, ეკონომიკური ზრდის პროგნოზის დაზუსტებული მაჩვენებლიდან გამომდინარე, ბიუჯეტის კორექტირება მოხდება“.

“მეორე კვარტლის ბოლოს მთავრობა გამოაცხადებს საკუთარ მოლოდინებს. ეს არის, რა თქმა უნდა, მოკლევადიანი ეფექტი, რომელიც დღეს ჩვენ გვაქვს ქვეყანაში. თუმცა აბსოლუტურად ყველა ინვესტორი თანხმდება ერთ რამეზე, რომ საშუალო და გრძელვადიან პერსპექტივაში საქართველო ერთ-ერთი ყველაზე საინტერესო ქვეყანა იქნება რეგიონში და არა მარტო რეგიონში, ევრაზიის კონტინენტზე, გამომდინარე იქიდან, რომ ჩვენ ვართ დამაკავშირებელი აღმოსავლეთსა და დასავლეთს შორის,” – აღნიშნა გიორგი კვირიკაშვილმა.

თუმცა, მას არ დაუკონკრეტებია, კორექტირება ბიუჯეტის რომელ მუხლებს შეეხება და არც ის უთქვამს, ეს პროექტის სახით როდის იქნება მზად.

The post EBRD-მა მიმდინარე წელს საქართველოს ეკონომიკური ზრდის პროგნოზი შეამცირა appeared first on Democracy & Freedom Watch.

Anatoly Khrulyov (Rossiya 1)

რუსეთის არმიის გადამდგარი გენერალი, ანატოლი ხრულიოვი, რომელიც 2008 წლის  აგვისტოს ომში საქართველოს წინააღმდეგ იბრძოდა და მძიმედ დაიჭრა კიდეც, ოკუპირებული აფხაზეთის  შეიარაღებული ძალების გენშტაბის უფროსად დაინიშნა.

“ანატოლი ხრულიოვმა აფხაზეთის პრეზიდენტის მიერ დასახული ამოცანების  შესრულების მზადყოფნა გამოთქვა,” – ნათქვამია რაულ ხაჯიმბას პრესსამსახურის მიერ ორშაბათს გავრცელებულ განცხადებაში.

საერთოდ, ამ თანამდებობაზე გადამდგარი რუსი გენერლების დანიშვნა აფხაზეთში უკვე ტრადიციად არის ქცეული. აფხაზეთის შეიარაღებული ძალების გენერალური შტაბის უფროსად  ხრულიოვმა კიდევ ერთი გადამდგარი რუსი სამხედრო, გენერალ-მაიორი ვლადიმირ ვასილჩენკო შეცვალა (ხრულიოვს უფრო მაღალი წიდება აქვს – ის გენერალ-ლეიტენანტია). მანამდე კი, 2003-2010 წლებში ამ პოსტს გენერალ-პოლკოვნიკი ანატოლი ზაიცევი იკავებდა.

შეგახსენებთ, რომ 2014 წლის ნოემბერში მოსკოვმა და სოხუმმა „მოკავშირეობის და სტრატეგიული პარტნიორობის“ შესახებ ხელშეკრულებას მოაწერეს ხელი, რომელიც რუსეთის ფედერაციაში აფხაზეთის შემდგომ ინტეგრაციას ისახავს მიზნად. სხვა საკითხებთან ერთად ხელშეკრულება ასევე ითვალისწინებს კოლექტიურ თავდაცვას და შეიარაღებული  ძალების გაერთიანებული დაჯგუფების შექმნას.

ანატოლი ხრულიოვი 2008 წლის ომის დროს რუსეთის სამხრეთ სამხედრო ოლქის 58–ე არმიის მეთაური იყო და 9 აგვისტოს მძიმედ დაიჭრა, როდესაც რუსეთის სამხედრო კოლონას, რომელსაც ის ახლდა, ქართულმა ძალებმა სეპარატისტულ სამხრეთ ოსეთში ცეცხლი გაუხსნეს.

აღსანიშნნავია, რომ ამ დანიშვნამდე რამდენიმე დღით ადრე, 15 მაისს, “პრეზიდენტი” რაულ ხაჯიმბა სოჭში რუსეთის პრეზიდენტს, ვლადიმირ პუტინს შეხვდა.

The post 2008 წლის ომში დაჭრილი რუსი გენერალი აფხაზეთის გენშტაბის უფროსად დანიშნეს appeared first on Democracy & Freedom Watch.

საქართველოს ეროვნული ბანკის მონაცემებით,  ერთი დოლარის ოფიციალური ღირებულება 2.3234  ლარი გახდა.  ქვეყანაში არსებული მცურავი  კურსის გამო კომერციულ ბანკებსა და ვალუტის გადამცვლელ პუნქტებში  კურსი შედარებით მაღალია. თუმცა, ოფიციალურ კურსად ეროვნული ბანკის მიერ განსაზღვრული კურსი ითვლება, რომელსაც  ყოველი სამუშაო დღის ბოლოს ბანკთაშორისი ვაჭრობის საფუძველზე ადგენს.

ლარის კურსი ვარდნა განსაკუთრებით 2014 წლის ნოემბრის ბოლოდან გახდა შესამჩნევი.  მაშინ 1 აშშ დოლარი 1,75  ლარის ფარგლებში იყო.  მანამდე კი წლების განმავლობაში 1 აშშ დოალრი 1,65 ლარის ნიშნულზე მერყეობდა. ნოემბრის შემდეგ ლარი სულ უფასურდებოდა.  წლის დასაწყისში ცოტა ხნით ამ პროცესის შეჩერება მოხერხდა, მაგრამ კურსი არ დაწეულა. დაახლოებით ერთი თვის წინ კი გაუფასურების ახალი ტალღა დაიწყო და ბოლო დღეებში ლარის ვარდნის რეკორდული მაჩვენებელი დაფიქსირდა –  1 აშშ დოლარი  2,4-ზე მეტი იყო.

ორშაბათიდან კი ლარმა გამყარება დაიწყო.  მხოლოდ ერთ დღეში ლარი 1 პუნქით გამყარდა.  ხუთშაბათიდან 1 აშშ დოლარის შეძენა 2.3234 ლარად არის შესაძლებელი, ოთხშაბათს, „ეროვნული ბანკის“ მონაცემებით, 1 აშშ დოალრი  2.3378 ლარი ღირდა, პარასკევს კი კურსი იქნება 2.2545 ლარი 1 აშშ დოლარზე.

ლარი გამყარდა ევროსთან მიმართებაშიც და პარასკევს 1 ევროს კურსი იქნება 2.5151, ხუთშაბათს კი იყო 2.5794.

აქამდე ხელისუფლებას  ფინანსისტთა დიდი ნაწილი და ოპონენტები იმას საყვედურობდნენ, რომ  ეროვნული ვალუტის გამყარებისთვის საჭირო ზომების მიღება არ ხდებოდა. თუმცა, თავად ხელისუფლება ბოლო დრომდე  ლარის გაუფასურებას პრობლემად არ აღიარებდა  და ამ ყველაფერს  გარე ფაქტორებს აბრალებდა.

ოთხშაბათს პარლამენტის საფინანსო-საბიუჯეტო კომიტეტის თავმჯდომარეს, რომელიც ბოლო პერიოდში ხშირად აკეთებდა განცხადებას, რომ ლარის კურსის ვარდნა პრობლემატური იყო და პარლამენტს ეს საკითხი უნდა შეესწავლა, რაც  მმართველი გუნდის მოსაზრებას ეწინააღმდეგებოდა,  ფინანსთა და ინფრასტრუქტურისა და რეგიონული განვითარების მინისტრები, ასევე  „ეროვნული ბანკის“ პრეზიდენტი და ბიზნესომბუდსმენი შეხვდნენ.

შეხვედრა არაოფიციალური იყო, არც დაანონსებული ყოფილა და პარლამენტში გვიან  საღამოს გაიმართა.

შეხვედრის შემდეგ ფინანსთა მინისტრმა ჟურნალისტებთან თქვა, რომ შეხვედრაზე სწორედ გაცვლით კურსთან დაკავშირებულ საკითხებზე ისაუბრეს.

„იმედი მაქვს, რომ ლარის გაცვლითი კურსის გამყარება გაგრძელდება და ქვეყანაში მიმდინარე პროცესები ამას ხელს შეუწყობს,“ –  თქვა ნოდარ ხადურმა.

ამასთან, მან აქცენტი იმაზე გააკეთა, რომ, „როგორც აქამდე არ ყოფილა ბიუჯეტის ხარჯვითი ნაწილის ზეგავლენა გაცვლით კურსზე, ბიუჯეტი არც მომავალში არ მოახდენს ხარჯვითი ნაწილის მეშვეობით გაცვლით კურსზე ზეგავლენას”.

ბიუჯეტის კორექტირების საკითხი ბოლო თვეების განმავლობაში აქტუალურია. ფინასისტთა დიდი ნაწილი და ოპონენტები ხელისუფლებას მუდმივად ურჩევდნენ, რომ ბიუჯეტის  კორექტირება გაეკეთებინა, რადგან დამტკიცებული ბიუჯეტი სხვა ეკონომიკურ პარამეტრებზე იყო დაგეგმილი, კერძოდ ეკონომიკური ზრდის 5%-იან ზრდასა და ინფლაციის გაცილებით დაბალ მაჩვენებელზე. ახლა კი რეალურად  ეკონომიკური ზრდა განახევრებულია და ინფლაციის მაჩვენებელი, მინიმუმ, გაორმაგებული.  ეკონომიკური ზრდის და ინფლაციის მაჩვენებლებზე საპროგნოზო მონაცმები EBRD-მა (ევროპის რეკონსტრუქციისა და განვითარების ბანკი) და სავალუტი ფონდმა რამდენიმე დღის წინ გამოაქვეყნეს.

სავალუტო ფონდი საქართველოში ეკონომიკური ზრდის მაჩვენებელს წელს 2, მომავალ წელს კი 3 პროცენტს პროგნოზირებს. ინფლაციის მაქსიმუმ 5 პროცენტით ზრდაა ნავარაუდევი. წელს კი ის 3%-ს შეადგენს.

ასეთივე საპროგნოზო მაჩვენებლები აქვს  EBRD-საც.

ამ მონაცემების გამოქვეყნების შემდეგ ითქვა, რომ  მოხდება ბიუჯეტის კორექტირება  დაახლოებით 600-700 მილიონო ლარით (დაახლოებით 250-290 მილიონი აშშ დოლარი), რაც 8-მილიარდიანი ბიუჯეტის დაახლოებით 8%-ია.

თუმცა, ფინანსთა მინისტრი უკვე ამბობს, რომ ბიუჯეტის კორექტირება არ მოხდება.

ეროვნული ბანკის პრეზიდენტის თქმით კი, რომ  „საშუალოვადიან პერიოდში ლარის კურსის მეტი გაუფასურება მოსალოდნელი არ არის“.

როგორც ქადაგიძე განმარტავს, ლარის კურსის გამყარება რამდენიმე ფაქტორს უკავშირდება. მისი თქმით, ყველაზე მნიშვნელოვანი ფაქტორი არის ის, რომ არსებული გაუფასურება გავლენას ახდენს საგადამხდელო ბალანსზე. შესაბამისად, ხდება იმპორტის კორექტირება და ზეწოლა ვალუტის კურსზე მოხსნილია.

ამასთან, ქადაგიძის თქმით, დამატებითი ფაქტორია ტურისტული სეზონი და სხვა ეკონომიკური მოვლენები.

The post ინტენსიური გაუფასურების შემდეგ საქართველოს ეროვნულმა ვალუტამ გამყარება დაიწყო appeared first on Democracy & Freedom Watch.

პავლე კუბლაშვილი. (Interpressnews.)

“ნაციონალური მოძრაობა“ პარტიის აღმასრულებელმა მდივანმა და მასთან ერთად კიდევ სამმა აქტიურმა წევრმა დატოვა.

ამის შესახებ ინფორმაცია ჯერჯერობით ოფიციალურად არ გაკეთებულა. თუმცა, „ნაციონალური მოძრაობის“ წევრები  პირად საუბრებში ამ ინფორმაციას ადასტურებენ. მიზეზებზე კი არ საუბრობენ და ამბობენ, რომ შეფასებები მას შემდეგ გაკეთდება, რაც თავად ეს ადამიანები გააკეთებენ განცხადებას საკუთარ გადაწყვეტილებაზე.

საუბარია  სააკაშვილის გუნდის ოთხ წევრზე. ესენი არიან: ზურაბ ჯაფარიძე, რომელიც პარტიის აღმასრულებელი მდივანია. ის სააკაშვილის გუნდის წევრი 2012 წლის საპარლამენტო არჩევნების წინ გახდა და დღეს პარლამენტი წევრია. მანამდე არასამთავრობო  ორგანიზაციას ხელმძღვანელობდა. ის განსაკუთრებით გამოირჩევა  ეკონომიკურ საკითხებზე აქტიურობით.

მეორეა პავლე კუბლაშვილი, რომელიც სააკაშვილის გუნდის წევრია ვარდების რევოლუციიდან მოყოლებული და ის უკვე მესამე მოწვევის პარლამენტის დეპუტატია ამ პარტიიდან.  სააკაშვილის ხელისუფლების დროს ის პარლამენტში იურიდიულ კომიტეტს ხელმძღვანელობდა და იმ საკონსტიტუციო რეფორმის ერთ-ერთი ავტორი იყო, რომელიც 2010 წელს განხორციელდა და იურისტების კრიტიკას იმ თვალსაზრისით იმსახურებდა, რომ მორგებული იყო პირად სააკაშვილის ინტერესებზე.  ის პარტიის აქტიური წარმომადგენელი იყო  ბოლო დრომდე. შეგახსენებთ, რომ მისი ძმა, კოტე კუბლაშვილი, ბოლო დრომდე იყო უზენაესი სასამართლოს თავმჯდომარე.

პარტია ასევე დატოვეს გიორგი მელაძემ, რომელიც ასევე სამი მოწვევის დეპუტატია და სააკაშვილის გუნდის წევრად ითვლებოდა მას შემდეგ, რაც სააკაშვილი ხელისუფლებაში მოვიდა და ის პარტიის წევრი იყო ბოლო დრომდე.

„ნაციონალური მოძრაობა“ ასევე დატოვა გოგა ხაჩიძემ, რომელიც სააკაშვილის მმართველობის დროს ჯერ გუბერნატორი იყო და შემდეგ გარემოს დაცვის მინისტრი წლების განმავლობაში და 2012 წლის საპარლამენტო არჩევნების შემდეგ ის უკვე პარლამენტის წევრია „ნაციონალური მოძრაობიდან“. ის განსაკუთრებით გამოირჩეოდა სააკაშვილის ერთგულებით და მისთვის სიმღერაც კი აქვს მიძღვნილი.

ეს ოთხი ადამიანი ჯერ არანაირ კომენტარს არ აკეთებს. „ნაციონალური მოძრაობის“ წევრები ამბობენ, რომ განცხადებას ისინი, სავარაუდოდ, ოთხშაბათს გააკეთებენ, რადგან ხვალ, სამშაბათს, საქართველოში დამოუკიდებლობის დღე აღინიშნება და მთელი ყურადღება ამ დღეზეა გადატანილი.

თუმცა, ამ წუთებში  „ნაციონალური მოძრაობის“ ცენტრალურ ოფისში პარტიის თათბირი მიმდინარეობს და გამორიცხული არ არის, განცხადება პარტიის მხრიდან დღესვე გაკეთდეს.

„ნაციონალური  მოძრაობის“ წევრები DFWatch-თან პირადი საუბრისას ამბობენ, რომ ეს პირები პოლიტიკური საქმიანობის გაგრძელებას „ნაციონალური მოძრაობისგან“ ცალკე გეგმავენ.

არაოფიციალური ინფორმაციით, აღნიშნული დეპუტატები პარტიის დატოვებას ჯერ კიდევ ერთი წლის წინ აპირებდნენ, უმცირესობის ლიდერ დავით ბაქრაძესთან ერთად. მაგრამ,  იმის გამო, რომ ბაქრაძემ ამ პროცესში მონაწილეობაზე უარი თქვა, მათ გადაწყვეტილების მიღებისგან თავი დროებით შეიკავეს.

The post „ნაციონალურ მოძრაობას“ აღმასრულებელი მდივანი და სამი აქტიური წევრი ტოვებს appeared first on Democracy & Freedom Watch.

Mikheil Machavariani (IPN)

„ნაციონალური მოძრაობის“ ერთ-ერთი ლიდერი „დფვოჩთან“ საუბრისას ამბობს, რომ ის ოთხი ადამიანი, რომლებმაც პარტია დატოვეს, „ახალი მოძრაობის შექმნას აპირებენ“.

რატომ გადაწყვიტეს მათ პარტიიდან წასვლა, რა ინფორმაცია ჰქონდათ ამაზე თავად პარტიის შიგნით და როგორი იქნება მათი სამომავლო თანამშრომლობა, ამ საკითხთან დაკავშირებით „დფვოჩი“ მიხეილ მაჭავარიანს ესაუბრა, რომელიც პარტიაში დღემდე გადაწყევტილების ერთ-ერთ მიმღებად ითლება.

მიხეილ მაჭავარიანი: სამწუხაროდ, ამ საკითხის მანამდე განხილვა არ ყოფილა და, რომ გავიგეთ, ნამდვილად უსიამოვნო იყო.  მე ველოდები, რომ მიზეზებს დაასახელებენ.

იმედი მაქვს, რომ იმ ადამიანებისგან განსხვავებულ მიზეზებს დაასახელებენ, რომლებმაც „ნაციონალური მოძრაობა“ ადრე დატოვეს. გახსოვთ, ალბათ, ზოგმა ბიზნესი დაასახელა, ზოგმა ინტერესი, ზოგმა რა და ზოგმა რა. მე იმედი მაქვს, რომ ახლაც ასე არ აღმოჩნდება, რადგან ჩვენ ერთად საკმაოდ დიდი ბრძოლა გავიარეთ და, თუკი ისეთი მარტივი გზა არის, რომ ამით  „ნაციონალების“ გზიდან რაღაც ტვირთი უნდათ, ამ ადამიანებისგან  ესეც ცოტა გაუგებარია.

– იყო მოლოდინი, რომ ლიდერები პარტიას დატოვებდნენ?

მ.მ: მოდით, ამ კითხვაზე პასუხისგან თავს შევიკავებ.  დაველოდოთ მოვლენათა განვითარებას. ნამდვილად არ არის სასიამოვნო, მაგრამ პოლიტიკაში ასეთი რაღაცეები ხდება. დაგეთანხმებით, რომ მათი ვერსიები და განმარტებები ძალიან საინტერესოა, რადგან ისინი პარტიის რიგითი წევრები არ  იყვნენ.

– საერთოდ თუ იყო მოლოდინი, რომ პარტიას ვინმე დატოვებდა?

მ.მ:   მოლოდინები რა იყო და როგორ იყო, რა ხდებოდა პარტიაში ბოლო ორი თვის განმავლობაში თუ მანამდე, ახლა ამაზე საუბარი არ მინდა. ის კი დანამდვილებით შემიძლია, გითხრათ, რომ გუშინ რაც მოხდა, ახლა ამაზე ლაპარაკი არ ყოფილა. ჩვენ ეს ყველაფერი გავიგეთ კვირას და ნამდვილად მოულოდნელი იყო, რადგან ახლა არ ველოდით. ამაზე არც საუბარი ყოფილა, არც მინიშნება.

– რა ფორმით გაგაგებინეს? ეს იყო წერილობით, სატელეფონო საუბარი თუ პირისპირ შეხვდით?

მ.მ: არა. ისინი შეხვდნენ ჩვენს მეგობრებს და უთხრეს, რომ წასვლას აპირებდნენ.

– ვინ მეგობრებს? პარტიის შიგნით?

მ.მ: კი, პარტიის წევრებთან ჰქონდათ მათ საუბარი.

– წასვლის მიზეზი არც მათთვის არ უთქვამთ? მათ მაინც არ ჰკითხეს?

მ.მ: არა, არც უთქვამთ და არც გვიკითხავს. მათ თქვეს, რომ ორშაბათს ვიტყვითო. ჩვენ გვაინტერესებდა, როგორ აპირებდნენ ჩვენგან წასვლას, საერთოდ პოლიტიკიდან მიდიან, აპირებენ, რომ აქტიური პოლიტიკიდან გვერდზე  გაიწიონ თუ ახალი მოძრაობის შექმნას და პარლამენტში დარჩენას. ამაზეც იყო პასუხი, რომ ახალი მოძრაობის შექმნას აპირებენ.

– არსებობს ვერსია, რომ თითქოს გიორგი ვაშაძეს უნდოდა პარტიის გენმდივნობა და  ამის გამო მოხდა დაპირისპირება.

მ.მ: არა. მე შემიძლია გითხრათ, რომ ეს მიზეზი ვერ გახდებოდა, რადგან ზურა ჯაფარიძე ერთსულოვნად ავირჩიეთ, ვაშაძეს გენმდივნობა უნდოდა მაშინ, როდესაც მე ვიყავი პარტიაში ამ თანამდებობაზე, მაგრამ მაშინ საბოლოო ჯამში გადაიფიქრა და საორგანიზაციო მდივნის კანდიდატურაზე შეიტანა თავისი განაცხადი, ზურას არჩევისას კი საერთოდ არ ყოფილა ასეთი რამ.  ზურას არჩევა უალტერნატივოდ მოხდა განსხვავებით  ჩემი არჩევისგან.

– ამ ადამიანებთან თანამშრომლობას თუ აპირებთ?

მ.მ: პარტიაში განსხვავებული პოზიციები და შეფასებებია. ერთია, გული რას  გეუბნება და მეორეა, ცივი გონება რას გეუბნება. პოლიტიკოსი კი იმიტომ ხარ, რომ არ მიიღო გადაწყვეტილება ცხელი გონებით და ცივი გულით.  გადაწყვეტილება  ცივი გონებით  და ცხელი გულით უნდა იყოს მიღებული, ამიტომ დაველოდოთ, რა განცხადებები იქნება. თუმცა, ძალიან უსიამოვნოა და ამ ყველაფერმა  ამ მომენტში  ბევრი ჩვენი არაკეთილმოსურნე სასიამოვნოდ გააღიმა.  თუმცა, ისიც ფაქტია, რომ ამ ადამინებს ახლა გასაღიმად არა აქვთ საქმე, რადგან ქვეყანაში მეტი პრობლემაა ვიდრე, თუნდაც ამ ოთხი ადამიანის მიერ პარტიის და ფრაქციის დატოვება.

– მათი წასვლის გამო პარტიის შიგნით პრობლემები ხო არ შეიქმნა?

მ.მ: არაა.

– ეს ოთხი ადამიანი განსხვავებული სტილის ადამიანები არიან და მათ ერთად წასვლას როგორ  ხსნით?

მ.მ:   არ ვიცი, არ მინდა ახლა ვიმარჩიელო. თუმცა, ფაქტია, რომ ჩვენი რთული გზა გავიარეთ და ახლაც გვყავს პოლიტიკური პატიმრები. მაგრამ ყველას თავისი პასუხისმგებლობა აქვს და დაველოდოთ. მე ვერ მივცემ თავს უფლებას, ახლა გავბრაზდე.

– შეიძლება, რომ მათზე რაიმე ზეწოლა განხორციელდა?

მ.მ: არ მინდა, წინასწარ ვარაუდებზე დაყრდნობილი განცხადება გავაკეთო. ამიტომ ვამბობ, დაველოდოთ პროცესების განვითარებას.

The post „ნაციონალური მოძრაობიდან“ წასულები ახალი მოძრაობის შექმნას აპირებენ – მიხეილ მაჭავარიანი appeared first on Democracy & Freedom Watch.

(DFWatch)

მიუხედავად იმისა, რომ ქვეყანაში არსებულ ეკონომიკურ მდგომარეობასთან დაკავშირებით  სულ უფრო მეტი უკმაყოფილება ისმის, ოფიციალური მონაცემებით, 2014 წელს უმუშევრობა ქვეყანაში წინა წელთან შედარებით 2,2%-ით შემცირდა და ბოლო 11 წლის განმავლობაში უმუშევრობის ყველაზე  დაბალი დონე დაფიქსირებულა. ასეთი მონაცემები  გამოაქვეყნა სტატისტიკის ეროვნულმა სამსახურმა. 

ამ მონაცემების თანახმად, გაზრდილია როგორც დასაქმების მაჩვენებელი, ასევე შრომისუნარიანი მოსახლეობის აქტივობა.

ტრადიციულად, დასაქმებულებში ჭარბობს თვითდასაქმებულთა წილი. 2014 წელს 2013 წელთან შედარებით დაქირავებით დასაქმებულთა რაოდენობა გაიზარდა 5.2 პროცენტით, ხოლო თვითდასაქმებულთა რაოდენობა უმნიშვნელოდ – 0.2 პროცენტით, რის შედეგადაც აღნიშნული თანაფარდობა მცირედით შეიცვალა – დასაქმებულებში დაქირავებულთა წილი 1.1%-ით არის გაზრდილი.

უმუშევრობის დონე გაცილებით დაბალია სოფლის მოსახლეობაში, ქალაქის მოსახლეობასთან შედარებით. 2014 წელს 2013 წელთან მიმართებაში უმუშევრობის დონის შემცირება დაფიქსირდა როგორც ქალაქის, ასევე სოფლის ტიპის დასახლებებში და შესაბამისად, 22.1 და 5.4 პროცენტი შეადგინა. ამასთან, ქალაქად უმუშევრობის დონემ მინიმალურ მაჩვენებელს მიაღწია ბოლო 11 წლის, ხოლო სოფლად ბოლო 7 წლის მანძილზე.

წინა წელთან შედარებით უმუშევრობის დონე რეგიონულ ჭრილში გაზრდილია მხოლოდ ქვემო ქართლის და იმერეთის რეგიონებში, შესაბამისად 1.5 და 0.8 პროცენტული პუნქტით.

უმუშევრობის ყველაზე მაღალი დონე დედაქალაქში ფიქსირდება. თუმცა, აქაც კლების ტენდენციაა.

დასაქმებისა და უმუშევრობის მაჩვენებლების სქესობრივ ჭრილში განხილვისას აღსანიშნავია, რომ 2014 წელს 2013 წელთან შედარებით უმუშევრობის დონე შემცირდა როგორც ქალებში 1,9%-ით, ასევე კაცებში 2,5%-ით.

„ტრადიციულად კაცებში უმუშევრობის დონე უფრო მაღალია ქალებთან შედარებით. ამის ძირითადი მიზეზია ის, რომ დაუსაქმებელი ქალების უმრავლესობა დიასახლისია და შესაბამისად, არააქტიური მოსახლეობის კატეგორიას მიეკუთვნება. ქალებში არააქტიურობის დონე თითქმის ორჯერ აღემატება კაცებში ანალოგიურ მაჩვენებელს (შესაბამისად 42.9 და 22.6 პროცენტი). ამგვარად, კაცებთან შედარებით ქალებში დაბალია როგორც აქტიურობის, ასევე დასაქმების დონე,“ – ნათქვამია სტატისტიკის ეროვნული სამსახურის მიერ გამოქვეყნებულ ინფორმაციაში.

რაც შეეხება უმუშევრობის ასაკობრივ ჭრილში განხილვას, გამოქვეყნებული ინფორმაციის თანახმად,  2014 წელს 2013 წელთან შედარებით უმუშევრობის დონე არ შეცვლილა მხოლოდ 55-59 ასაკობრივ ჯგუფში. სხვა ასაკობრივ ჯგუფებში კი აღნიშნული მაჩვენებელი ყველგან შემცირებულია. უმუშევრობის დონის ყველაზე დიდი კლება  – 11.3%,  15-19 ასაკობრივ ჯგუფში დაფიქსირდა.  თუმცა, აღნიშნული მაჩვენებელი ყველაზე მაღალი ისევ ამ ასაკობრივ ჯგუფში რჩება.

„უმუშევრობის დონე ტრადიციულად ყველაზე დაბალია 65+ ასაკობრივ ჯგუფში. ამის მიზეზია ის, რომ 65+ საპენსიო ასაკია და მოსახლეობის დიდი ნაწილი არ არის დასაქმებული, არ ეძებს სამუშაოს და შესაბამისად, არააქტიური მოსახლეობის კატეგორიას მიეკუთვნება,“ – ნათქვამია გამოქვეყნებულ ინფორმაციაში.

The post საქართველოში უმუშევრობა შემცირდა – სტატისტიკის ეროვნული სამსახური appeared first on Democracy & Freedom Watch.

ბავშვთა ჰოსპისის პროექტის განხორციელებისთვის მემორანდუმი გაფორმდა.

2016 წლის ბოლოს საქართველოში ბავშვთა ჰოსპისის გახსნა იგეგმება.  ფოსპისი თბილისში, ვაშლიჯვრის მიმდებარე ტერიტორიაზე აშენდება.

პროექტი  ფონდ „ღია საზოგადოება  – საქართველოს“,  სამედიცინო კორპორაცია „ევექსის” და პრეზიდენტის სარეზერვო ფონდის მონაწილეობით  განხორციელდება.

დღეს მათ შორის თანამშრომლობის მემორანდუმი გაფორმდა, რომელსაც  ხელი  ფონდ “ღია საზოგადოება-საქართველოს”,   “ბავშვთა ჰოსპისისა” და “სამედიცინო კორპორაცია ევექსის” ხელმძღვანელებმა მოაწერეს.

ეს იქნება პირველი დაწესებულება, სადაც პალიატიურ მზრუნველობას გაუწევენ ქრონიკული და უკურნებელი სენით დაავადებულ ბავშვებს.

ბავშვებისა და მათი ოჯახებისთვის მომსახურება უფასო იქნება.

ბავშვთა ჰოსპისი სამი ძირითადი მიმართულებით იმუშავებს: 24 საათიანი მომსახურება ერთდროულად 10 ბავშვისთვის; დღის ცენტრი, სადაც ბავშვები და მათი მშობლები დილიდან საღამომდე დაყოვნდებიან საჭირო მომსახურების მისაღებად; შინ ზრუნვის სამსახური, რომელიც ბინაზე მოემსახურება ბავშვებს.

ბაშვთა ფოსპისის მაკეტი, რომელიც საქართველოში 2016 წლის ბოლომდე გაიხსნება

ამ საქველმოქმედო პროექტის განხორციელებისთვის პირველი მნიშვნელოვანი შენატანი საქართველოს პრეზიდენტმა და “სამედიცინო კორპორაცია ევექსმა” განახორციელეს. მშენებლობა ივლისში დაიწყება.

როგორც ფონდ „ღია საზოგადოება – საქართველოს“ ხელმძღვანელმა, ქეთი ხუციშვილმა  განაცხადა,  ბავშვთა ჰოსპისის აშენების იდეა 2013 წელს ჩატარებული კვლევის შემდეგ გაჩნდა, რომლის მიზანი იყო ბავშვებისთვის პალიატიური მზრუნველობის საჭიროების შესწავლა.

როგორც კვლევამ აჩვენა, საქართველოში პალიატიური მზრუნველობა ყოველწლიურად 0-დან 18-წლამდე 839 ბავშვს ესაჭიროება.

აპრილში, “ბავშვთა ჰოსპისის” პროექტის ჯგუფმა ჰოლანდიის საუკეთესო ბავშვთა ჰოსპიები მოინახულა. საქართველოს ჰოსპისი საერთაშორისო ჰოსპისების სტანდარტების შესაბამისი იქნება.

ბავშვთა პალიატიური მზრუნველობა გულისხმობს განუკურნებული და ქრონიკული დაავადებების მქონე ბავშვებზე ზრუნვას. პალიატიური მზრუნველობა მოიცავს, როგორც დაავადებით გამოწვეული სიმპტომების შემსუბუქებას, ასევე ბავშვისა და ოჯახისთვის ფსიქოლოგიური და სულიერი მხარდაჭერის გაწევას. პალიატიური მზრუნველობის საჭიროება მაშინ დგება, როდესაც საქმე გვაქვს ისეთ დაავადებებთან, რომელიც მკურნალობას არ ექვემდებარება. ბავშვებში, ასეთი დაავადებებია კიბოს ბოლო სტადია, დიაბეტი, სხვადასხვა ნევროლოგიური დაავადებები, ცერებრალური დამბლის მძიმე ფორმები. მოზრდილებისგან განსხვავებით, პალიატიური მზრუნველობის საჭიროების მქონე ბავშვებს სხვა ტიპის მიდგომა სჭირდებათ.

The post საქართველოში ბავშვთა ჰოსპისი იხსნება appeared first on Democracy & Freedom Watch.

მიხეილ სააკაშვილი საქართველოს მოქალაქე აღარ არის. ორმაგი მოქალაქეობის საკითხი კი გაურკვეველია.

მას შემდეგ, რაც ცნობილი გახდა, რომ საქართველოს ყოფილი პრეზიდენტი, რომელიც ბოლო თვეების განმავლობაში უკრაინის პრეზიდენტის რეფორმების საბჭოს ხელმძღვანელობდა, ოდესის გუბერნატორად დაინიშნა, მისი მოქალაქეობის საკითხისადმი ინტერესი გაძლიერდა სწორედ იმის გამო, რომ ამ თანამდებობაზე დანიშვნისთვის  ის უკრაინის მოქალაქე უნდა იყოს. უკრაინის მოქალაქეობის მიღება  კი  საქართველოს მოქალაქეობის ავტომატურ შეწყვეტას ითვალისწინებს.

მიხეილ სააკაშვილი აქამდე საქართველოს მოქალაქეობის დათმობაზე უარს ამბობდა და რამდენიმე თვის წინ უკრაინაში მაღალ თანამდებობზე დანიშვნაზე უარი, მისივე თქმით, იმის გამო თქვა, რომ  ის საქართველოს მოქალაქეობის დათმობას არ აპირებდა. ამის შესახებ განცხადება სააკაშვილს არაერთხელ აქვს გაკეთებული.

უკრაინის კანონმდებლობა საჯარო სამსახურში მაღალ თანამდებობაზე დანიშვნის პირობად უკრაინის  მოქალაქეობის მიღებას ითხოვს. საქართველოს კანონმდებლობით კი სხვა ქვეყნის მოქალაქეობის მიღება  ავტომატურად აუქმებს საქართველოს მოქალაქეობას. გამონაკლისია ორმაგი მოქალაქეობა, რომლის მინიჭების პრეროგატივა საქართველოს  პრეზიდენტს  ეკუთვნის და გადაწყვეტილება ინდივიდუალურად მიიღება.

„ის ფაქტი, რომ გამოქვეყნდა უკრაინის პრეზიდენტის ბრძანებულება სააკაშვილისთვის უკრაინის მოქალაქეობის მინიჭების შესახებ, ავტომატურად უწყვეტს სააკაშვილს საქართველოს მოქალაქეობას. ანუ, სააკაშვილი საქართველოს მოქალაქე აღარ არის,“ – ამბობს „დფვოჩთან“ საუბრისას იურისტი ლევან ალაფიშვილი.

ის აქცენტს  იმაზე აკეთებს, რომ ორმაგი მოქალაქეობისთვის საჭირო იქნება  სააკაშვილის ოფიციალური მიმართვა საქართველოს პრეზიდენტის სახელზე და შემდეგ გადაწყვეტილება  მარგველაშვილმა უნდა მიიღოს, თუმცა, ამ გადაწყვეტილებისთვის მას სათანადო საბუთები და რეკომენდაციები იუსტიციის და შს სამინისტროებმა უნდა მოუმზადონ.

პრეზიდენტის ადმინისტრაციაში „დფვოჩს“ განუცხადეს, რომ სააკაშვილის სახელით ჯერჯერობით არანაირი განცხადება არ არის  შესული.

სააკაშვილის პარტიაში კი ჯერჯერობით არანაირ განცხადებას არ აკეთებენ, მიმართავს თუ არა ან როდის სააკაშვილი მარგველაშვილს ორმაგი მოქალაქეობის მიღების თხოვნით.

მეორე საკითხი, რაც სააკაშვილის მოქალაქეობასთან არის დაკავშირებული, არის  პარტია „ნაციონალური მოძრაობის“ თავმჯდომარეობა.  დღეს ამ პარტიის თავმჯდომარე მიხეილ სააკაშვილია. მაგრამ ქართული კანონმდებლობით, არ შეიძლება, რომ პოლიტიკურ პარტიას სხვა ქვეყნის მოქალაქე თავმჯდომარეობდეს.

„ნაციონალურ მოძრაობაში“ კი ამბობენ, რომ  „სააკაშვილის მიერ პარტიის თავმჯდომარეობის დატოვებაზე საუბარი ნაადრევია, ეს დამოკიდებულია ხელისუფლების ქმედებებზე“.

როგორც „ნაციონალური მოძრაობის“ წარმომადგენელმა,  გიორგი ვაშაძემ ჟურნალისტებთან განაცხადა,  “ნაციონალური მოძრაობა” მხოლოდ მას შემდეგ გააკეთებს კომენტარებს ამ საკითხზე, რაც ხელისუფლება მიიღებს გადაწყვეტილებას სააკაშვილის ორმაგი მოქალაქეობის საკითხზე.

თუმცა, არ დაუკონკრეტებია, აპირებს თუ არა სააკაშვილი ამ თხოვნით მიმართოს ხელისუფლებას.

მმართველ გუნდში კი ამბობენ, რომ, თუკი ხელისუფლება მიხეილ სააკაშვილისთვის ორმაგი მოქალაქეობის მიღების შესახებ გადაწყვეტილებას მიიღებს, „ეს იქნება უპასუხისმგებლო და შეურაცხმყოფელი გადაწყვეტილება“.

The post მიხეილ სააკაშვილი საქართველოს მოქალაქე აღარ არის appeared first on Democracy & Freedom Watch.

„ყველა ბერკეტი სააკაშვილმა მოგვცა ხელში. ბურთი ჩვენს მოედანზეა და ახლა ჩვენ შეგვიძლია, გადავწყვიტოთ წყნარად, დინჯად, როდის შევუწყვეტთ მას მოქალაქეობას“ – განაცხადა იუსტიციის მინისტრმა, თეა წულუკიანმა. (DF Watch.)

მართალია, უცხო ქვეყნის მოქალაქეობის მიღების შემთხვევაში საქართველოს მოქალაქე ამ სტატუსს კარგავს, მაგრამ ამას ფორმალური პროცედურები ესაჭიროება, რის გამოყენებასაც საქართველოს მთავრობა უკრაინის ოდესის ოლქის გუბერნატორად დანიშნული ექსპრეზიდენტ მიხეილ სააკაშვილის მიმართ, როგორც ჩანს, არ ჩქარობს.

„დაე, ეკიდოს ეს საკითხი მის თავზე დამოკლეს მახვილივით. ეს პოლიტიკური გადაწყვეტილებაა და როცა გვინდა, მაშინ მივიღებთ,” – განაცხადა იუსტიციის მინისტრმა თეა წულუკიანმა.

იმისთვის, რომ სააკაშვილმა, რომელმაც ახალ თანამდებობაზე დანიშვნისას უკრაინის მოქალაქეობა მიიღო, საქართველოს მოქალაქეობა შეინარჩუნის, მან მოქმედ პრეზიდენტს უნდა მიმართოს. როგორც პრეზიდენტ გიორგი მარგველაშვილის ადმინისტრაციაში აცხადებენ, სააკაშვილს ორმაგი მოქალაქეობის მოთხოვნით მათთვის ჯერ არ მიუმართავს. თავის ტელეინტერვიუში კი მიხეილ სააკაშვილმა განაცხადა, რომ ამის გაკეთებას არ აპირებს.

საქართველოს  მოქალაქეობის შეწყვეტის საკითხს არეგულირებს საქართველოს კონსტიტუცია და ორგანული კანონი „მოქალაქეობის შესახებ“, რომელიც რიგით, „ჩვეულებრივ“ კანონებზე უპირატესი ძალის მქონეა.

კონსტიტუციის მე-12 მუხლის თანახმად, „საქართველოს მოქალაქე იმავდროულად არ შეიძლება იყოს სხვა სახელმწიფოს მოქალაქე, გარდა ამ პუნქტით დადგენილი გამონაკლისი შემთხვევისა.“

მოქალაქეობის შესახებ კანონის მიხედვით კი, „საქართველოს მოქალაქის მიერ სხვა სახელმწიფოს მოქალაქეობის მიღება იწვევს  საქართველოს მოქალაქეობის დაკარგვას“.

იმის გამო, რომ უკვე გამოქვეყნდა უკრაინის პრეზიდენტის ბრძანებულება სააკაშვილისთვის უკრაინის მოქალაქეობის მინიჭების შესახებ, ავტომატურად დადგა მისთვის საქართველოს  მოქალაქეობის გაუქმების საკითხი.

თუმცა, როგორც იურისტები განმარტავენ, ვიდრე ეს საკითხი ოფიციალურად არ გაფორმდება, სააკაშვილი ფორმალურად საქართველოს მოქალაქედ ითვლება.

როგორც DFWatch-თან იურისტი, ლევან ალაფიშვილი განმარტავს, ეს არის ადამიანის უფლებათა ევროპული კონვენციის მოთხოვნა, რათა ადამიანი  არ დარჩეს რომელიმე ქვეყნის მოქალაქეობის გარეშე და არ აღმოჩნდეს, რომ  სადაც ჰქონდა მოქალაქეობა, იქ გაუუქმეს და ამ დროს სხვა ქვეყანას არ მიუცია  მოქალაქეობა.

„იურიდიული გაფორმებაა საჭირო და ამაზეა საუბარი. ანუ, იუსტიციის სამინისტრომ  უნდა გამოითხოვოს იმ ქვეყნიდან დოკუმენტაცია, სადაც კონკრეტულ პირს მოქალაქეობა მიენიჭა და ეს დოკუმენტაცია ხდება უკვე  იმ ქვეყნის მიერ მოქალაქეობის გაუქმების საფუძველი,  რომლის მოქალაქეც მანამდე იყო. სხვა ქვეყნის მიერ მოქალაქეობის მინიჭება არის ფაქტი, რომელიც იწვევს მოქალაქეობის გაუქმებას და ამას სჭირდება იურიდიული გაფორმება. ახლა სწორედ ამ იურიდიულ გაფორმებაზეა ლაპარაკი,“ – ამბობს ლევან ალაფიშვილი.

მიხეილ სააკაშვილიც და მისი პარტიის წევრებიც  ამბობენ, რომ სააკაშვილი ისევ საქართველოს მოქალაქეა. მათ ამ ეტაპზე  სააკაშვილის მიერ საქართველოს მოქალაქეობის ფლობა იმისთვის სჭირდებათ, რომ მან „ნაციონალური მოძრაობის“ პარტიის ხელმძღვანელის პოსტი  ოფიციალურად შეინარჩუნოს, რადგან ქართული კანონმდებლობით, არ შეიძლება პოლიტიკურ პარტიას სხვა ქვეყნის მოქალაქე ხელმძღვანელობდეს ან რაიმე პოლიტიკურ საქმიანობას ეწეოდეს.

ამ ეტაპზე „ნაციონალური მოძრაობის“  შიგნით სტაბილური ვითარება არ არის, განსაკუთრებით მას შემდეგ, რაც  პარტია ოთხმა წამყვანმა ფიგურამ, მათ შორის პარტიის   აღმასრულებელმა მდივანმა დატოვა. სააკაშვილის  ავტორიტეტი კი პარტიის ერთიანობისთვის საკმაოდ მნიშვნელოვანია.

როგორც ჩანს, სწორედ ამ ფაქტორის გამო თავად  სააკაშვილიც და მისი გუნდიც იმაზე აპელირებენ, რომ ის ჯერ საქართველოს მოქალაქეა და შეიძლება მას ორმაგი მოქალაქეობა მიენიჭოს.

როგორც პარტიის ერთ-ერთმა ლიდერმა, მიხეილ მაჭავარიანმა DFWatch -თან საუბრისას განაცხადა, „შეიძლება მოქმედმა  პრეზიდენტმა, რომლის გადასაწყვეტიც არის ეს საკითხი, თქვას, რომ სააკაშვილს ქვეყნის წინაშე იმდენი დამსახურება აქვს, რომ  ორმაგ მოქალაქეობას იმსახურებს და მიანიჭოს“.

საქართველოს პრეზიდენტის საპარლამენტო მდივანმა, გიორგი კვერენჩხილაძემ კი განაცხადა, რომ „პრეზიდენტისთვის მოტივირებული განცხადებით მიმართვის გარეშე, ყოფილ პრეზიდენტს, მიხეილ სააკაშვილს, ორმაგი მოქალაქეობა ვერ მიენიჭება“.

მისივე თქმით, იმისათვის, რომ პირმა გამონაკლისი წესით მიიღოს საქართველოს მოქალაქეობა, მოტივირებული განცხადებით უნდა მიმართოს საქართველოს პრეზიდენტს და თან დაურთოს იმ ქვეყნის მოქალაქეობის დამადასტურებელი დოკუმენტი, რომლის მოქალაქეც არის.

იუსტიციის მინისტრმა კი კვირას ერთ-ერთ სატელევიზიო ინტერვიუში  განაცხადა, რომ  ის სააკაშვილისთვის მოქალაქეობის ჩამორთმევის საკითხის სწრაფად გადაწყვეტას მიზანშეწონილად არ მიიჩნევს, რათა ეს საკითხი “სააკაშვილის თავზე დამოკლეს მახვილივით ეკიდოს”.

წულუკიანის განმარტებით, მიხეილ სააკაშვილს საქართველოს მოქალაქეობა ფორმალურად ჯერ კიდევ აქვს, სანამ იუსტიციის სამინისტროს სერვისების განვითარების სააგენტო არ შეადგენს დასკვნას და არ მიმართავს პრეზიდენტ მარგველაშვილს მიხეილ სააკაშვილისთვის მოქალაქეობის შეწყვეტის მოთხოვნით.

“მე არ ჩავვარდებოდი ცაიტნოტში, იმიტომ, რომ ყველა ბერკეტი სააკაშვილმა მოგვცა ხელში. ბურთი ჩვენს მოედანზეა და ახლა ჩვენ შეგვიძლია, გადავწყვიტოთ წყნარად, დინჯად, როდის შევუწყვეტთ მას მოქალაქეობას. დაე, ეკიდოს ეს საკითხი მის თავზე დამოკლეს მახვილივით. ეს პოლიტიკური გადაწყვეტილებაა და როცა გვინდა, მაშინ მივიღებთ,” – განაცხადა თეა წულუკიანმა.

. იუსტიციის მინისტრის თქმით, მიხეილ სააკაშვილის ექსტრადირების საკითხი დღის წესრიგში დარჩება მანამ, სანამ სააკაშვილი არ აგებს პასუხს ჩადენილი ქმედებების გამო ქართული კანონის წინაშე.

იუსტიციის მინისტრი ღიად  ამბობს, რომ  სააკაშვილის მოქალაქეობის საკითხი პოლიტიკური საკითხია და პირველი შემთხვევა არ არის, როდესაც საქართველოში პოლიტიკურად აქტიური პირის მოქალაქეობის საკითხის პოლიტიკური ნიშნით გამოყენება ხდება.

2011 წლის ოქტომბერში, როდესაც ბიძინა ივანიშვილმა თქვა, რომ მას პოლიტიკური მიზნები ჰქონდა და მაშინდელ მმართველ გუნდს დაუპირისპირდა, სააკაშვილის ხელისუფლებამ მას საქართველოს მოქალაქეობა შეუწყვიტა სწორედ  იმ საბაბით, რომ ის მაშინ საფრანგეთის მოქალაქე იყო. მაშინ არგუმენტად ის დასახელდა, რომ მის განცხადებამდე არ ჰქონდათ ინფორმაცია მისი საფრანგეთის მოქალაქეობის შესახებ.  ამ გადაწყვეტილების გამო კი ივანიშვილს და მის პოლიტიკურ  ძალას ხელისუფლებაში მოსვლამდე საკმაოდ ბევრი პრობლემა შეექმნათ.

The post სააკაშვილს მოქალაქეობას როცა გვინდა, მაშინ შევუწყვეტთ – საქართველოს მთავრობა appeared first on Democracy & Freedom Watch.

Tamar Beruchashvili (IPN)

ოფიციალური თბილისი არ აპირებს  მიხეილ სააკაშვილის ოდესის ადმინისტრაციის უფროსად დანიშვნის გამო უკრაინას საპროტესტო ნოტა გაუგზავნოს. თუმცა, არც იმაზე ამბობენ რამეს, შეძლებს თუ არა ექსპრეზიდენტი საქართველოში დიპლომატიური პასპორტით ჩამოსვლას, როგორც უკრაინის ხელისუფლების  წარმომადგენელი.

ამ საკითხზე  საგარეო საქმეთა მინიტრმა ჟურნალისტებთან მას შემდეგ ისაუბრა, რაც იუსტიციის მინისტრმა ღიად თქვა, რომ მოქმედი ხელისუფლება სააკაშვილს მოქალაქეობას მაშინ შეუწყვეტს, როდესაც  უნდა, რათა მის წინააღმდეგ აღძრული საქმის წარმოება ბოლომდე მიიყვანოს.

მართალია, იურისტები ამბობენ, რომ მოქალაქეობის გაუქმება  ხელს არ უშლის, რომ  სისხლის სამართლის ბრალდებებზე, რაც სააკაშვილს აქვს წაყენებული,  პროცესი ბოლომდე მივიდეს, მაგრამ ამ შემთხვევაში  პრობლემა მის ექსტრადირებასთან დაკავშირებით შიქმნება, რადგან  საქართველოს ხელისუფლებას სხვა ქვეყნის მოქალაქის ექსტრადირების მოთხოვნის უფლება აღარ ექნება.

მიუხედავად იმისა, რომ სააკაშვილის წინააღმდეგ საქმე რამდენიმე თვის წინ აღიძრა, მთავრობას  მისი დაკავების თხოვნით დასავლეთის ქვეყნებისთვის არ მიუმართავს.  თუმცა, მისი დაკავება უკრაინის ხელისუფლებას  მოსთხოვა მაშინ, როდესაც ის პრეზიდენტმა პეტრო პოროშენკომ რეფორმების საბჭოს ხელმძღვანელად დაინიშნა, რაზეც უარი მიიღო. სააკაშვილის დაკავებაზე  ცოტა ხნის წინ აზერბაიჯანმაც უარი თქვა, როდესაც  ექსპრეზიდენტი  ბაქოში იყო ჩასული. მოქალაქეობის გაუქმების  შემდეგ კი თბილისს ამ მოთხოვნის დაყენების უფლებაც კი აღარ ექნება.

მეორე საკითხია  თავად უკრაინის ხელისუფლებასთან და პირადად სააკაშვილთან, როგორც ხელისუფლების წარმომადგენელთან, საქართველოს ხელისუფლების ურთიერთობა.

როგორც საგარეო საქმეთა მინისტრმა თამარ ბერუჩაშვილმა ჟურნალისტებს განუცხადა, „უკრაინის მთავრობის სუვერენული უფლებაა, თავისი ქვეყნის ტერიტორიაზე საკადრო გადაწყვეტილებები მიიღოს“ და ქართული მხარე არანაირი საპროტესტო ნოტის გაკეთებას არ აპირებს.

თუმცა, საგარეო საქმეთა მინისტრი არ აკონკრეტებს, შეეძლება თუ არა  მიხეილ სააკაშვილი საქართველოში დიპლომატიური პასპორტით ჩამოსვლა ოდესის მხარის გუბერნატორის სტატუსით.

“როგორც დღეს ვიცით, ბატონმა მიხეილ სააკაშვილმა უკვე გააკეთა არჩევანი. მან თავისი გადაწყვეტილებით, გამხდარიყო ოდესის მხარის გუბერნატორი, უარი თქვა საქართველოს მოქალაქეობაზე. შესაბამისად, ეს გადაწყვეტილება იქონიებს გავლენას მის ყველა შესაძლო ნაბიჯზე, ყველა შესაძლო ოფიციალური დოკუმენტის გამოყენებასთან დაკავშირებით,”  – განაცხადა თამარ ბერუჩაშვილმა.

სააკაშვილის წინააღმდეგ საქმე მას შემდეგ აღიძრა, რაც მასა პრეზიდენტობის ვადა ამოეწურა და საქართველო დატოვა. მას ბრალდება წარდენილი აქვს სისხლის სამართლის ოთხ საქმეზე: პირადი მიზნებით დიდი ოდენობით საბიუჯეტო თანხების გაფლანგვაზე; გირგვლიანის საქმეზე;  2007 წლის 7 ნოემბერს მომიტინგეთა მასობრივად დარბევაზე, ჯარის უკანონოდ გამოყვანაზე, ტელეკომპანია “იმედში” შეჭრასა და  ამ ტელეკომპანიის მფლობელი ბადრი პატარკაციშვილის კუთვნილი ქონების დანაშაულებრივად ხელში ჩაგდებაზე; ასევე, პარლამენტარ ვალერი გელაშვილზე შეიარაღებული თავდასხმა.

The post თბილისი უკრაინას საპროტესტო ნოტას არ გაუგზავნის appeared first on Democracy & Freedom Watch.

Mikheil Saakashvili meeting with locals in Odessa (Facebook)

საქართველოს ყოფილი პრეზიდენტი, ოდესის ახლადდანიშნული გუბერნატორი მიხეილ სააკაშვილი ამბობს, რომ საქართველოს მოქმედი ხელისუფლება უუნაროა, ქვეყნისთვის საჭირო ნაბიჯები გადადგას და დარწმუნებულია, რომ  ხელისუფლებას სწორედ მისი  პოლიტიკური ძალა ჩაანაცვლებს, რომელსაც, მისივე თქმით, „ალტერნატივა არა ჰყავს“.

ამის შესახებ  მიხეილ სააკაშვილმა ტელეკომპანია „რუსთავი2“-თვის მიცემულ ინტერვიუში ისაუბრა, რომელიც პირადად სააკაშვილის და მისი პოლიტიკური ძალის გავლენის მქონე ტელევიზიად ითვლება.

ინტერვიუ ორნაწილიანია და რამდენიმე დღის ინტერვალით არის ჩაწერილი. ინტერვიუს ძირითადი ნაწილი ჩაწერილია მანამდე, ვიდრე ის  ოდესის გუბერნატორად დაინიშნებოდა და უკრაინის მოქალაქეობას მიიღებდა. მეორე ნაწილი კი უკვე დანიშვნის შემდეგ ოდესაშია ჩაწერილი, სადაც ის  უკვე ოდესაში განსახორციელებელ გეგმებზეც საუბრობს. ეს ნაწილი ჩაწერილია ოდესის ქუჩებში, სადაც სააკაშვილი მოსახლეობას ხვდება. ეს ჟესტი მისთვის დამახასიათებელი იყო ჯერ კიდევ  მაშინ, როდესაც სააკაშვილი საქართველოში მოვიდა ხელისუფლებაში.

ის  ამ ინტერვიუში საკუთარ წარმატებებზე საუბრობს, რაც მისი მმართველობის დროს განხორციელდა და აქცენტს იმაზე აკეთებს, რომ მოქმედ ხელისუფლებას არ შეუძლია ქვეყნისთვის საჭირო  ქმედებების განხორციელება.

ყველაზე მეტი კი მაინც  ყოფილ პრემიერმინისტრზე ისაუბრა და თქვა, რომ ბიძინა ივანიშვილი საკუთარი ბიზნესინტერესებით მოქმედებს  და მას სააკაშვილის შურს, რომელსაც “კომპლექსიანს, უნიჭოსა და ბოღმა ადამიანს“  უწოდებს.

საქართველოში მიმდინარე პროცესების შეფასებისას მიხეილ სააკაშვილმა მძიმე ეკონომიკური ვითარება სწორედ ბიძინა ივანიშვილის „ახირებებს“ დაუკავშირა.

გაიხსენა „ნაციონალური მოძრაობის“  მმართველობის  დროს დაწყებული და „ქართული ოცნების“ ხელისუფლებაში მოსვლის დროს გაჩერებული პროექტები, მათ შორის წყალტუბო, სვანეთი და ლაზიკა.

„ეს პროექტები მოკლეს იმიტომ, რომ ივანიშვილი პირადი ბოღმა აქვს. ასეთია პირადი კომპლექსები, უნიჭო ადამიანის კომპლექსები, ოროსნის კომპლექსები ხუთოსნის მიმართ,“ – აცხადებს მიხეილ სააკაშვილი.

მან  კრიზისიდან გამოსვლის საკუთარ  გეგმაზეც ისაუბრა.

ნაციონალური მოძრაობის დროს შემუშავებული პროექტების ამუშავება, რომელიც ახალმა ხელისუფლებამ გააჩერა, მკვეთრი ანტიკორუფციული ნაბიჯების გადადგმა და სახელმწიფო სისტემის ნეპოტიზმისგან  გაწმენდა, ლარის გაუფასურებით დაზარალებული ხალხის კომპენსირება, – ეს არის ის ნაბიჯები, რომელიც, სააკაშვილის შეფასებით, აუცილებელია იმისთვის, რომ ქვეყანა კრიზისიდან გამოვიდეს.

“ამის კომპენსირება სახელმწიფომ უნდა მოახდინოს და შემდეგ ეს ფული ივანიშვილის მიერ მითვისებულ ფულის ხარჯზე ამოიღოს,” – ამბობს სააკაშვილი.

რაც მთავარია, ექსპრეზიდენტი სასამართლო სისტემის რეფორმირების აუცილებლობას უსვამს ხაზს და ამბობს, რომ ეს საკითხი მისმა ხელისუფლებამ ბოლომდე ვერ მიიყვანა.

„ჩემი აზრით, უზენაესი სასამართლო უნდა დავითხოვოთ და შევცვალოთ ამერიკელი და ინგლისელი მოსამართლეებით, თუნდაც 10-წლიანი ვადით. მივცეთ მაღალი ხელფასი და დავიქირავოთ,“ – განაცხადა სააკაშვილმა.

თუმცა, ის იმაზეც აკეთებს აქცენტს, რომ ამის განხორციელება მოქმედ ხელისუფლებას არ შეუძლია  უუნარობის გამო და ერთად-ერთ გამოსავლად ხელისუფლების მშვიდობიან შცვლას მიიჩნევს. ის ხაზგასმით ამბობს, რომ ხელისუფლება არჩევნებით უნდა შეიცვალოს და დარწმუნებულია, რომ საქართველოს მოქმედი მთავრობის ერთადერთი ალტერნატივა დღეს მხოლოდ „ნაციონალური მოძრაობაა“.

ამასთან, ის იმაზეც საუბრობს, რომ  შესაძლოა, ხელისუფლების შეცვლის აუცილებლობა ვადამდე დადგეს.

ოდესის მოქმედი გუბერნატორი ამბობს, რომ ის მომხრეებს და მხარდმჭერებს არ მიატოვებს და საქართველოსა და უკრაინისთვის ბოლომდე იბრძოლებს.

“მე არასდროს არ მოვიხსნი პასუხისმგებლობას საქართველოს ბედზე. ჩვენ პასუხისმგებლობას არ გავექცევით. საქართველოს და უკრაინის ბრძოლა არის შეთავსებადი. ჩვენ აქ იმიტომ კი არ ჩამოვედითმ რომ საქართველო მივატოვოთ, არამედ იმიტომ ვართ აქ, რომ უკრაინაც და საქართველოც გავათავისუფლოთ,” – ამბობს სააკაშვილი.

The post მიხეილ სააკაშვილი საქართველოს ხელისუფლებას აფასებს და თავის სამომავლო გეგმებზე საუბრობს appeared first on Democracy & Freedom Watch.

პროკურატურაში აცხადებენ, რომ ახლადშექმნილმა საგანგებო განყოფილებამ, რომელიც “ქართული ოცნების” მთავარ წინასაარჩევნო დაპირებაზე, სამართლიანობის აღდგენაზე მუშაობს, წინა მთავრობის დროს მოქალაქეთა ქონების იძულებით ჩამორთმევის ხუთი ფაქტი გახსნა.

განცხადების თანახმად, პროკურატურის ამ განყოფილებამ 1000-მდე საჩივარი განიხილა და 118 სისხლის სამართლის საქმეზე იქნა გამოძიება წარმოებული, რა დროსაც მხილებულ იქნა 5 საჯარო მოხელე, რომლებიც იმდროისთვის დასაქმებული იყვნენ შსს-სა და პროკურატურაში.

„გამოძიებით დადგინდა, რომ 2008-2009 წლებში საქართველოს შს სამინისტროს კონსტიტუციური უსაფრთხოების დეპარტამენტის დასავლეთის რეგიონული მთავარი სამმართველოს უფროსი, იმერეთის უშიშროების უფროსი კონსტანტინე არჩაია, კუდის თანამშრომლების დახმარებით ეწეოდა იმერეთის რეგიონში მოღვაწე ბიზნესმენებისათვის თანხების გამოძალვას, რასაც სისტემატიური ხასიათი ჰქონდა,“ – ნათქვამია განცხადებაში.

პროკურატურის ინფორმაციით, მისი ქმედების გამო დაზარალდნენ:  შპს “ლაგის” დირექტორი, ლაშა კვირიკაძე და შპს “ლუქსის” დირექტორი ზაზა ვაშაკიძე.

„ვინაიდან კუდის ყოფილ მაღალჩინოსანს კონსტანტინე არჩაიას დატოვებული აქვს საქართველოს ტერიტორია, მას დაუსწრებლად წარედგინა ბრალდება სამსახურებრივი უფლებამოსილების გადამეტებისათვის. საქმეზე გრძელდება გამოძიება, დეპარტამენტი სწავლობს იმერეთის რეგიონში მოღვაწე ბიზნესმენთა გამოძალვის სხვა ფაქტებს, სადაც ასევე კონსტანტინე არჩაია ფიგურირებს,“ –  ამბობს პროკურატურა.

გარდა ამისა,  პროკურატურის ინფორმაციით,  გახსნეს მოქალაქეთათვის ქონების იძულებით ჩარმოთმევის სამი ფაქტიც, რასაც ადგილი ჰქონდა პროკურატურასა და შს რაიონულ სამმართველოში. სამივე ამ შემთვევაში, საჯარო მოხელეების დანაშაულებრივ ქმედებას ჰქონდა საერთო ნიშნები, ხასიათი და ხელწერა, ისინი მოქმედებდნენ ქონების იძულებით დათმობისა და ჩარმოთმევის მსგავსი სქემებით, რაც ხორციელდებოდა მათი ზემდგომი თანანმდებობის პირების მითითებით და დანაშაულებრივ კონტროლ ქვეშ.

ახალი დეპარტამენტის მიერ გახსნილი ხუთივე დანაშაულებრივი ფაქტის შედეგად აღდგენილი იქნება 4 დაზარალებულის დარღვეული უფლება. ოთხივე დაზარალებულს, პროკურატურის მიერ მიღებული შემაჯამებელი გადაწყვეტილების საფუძველზე, ეკონომიკისა და მდგრადი განვითარების სამინისტროს მიერ დაუბრუნდებათ ამჟამად სახელმწიფო ბალანსზე რიცხული უკანონოდ ჩარმორთმეული და დათმობილი მანქანები, რომელთაგანც ორი მანქანა ირიცხება პროკურატურის ბალანსზე, ხოლო ორი ავტომანქანა შსს-ს ბალანსზე.

კერძოდ, დაზარალებულ მაგდა ბაგრატიონს და მაია ბოცვაძეს დაუბრუნდებათ “ტოიოტა ლენდ კრუზერი LC150″; ხათუნა საგანელიძეს დაუბრუნდება ა/მანქანა “ტოიოტა ავენსისი 1.8.” და  “ჰიუნდაი სონატა”; ხოლო ლაშა ჭოხონელიძეს ავტომანქანა “ჰიუნდაი IX35″ .

პროკურატურის ამ განცხადებას ხუთშაბათს მთავრობის სხდომაზე პრემიერ-მინისტრი გამოეხმაურა და აღნიშნა, რომ დაზარალებულებისთვის ავტომობილების უკან დაბრუნების საკითხზე მთავრობა დღევანდელ სხდომაზე იმსჯელებს.

„როგორც ვიცი, რამდენიმე ავტომობილის დაბრუნებაზეა საუბარი. რა თქმა უნდა, ეს ვერ შეეხება წინა წლების განმავლობაში წინამორბედი ხელისუფლების დროს დაზარალებულ ყველა ადამიანს, თუმცა პროცესი დაწყებულია და ის მაქსიმალურად უნდა დავაჩქაროთ. სამართლიანობის აღდგენის მიმართულებით ჩვენ, რა თქმა უნდა, უნდა გავაქტიურდეთ და კარგია, რომ პროკურატურაში შექმნილი ახალი დეპარტამენტი აქტიურად მუშაობს,” – განაცხადა ირაკლი ღარიბაშვილმა.

The post პროკურატურამ ქონების წართმევის 5 საქმე გამოიძია appeared first on Democracy & Freedom Watch.

თბილისის პრობაციის ბიუროს უფროსი, რომელიც პარასკევს საღამოს საავადმყოფოში სავარაუდოდ თვითმკვლელობის მცდელობის შედეგად  დაჭრილი გადაიყვანეს, მალევე გარდაიცვალა.

ბესიკ ცხადაძე, თბილისის პრობაციის ბიუროს უფროსი,  საკუთარ სახლში თავის არეში ცეცხლსასროლი იარაღით მძიმედ დაჭრილი თბილისის რესპუბლიკურ საავადმყოფოში გარდაცვალებამდე ცოტა ხნით ადრე გადაიყვანეს.

როგორც რესპუბლიკური საავადმყოფოს რეანიმაციულ განყოფილებასთან შეკრებილმა ბესიკ ცხადაძის ახლობლებმა ჟურნალისტებს უთხრეს, მან იარაღი თავად ისროლა,  თუმცა მათთვის უცნობია, ეს იყო თვითმკვლელობის მცდელობა თუ შემთხვევითი გასროლა.

როგორც  შინაგან საქმეთა სამინისტროში  DFWatch-ს განუცხადეს, გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს. თუმცა, სამინისტროში ჯერჯერობით სხვა დეტალებს არ აკონკრეტებენ. ასევე ჯერჯერობით უცნობია, კონკრეტულად რა იარაღით მოხდა გასროლა.

ამასთან,  ახლობლის ინფორმაციით, რესპუბლიკური საავადმყოფოს რეანიმაციულ განყოფილებაშია მოთავსებული დაჭრილის მეუღლეც, რადგან მომხდარის გამო ის ცუდად გახდა.

The post პრობაციის უფროსის დაღუპვაზე საქმე თვითმკვლელობამდე მიყვანის მუხლით აღიძრა appeared first on Democracy & Freedom Watch.

Davit Usupashvili (IPN)

მმართველი გუნდი საარჩევნო სისტემის ცვლილებას დათანხმდა, მაგრამ ყოფილი პრემიერ-მინისტრის რჩევა გაითვალისწინა და მაჟორიტარული სისტემის გაუქმება, რასაც ყველა დანარჩენი პოლიტიკური ძალა და  არასამთავრობო სექტორი ითხოვს, მომავლისთვის გადადო.

მმართველ კოალიციაში აცხადებენ, რომ არჩევნები 2016 წელს შერეული წესით როგორც პროპორციული, ასევე მაჟორიტარული პრინციპით ჩატარდება. მაჟორიტარულ არჩევნებში შესაძლოა ბარიერად 50% განისაზღვროს. ამასთან, ამბობენ, რომ  მაჟორიტარული ოლქები ახლებურად გაიყოფა, რათა ხმების წონადობა დაცული იქნას.

ეს გადაწყვეტილება „ქართულმა ოცნებამ“ ყოფილ პრემიერ-მინისტრთან, ბიძინა ივანიშვილთან გამართული შეხვედრის შემდეგ მიიღო.

“კარზე მომდგარი არჩევნების წინ რადიკალური ცვლილებები არ არის აუცილებელი,“ ასეთი კომენტარი გაუკეთა მოსალოდნელ ცვლილებებს პარლამენტის თავმჯდომარემ, დავით უსუფაშვილმა.

ეს არგუმენტი ყველა დანარჩენი პოლიტიკური ძალისთვის გაუგებარია, რადგან  მათ შორის არსებობს თანხმობა, რომ არსებული სისტემა უნდა შეიცვალოს.

დღეს მოქმედი კანონმდებლობით, პარლამენტი შედგება 77 პროპორციული და 73 მაჟორიტარული სისტემით არჩეული დეპუტატისგან.

ეს სისტემა მუდმივად დავის საგანს წარმოადგენს. საერთაშორისო ორგანიზაციები  ჯერ კიდევ 1990-იანი წლების ბოლოდან დღემდე იძლევიან იმის რეკომენდაციას, რომ  შეიცვალოს მაჟორიტარების არჩევის წესი, რადგან ამ სისტემით დაცული არ არის ხმათა წონადობის  პრინციპი – ანუ,  მაჟორიტარულ ოლქებში  ამომრჩეველთა რაოდენობა ზოგჯერ რადიკალურად არის განსხვავებული. ამის  მაგალითად ყოველთვის სახელდება  ქუთაისის და  ყაზბეგის საარჩევნო ოლქები, რადგან ქუთაისში 100 ათასზე მეტი ამომრჩეველია და ყაზბეგში მხოლოდ 1500 ამომრჩეველი. არადა ორივე ეს დასახლებული პუნქტი ერთმანდატიან საარჩევნო ოლქს წარმოადგენს და თითო-თითო მაჟორიტარ დეპუტატს ირჩევს.

სწორედ ამიტომ ხელისუფლებას  საერთაშორისო ორგანიზაციები მუდმივად იმის რეკომენდაციას  აძლევენ, რომ საარჩევნო  ოლქები ამომრჩეველთა რაოდენობის პრინციპით შეიქმნას, თუკი ხელისუფლება მაჟორიტარული სისტემის არსებობას საჭიროდ თვლის.  ამას კი ყველა ხელისუფლება შეუძლებლად მიიჩნევს.

თუმცა, ოპოზიცია და  არასამთავრობო ორგანიზაციები  ყველა  ხელისუფლებას  იმას საყვედურობენ, რომ  მაჟორიტარული სისტემა სჭირდებათ საკუთარი გავლენის შესანარჩუნებლად, რადგან სახელისუფლებო ბერკეტის გამოყენება ამ სისტემაში უფრო ადვილია.

დღევანდელი მმართველი გუნდიც და კონკრეტულად ის პირები, ვინც ახლა ხელისუფლების სახეებს წარმოადგენენ,  ოპოზიციაში ყოფნისას სააკაშვილის  ხელისუფლებას მუდმივად  იმას საყვედურობდნენ, რომ  მაჟორიტარული სისტემა არ არის სამართლიანი, არ უწყობს ხელს პარლამენტის, როგორც ინსტიტუციის პოლიტიკურ განვითარებას და ზოგადად ქვეყანაში პოლიტიკური პარტიების განვითარებას აფერხებს. რაც მთავარია,  საყვედურობდნენ იმას, რომ სააკაშვილი ამ სისტემას საკუთარი ძალაუფლების შესანარჩუნებლად იყენებდა.

მაჟორიტარული საარჩევნო სისტემის შეცვლა იყო „ქართული ოცნების“ ერთ-ერთი მთავარი წინასაარჩევნო დაპირება, მაგრამ ხელისუფლებაში მოსვლის შემდეგ ეს დაპირება არათუ არ „გახსენებიათ“, არამედ უარს ამბობენ მის შესრულებაზე.

თუმცა,  მნიშვნელოვანი ის ის არის, რომ  სააკაშვილის გუნდი როდესაც ხელისუფლებაში იყო,  ამ სისტემის გაუქმებაზე უარს ამბობდა, ახლა კი  მაჟორიტარული სისტემის შეცვალას სხვა დანარჩენ ოპოზიციურ პარტიებთან  და  არასამთავრობო სექტორთან ერთად ითხოვენ.

ახალი ხელისუფლების პირობებში  საარჩევნო სისტემის თემა არასაპარლამენტო ოპოზიციის მიერ  დაახლოებით ერთი წლის წინ გააქტიურდა და შემდეგ მათ ჯერ „ნაციონალური მოძრაობა“ შეუერთდა და შემდეგ „თავისუფალი დემოკრატები“, მას შემდეგ, რაც ალასანიას გუნდმა ხელისუფლება დატოვა.

რამდენიმე დღის წინ კი ოპოზიციის ამ მოთხოვნას პრეზიდენტი მარგველაშვილიც შეუერთდა. მანამდე კი ოპოზიციის მემორანდუმს, რომელიც მაჟორიტარული სისტემის გაუქმებას ითვალისწინებს, ხელი პარლამენტის თავმჯდომარემაც მოაწერა. თუმცა, დღეს ისევ მმართველი გუნდის  აზრს იზიარებს.

პრეზიდენტის საპარლამენტო მდივანი, გიორგი კვერენჩხილაძე DFWatch-თან საუბრისას ამბიბს, რომ პრეზიდენტი მიესალმება მმართველი გუნდის თანხმობას სისტემის შეცვლაზე,  მაგრამ გაუგებარია, თუ რატომ არ უნდა განხორციელდეს ეს ცვლილება ახლავე, როდესაც სრული პოლიტიკური სპექტრის თანხმობა არსებობს და რატომ უნდა გადავადდეს კიდევ 5 წლით.

კითხვაზე,  რჩება თუ არა პრეზიდენტი პოლიტიკური სპექტრის გვერდით, კვერენჩხილაძე ამბობს, რომ  „პრეზიდენტმა ყოველწლიური მოხსენებისას დააფიქსირა თავისი პოზიცია, რომ მაჟორიტარული სისტემა უნდა ჩანაცვლდეს და უფრო სამართლიანი სისტემა უნდა იქნას შემოღებული. შესაბამისად, რა თქმა უნდა, პრეზიდენტი თავისი პოზიციის ერთგული რჩება“.

The post მაჟორიტარული სისტემის გაუქმება 5 წლით გადაიდო appeared first on Democracy & Freedom Watch.

Gia Lortkipanidze (Ipn)

უკრაინული მედიის ინფორმაციით, ოდესის ოლქის პოლიციის უფროსად საქართველოს შს მინისტრის ყოფილი მოადგილე გია ლორთქიფანიძე ინიშნება, რომლის სახელიც 2012 წლის აგვისტოში ჩატარებულ, დღემდე ბნელით მოცულ ლაფანყურის სპეცოპერაციას უკავშირდება.
შეგახსენებთ, რომ მანამდე გავრცელდა ცნობები იმის შესახებ, რომ ზურაბ ადეიშვილი ოდესის მთავარ პროკურორად ინიშნებოდა. ეს ცნობები ჯერჯერობით ოფიციალურად დადასტურებული არ არის.
შეგახსენებთ, რომ სააკაშვილმა გუბერნატორად დანიშვნისთანავე დაანონსა, რომ ის საკადრო ცვლილებებსაც გეგმავდა და ოდესაში საკუთარი გუნდის წევრებსაც წაყვანასაც აპირებდა.
გია ლორთქიფანიძე წლების განმავლობაში, შს მინისტრ ვანო მერაბიშვილის მოადგილე იყო, მაგრამ ლაფანყურის სპეცოპერაციამდე მედიის განსაკუთრებული ყურადღების ქვეშ მოქცევისგან თავის არიდებას ახერხებდა. ამ ოპერაციაში კი ერთ-ერთ მთავარ ფიგურად დასახელდა და მოგვიანებით ამის დაეძაბა ურთიერთობა დათა ახალაიასთან.
ყოფილი ხელისუფლების მხრიდან გაჟღერებული ოფიციალური ინფორმაციით, 2012 წლის 28 აგვისტოს შსს-მ თელავის რაიონის სოფელ ლაფანყურთან ე.წ. ანტიტერორისტული ოპერაცია სამიოდე დღით ადრე 5 ახალგაზრდას გატაცების გამო დაიწყო. შსს ირწმუნებოდა, რომ შეიარაღებულმა ჯგუფმა საქართველოს საზღვარი გადმოკვეთა და ახალგაზრდები მძევლებად აიყვანა.

საბოლოოდ, სპეცოპერაციის დროს დაიღუპა შსს-ს ორი თანამშრომელი და სამხედრო ექიმი და შეიარაღებული დაჯგუფების 7 წევრი, მათ შორის საქართველოს ორი მოქალაქე, ეთნიკურად ქისტები.
ამ ოპერაციის ჩატარებისთანავე გაჩნდა კითხვები, რაზეც პასუხი დღემდე არ არის გაცემული, მიუხედავად იმისა, რომ მოქმედი ხელისუფლების ერთ-ერთი მთავარი დაპირება ამ ოპერაციის გამოძიება იყო.

სახალხო დამცველის 2012 წლის ანგარიშის თანახმად, ლოპოტას ხეობაში, სოფელ ლაფანყურთან განვითარებულ მოვლენებში შესაძლოა, შსს-ს ყოფილი მაღალჩინოსნების, მათ შორის გია ლორთქიფანიძის სს პასუხისმგებლობის საკითხი გამოიკვეთოს. მაშინ მან პარლამენტს საგამოძიებო კომისიის შექმნის მოთხვნითაც მიმართა. თუმცა, მაშინ პარლამენტმა კომისიის შექმნაზე უარი თქვა იმ მიზეზით, რომ ამ საქმეს პროკურატურა სწავლობდა.

პროკურატურას კი ეს საქმე ისევ არ დაუსრულებია. შედეგად კითხვები ისევ არსებობს და მათ შორის ამ ოპერაციაში გია ლორთქიფანიძის როლზეც.
გია ლორთქიფანიძე ხელისუფლების შეცვლის შემდეგ პორკურატურაში რამდენჯერმე იყო დაბარებული. პირველად ის 2012 წლის დეკემბერში დაიბარეს, მანამდე რამდენიმე დღით ადრე კი მისი ძმა დააკავეს, რომელიც კუდ-ის კახეთის სამმართველოს უფროსის მოადგილე იყო.
2013 წლის აპრილში კი ლორთქიფანიძეს დაუპირისპირდა დევნილობაში მყოფი დათა ახალაია, კუდ-ის ყოფილი უფროსი. მაშინ დათა ახალაიას სახელით „ფეისბუქში“ მიმართვა გავრცელდა, სადაც ეწერა, თითქოს ლაფანყურის სპეცოპერაცია ვანო მერაბიშვილმა გია ლორთქიფანიძის ხელით განახორციელა ბაჩო ახალაიას წინააღმდეგ.
ამ დროს სახალხო დამცელსა უკვე ჰქონდა განცხადება გაკეთებული ამ ოპერაციაში გია ლორთქიფანიძის როლთან დაკავშირებით.
კონფლიქტოლოგი მამუკა არეშიძე კი, რომელსაც პირადი კონტაქტები გააჩნია კავკასიელ ხალხებთან, ამბობდა, რომ „არ შემიძლია, ვინმეს ხელი დავადო, მაგრამ ამ ბნელით მოცულ ამბავში, რომელიც წინა ხელისუფლების დროს მოხდა, კვლავ ბევრი კითხვაა. ლორთქიფანიძე წარმოშობით ახმეტიდანაა. ის მაშინ შს მინისტრის მოადგილე იყო და ამ მიმართულებას კურირებდა. ისიც კი ვიცი ლორთქიფანიძე ქისტებთან რომ იყო ჩასული და უხსნიდა, მე არანაირი დანაშაული არ მიმიძღვისო, თუმცა არ ვიცი, რამდენად გულწრფელი იყო“.

ამ ყველაფერს კი თავად გია ლორთქიფანიძემ „არასერიოზული“ უწოდა.
„გამოძიებასთან ვთანამშრომლობ, მომავალშიც ვითანამშრომლებ და იმედია, ჭეშმარიტებას სწორედ გამოძიება დაადგენს. მსგავს განცხადებებს უკვე აღარც ვეცნობი. დათა ახალაიას განცხადებას კი, რა თქმა უნდა, არასერიოზულად მივიჩნევ,“, – განაცხადა მაშინ გია ლორთქიფანიძემ მედიასაშუალებებთან.
ამის შემდეგ კი მისადმი ინტერესი განელდა, რადგან არც პროკურატურა აქტიურობდა და აღარც სააკაშვილის გუნდიდან გაკეთებულა რაიმე განცხადებები.
ოდესაში მისი შესაძლო დანიშვნის შესახებ გავრცელებული ინფორმაციის შემდეგ კი ქართულმა საექსპერტო წრეებმა მისი ლაფანყურთან დაკავშირებული ისტორია და ახალაიებთან უთანხმოება გაიხსენეს. თუმცა, ჯერჯერობით ოფიციალურ კომენტარს არავინ აკეთებს.
.

The post უკრაინული მედია: მერაბიშვილის ყოფილ მოადგილეს ოდესის პოლიციის უფროსად ნიშნავენ appeared first on Democracy & Freedom Watch.

პოპულარული მუსიკალური ფესტივალი “რესპუბლიკა კაზანტიპი”, რომელიც გასულ წელს რუსეთის მიერ ყირიმის ანექსიის გამო საქართველოში ჩატარდა, წელს კვლავ ყირიმში ბრუნდება, თუმცა განსხვავებული სახელით. ანაკლიაში კი ალტერნატიული ფესტივალი ჩატარდება.

“კაზანტიპი” წელს სამხრეთ-აღმოსავლეთ აზიურ კამბოჯაში უნდა გამართულიყო, მაგრამ ჩაიშალა. ლენტა.რუ კაზანტიპის რესპუბლიკის პრეზიდენტის, ნიკიტა მარშუნოკის ციტატას აქვეყნებს, რომელიც წერს, რომ ფესტივალი პოპოვკაში (ყირიმი) დაბრუნდება და 31 ივლისიდან 16 აგვისტომდე გაიმართება. ფესტივალს სახელი შეეცვლება და ერქმევა  Befooz.

“დიახ, ფესტივალი ჩატარდება, მიუხედავად ამინდისა,” – წერს მარშუნოკი სოციალურ ქსელში და ამატებს, რომ ფესტივალის მასშტაბი და ტერიტორიის სიდიდე დამოკიდებულია აპლიკანტების რაოდენობაზე, ვისაც სურს, რომ ფესტივალში მიიღოს მონაწილეობა. მარშუნოკი დეტალებზე არ საუბრობს და ამბობს, რომ მხოლოდ ისინი შეძლებენ დეტალების გაცნობას, ვინც საიტზე მონაწილეობის მისაღებად დარეგისტრირდება.

წლების განმავლობაში “კაზანტიპი” ყირიმში ტარდებოდა. უკრაინელებთან ერთად სტუმრების საკმაოდ დიდ ნაწილს რუსეთის მოქალაქეები შეადგენდნენ. კონფლიქტის შემდეგ ფესტივალი ანაკლიაში გადაიტანეს. ჩატარებამდე და ფესტივალის დაწყებისას კონსერვატულმა ჯგუფებმა არაერთი აქცია გამართეს მის წინააღმდეგ. საბოლოოდ, ფესტივალმა ვერ გაამართლა მოლოდინი, რადგანაც 50,000-ის ნაცვლად 10,000-მდე სტუმარი ჩამოვიდა.

ამიტომაც ორგანიზატორებმა გადაწყვიტეს, 2015 წელს ფესტივალი კამბოჯაში გადაეტანათ, თუმცა ორი კვირით ადრე ფესტივალი გაუქმდა. კამბოჯის მთავრობამ თავისი უარი “უხამსი” სტუმრების ჩამოსვლის ალბათობით ახსნა.

“ჩვენ არ შეგვიძლია, გავლენა მოვახდინოთ უცხო ქვეყნის უცნაურ  მთავრობაზე, რომელმაც მოახერხა ის, რომ  ათი დღის განმავლობაში 5-ჯერ დართო კაზანტიპის ჩატარების ნებართვა და 6-ჯერ აკრძალა,” წერენ კაზანტიპის ოფიციალურ ვებ-გვერდზე.

ანაკლიაში კი “კაზანტიპის” ნაცვლად GEM Fest დაიგეგმა (ქართული ელექტრონული მუსიკის ფესტივალი). ის 30 ივლისიდან 7 აგვისტომდე გასტანს. ამ ფესტივალს საქართველოს მთავრობა უჭერს მხარს, ინიციატივა კი ტურიზმის სააგენტოს ყოფლი თავმჯდომარეს, გიორგი სიგუას ეკუთვნის.

The post “კაზანტიპი” ყირიმში ბრუნდება, ანაკლიაში ქართული ელ-მუსიკის ფესტივალი ჩატარდება appeared first on Democracy & Freedom Watch.

Nodar Khaduri (IPN)

მიუხედავად იმისა, რომ უკვე ამოიწურა  სახელმწიფო ბიუჯეტის კორექტირებული პროექტის წარდგენის ვადა, რომელიც ერთი კვირის წინ პრემიერმა ფინანსთა მინისტრს განუსაზღვრა, ისევ უცნობია, სეკვესტრი როგორი იქნება.

სეკვესტრირებული ბიუჯეტის პროექტის წარდგენისთვის ფინანსთა მინისტრს საბოლოო ვადა 10 ივნისამდე ჰქონდა.  ერთი კვირის წინ პრემიერმა ნოდარ ხადურს, ფინანსთა მინისტრს, დაავალა, რომ 1 კვირაში უწყებებთან კონსულტაციები გაემართა და პროექტი 10 ივნისს მზად ყოფილიყო.

ერთი კვირის წინ ნოდარ ხადურმა განაცხადა, რომ ამ დავალებას დაგეგმილ ვადაში შეასრულებდა, მაგრამ ხუთშაბათს ცნობილი გახდა, რომ პროექტის წარდგენის ვადამ  ისევ ერთი კვირით გადაიწია.  შესაბამისად უცნობია, რამდენით შემცირდება სახელმწიფო ბიუჯეტი და ასევე ეს შემცირება როგორ გადანაწილდება უწყებების მიხედვით.

ფინანსთა მინისტრის განმარტებით,  გათვალისწინებულია, რომ ეკონომიკური ზრდა, ნაცვლად 5%-ისა იქნება 2%, ხოლო ინფლაცია – 3%.

შეგახსენებთ, რომ საერთაშორისო საფინანსო ინსტიტუტები – საერთაშორისო სავალუტო ფონდი და მსოფლიო ბანკი – გასული წლის მიწურულს 2015 წელს საქართველოს ეკონომიკის 5%-იან ზრდას პროგნოზირებდნენ, თუმცა ორივე ამ ორგანიზაციამ პროგნოზი 5%-მდე შაემცირა.

„ერთი რამ, რაც დღეს ნამდვილად გადაწყვეტილია, სახაზინო ვალდებულების ემისია შემცირდება 100 მილიონი ლარით. ჩვენ მივიღეთ დავალება, რომ გავაგრძელოთ კონსულტაციები მინისტრებთან და მომავალ კვირაში წარმოვადგინოთ უკვე დაზუსტებული მონაცემები, თუ რომელ სამინისტროს რა მიმართულებით ექნება ან ეკონომია, ან პირიქით, შესაძლოა გაზრდაც,“ – განაცხადა ნოდარ ხადურმა ხუთშაბათს მთავრობის სხდომის შემდეგ, რომელიც დახურული ფორმატით გაიმართა და უცნობია, მთავრობის წევრებმა ბიუჯეტის შემცირებასთან დაკავშირებით რა თქვეს.

ჯერჯერობით  ისევ უცნობია, თუ რა მიმართულებით შევიდა კორექტირება მთავარ საფინანსო დოკუმენტში, თუმცა ცნობილია, რომ  ხარჯების შემცირება ინფრასტრუქტურულ და სოციალურ მიმართულებებს არ შეეხება და ის ძირითადად ადმინისტრაციულ ხარჯებზე აისახება.

მინისტრების ნაწილს კი სამინისტროს ბიუჯეტის შემცირებაზე გადაწყვეტილების მიღება უჭირს. მიზეზად უწყებისთვის ბიუჯეტიდან გამოყოფილი მცირე თანხები სახელდება.

ეკონომიკური ექსპერტები კი მთავრობას ურჩევენ, მხოლოდ ადმინისტრაციული ხარჯები არ შეამციროს და ყველა პროექტს თანაბრად გადხედოს.

ისინი ამბობენ, რომ ამ მიდგომით საბიუჯეტო სტაბილურობა მეტ-ნაკლებად დაცული იქნება და ლარის გაუფასურების შეჩერებასაც შეუწყობს ხელს.

ბიუჯეტის კორექტირებული ვარიანტი პარლამენტში სავარაუდოდ, თვის ბოლოს შევა. იქამდე კი დოკუმენტის საბოლოო ვერსია მთავრობამ უნდა დაამტკიცოს.

The post 2015-ში ეკონომიკური ზრდა 2% იქნება, ინფლაცია 3% appeared first on Democracy & Freedom Watch.

Tina Khidasheli (Interpressnews)

თავდაცვის მინისტრი თინა ხიდაშელი თავისი ორი წინამორბედის დავაში, რომელიც საფრანგეთთან საჰაერო თავდაცვითი სისტემების შესახებ ხელშეკრულების დადებას უკავშირდება, ირაკლი ალასანიას საწინააღმდეგო პოზიციას იკავებს და ამ ხელშეკრულების გაფორმებას მთლიანად მინდია ჯანელიძის დამსახურებად მიიჩნევს.

ამის შესახებ  განცხადება თინა ხიდაშელმა ტელეკომპანია „მაესტროსთან“ ინტერვიუში გააკეთა და თქვა, რომ „საფრანგეთთან საჰაერო თავდაცვითი სისტემების შესახებ ხელშეკრულება ხელშეკრულებას დაემსგავსა მინდია ჯანელიძის მინისტრობის დროს, მანამდე იყო სურვილების კრებული.“

მისივე განმარტებით, ხელშეკრულების დახვეწაზე მუშაობა ამ დრომდე გრძელდება და მას ხელი სავარაუდოდ ივნისის ბოლოს მოეწერება.

პარასკევს თინა ხიდაშელი გაემგზავრა პარიზში, სადაც ფრანგ კოლეგას, ჟან-ივ ლე დრიანსა და საფრანგეთის სამხედრო-სამრეწველო კომპანიების იმ წარმომადგენლებს შეხვდება, რომელთანაც საქართველო თანამშრომლობას აპირებს. საფრანგეთიდან კი მინისტრი შვეიცარიასა და ავსტრიაში გადაფრინდება, სადაც, თავდაცვის სამინისტროს ცნობით, საერთაშორისო ფორუმებში უნდა მიიღოს მონაწილეობა.

„არ არის ეს დოკუმენტი სკანდალური. არანაირად არ არის. არის მცდელობა იმის, რომ ის გახადონ ჩემთვის სრულიად გაუგებარ ამბად, მაგრამ ყველაფერი ძალიან მარტივადაა ამ დოკუმენტთან მიმართებაში. მისი დახვეწის დასრულების პროცესი მიმდინარეობს ძალიან მაღალი ტემპით და ვფიქრობ, რომ ივნისის ბოლოს მოხდება ხელმოწერა.

„სწორედ მინდია ჯანელიძის დროს დაიწყო ამ ხელშეკრულების სამართლებრივ და ფინანსურ მხარეზე მუშაობა და ეს პროცესი ჩვენ გავაგრძელეთ. ვფიქრობ, ძალიან მნიშვნელოვანი და პრინციპულია, როცა ქვეყანა ასეთი ტიპის ფინანსურ ვალდებულებას იღებს, იქ ჩვენი ინტერესები მაქსიმალურად იყოს გათვალისწინებული. ამ მხრივ ძალიან ბევრი მუშაობა მოგვიწევს,” – განაცხადა ხიდაშელმა.

რაც შეეხება შეკითხვას, აპირებს თუ არა იმ სატელეფონო საუბრის დეტალების გარკვევას, რომელზეც თავდაცვის ყოფილმა მინისტრმა ირაკლი ალასანიამ ისაუბრა, მისი განცხადებით, ამის აუცილებლობას ვერ ხედავს, რადგან ხელშეკრულება, როგორც ფაქტი, ხელთა აქვს.

„მინდია ჯანელიძის დროს, ხაზგასმით და სრული პასუხისმგებლობით ვამბობ, რომ ამ ხელშეკრულებაზე მუშაობა გაცილებით უფრო სერიოზულად მიდიოდა, ვიდრე მანამდე. ხელშეკრულება ხელშეკრულებას დაემსგავსა სწორედ მინდია ჯანელიძის დროს, მანამდე ეს იყო კეთილი სურვილების კრებული,“ – ამბობს ხიდაშელი.

ალასანიას გუნდის წარმომადგენელი, ალექსი პეტრიაშვილი, რომელიც  სახელმწიფო მინისტრი იყო ევროინტეგრაციის საკითხებში და თანამდებობა შარშან ოქტომბერში  ალასანიასთან ერთად დატოვა, DFWatch-თან თინა ხიდაშელის საპასუხოდ ამბობს, რომ  „თინა თუ გააკეთილშობილებს მინდიას, თორემ იმის თქმა, რომ ეს შეთანხმება მინდიამ რამე სახეს დაამგვანაო, ცოტა რთული სათქმელია.

„მთავარი პარამეტრები, როგორც ტექნიკური, ისე ფინანსური, შეთანხმებული იყო ირაკლი ალასანიას მინისტრობის დროს და ის იყო ყველაზე მთავარი, რომ პოლიტიკური შეთანხმება უმაღლეს დონეზე იყო მიღწეული. გარდა ამისა, იმ ეტაპისთვის, რაც საჭირო იყო, გავლილი იყო ყველა დონეზე და საქმის კურსში იყო და ჩართული იყო, როგორც ფინანსთა მინისტრი, ასევე პარლამენტის თავმჯდომარე და პრემიერ-მინისტრი,“ – ამბობს პეტრიაშვილი.

თავდაცვის მოქმედი მინისტრის მიერ გაკეთებული განცხადება ალასანიას გუნდისთვის აღიქმება თავის მოწონების მცდელობად ბიძინა ივანიშვილისთვის, რომელიც დღმედე  ითვლება პოლიტიკური გადაწყვეტილების მიმღებად მიუხედავად იმისა, რომ მას ხელისუფლებაში არანაირი თანამდებობა არ უკავია.

„ეს არის მიმართული იქითკენ, რომ თინამ გაამართლოს ბიძინას იმედები. სახელისუფლებო ვერტიკალი გადასულია სრულ შეტევაზე, ხან თეა, ხან თინა და მათ ეს ამოცანები დაუსახა ბიძინამ და შესაბაბმისად, ისინი თავის ერთგულებას ბიძინას ალასანიაზე შეტევის მიტანით უმტკიცებენ,“ – ამბობს  ალექსი პეტრიაშვილი.

ირაკლი ალასანიამ შარშან ოქტომბერში გააკეთა განცხადება, რომ მაშინ, როდესაც ის საფრნაგეთში იმყოფებოდა საფაერო თავდაცვითი სისტემების შეძენაზე ფრანგულ მხარესთან ხელმოწერის გასაფორმებლად, მას  დაურეკა მინიდა ჯანელიძემ, რომელიც იმ დროს  პრემიერ-მონისტრის დაქვემდებარებული ორგანოს – კრიზისების მართვის საბჭოს – ხელმძღვანელობდა და პრემიერ-მინისტრის სახელით უთხრა, რონ ამ ხელშეკრულებისთვის ხელი არ მოეწერა.

ალასანია ამბობს, რომ ამაზე უარი თქვა და შეთანხმებას ხელი მაინც მოაწერა, რასაც მასზე ზეწოლის მიზნით კორუფციის ბრალდებით თავდაცვის სამინისტროს მაღალჩინოსნების დაკავება მოჰყვა. ამის შემდეგ ალასანია  თავისი გუნდით ოპოზიციაში წავიდა და მის ადგილზე თავდაცვის მინისტრად დაინიშნა მინდია ჯანელიძე, რომელსაც ალასანია თვეების განმავლობაში საფფრანგეთთან ხელშეკრულების ფაქტობრივ ბლოკირებაში ადანაშაულებდა.

The post ხიდაშელი: საფრანგეთთან იარაღის მოწოდებაზე კონტრაქტი სავარაუდოდ თვის ბოლოს გაფორმდება appeared first on Democracy & Freedom Watch.

თბილისში მომხდარი სტიქიის შედეგად დაღუპულთა რიცხვი 13-მდე გაიზარდა.

ამის შესახებ განცხადება  შსს-ს საგანგებო სიტუაციების მართვის სააგენტომ გაავრცელა.

როგორც უწყების ხელმძღვანელმა, ზვიად ქაწაშვილმა, ჟურნალისტებს განუცხადა, ბოლო მონაცემებით, კიდევ ერთი მიცვალებული მაშველებმა დაახლოებით ერთი საათის წინ იპოვეს.

“მე-13-ე გარდაცვლილის ცხედარია ნანახი. ამ წუთისთვის შემიძლია, გაცნობოთ, რომ მიმდინარეობს 9 პირის ძებნითი სამუშაოები,“ –  განაცხადა ზვიად ქაწაშვილმა.

დღეს დილამდე კეთდებოდა განცხადება 24 დაკარგულ ადამიანზე და, როგორც ზვიად ქაწაშვილი ამბობს, 14 მათგანი ცოცხალი გამოჩნდა. დანარჩენი 10-დან კი 1  ცოტა ხნის წინ გარდაცვლილი იპოვეს.

მეცამეტე გარდაცვლილი მწერალი გურამ პეტრიაშვილია, რომელიც ჯერ კიდევ საქართველოს პირველი პრეზიდენტის, ზვიად გამსახურდიას  თანამებრძოლი იყო. ის მაშინდელ ხელისუფლებაშიც იყო. მას შემდეგ კი, რაც ზვიად გამსახურდიას მაშინდელი  ოპოზიცია დაუპირისპირდა და სამხედრო გადატრიალება მოხდა, მან საქართველო დატოვა და ქვეყანაში  რამდენიმე წლის წინ დაბრუნდა.

სტიქიის დროს მისი დაკარგვის შესახებ ინფორმაცია კვირასვე გავრცელდა. ის გარდაცვლილი მისი საცხოვრებელი სახლის დაშლის შემდეგ იპოვეს.

შსს-ს საგანგებო სიტუაციების მართვის სააგენტოს ხელმძღვანელის თქმით, შინაგან საქმეთა სამინისტროს ყველა დანაყოფი მობილიზებულია და მუშაობას აგრძელებს. სამუშაოებში ჩართულია როგორც საგანგებო სიტუაციების მართვის სააგენტო, ასევე შინაგან საქმეთა სამინისტროს ყველა დანაყოფი.

The post 13 გარდაცვლილი და 9 დაკარგული – სტიქიის შედეგების ბოლო მონაცემები appeared first on Democracy & Freedom Watch.