(Police.ge)

ტერორისტულ ორგანიზაცია “ისლამურ სახელმწიფოში” გაწევრიანებისა და  სირიაში საბრძოლველად  საქართველოს მოქალაქეების გადაბირების ბრალდებით კახეთსა და თბილისში 4 ადამიანი დააკავეს.  ერთ-ერთი მათგანი – პანკისის მკვიდრი, 9 შვილის მამა აიუფ (გაიოზ) ბორჩაშვილი – ეჭვმიტანილია იმაში, რომ საქართველოში „ისლამური სახელმწიფოს“ წარმომადგენელია.

ამის შესახებ ინფორმაციას შსს ავრცელებს, სადაც საუბარია კვირა საღამოს პანკისში ჩატარებულ სპეცოპერაციაზე.

შსს-ს ინფორმაციით, სპეცოპერაცია საგამოძიებო და ოპერატიული ღონისძიებების საფუძველზე ჩატარდა.

36 წლის აიუფ ბორჩაშვილი სოფელ გომბორის მახლობლად დააკავეს, სხვები კი თბილისში. შსს მხოლო მათ ინიციალებს ასაჯაროებს. მათი ასაკი 24-დან 18 წლამდე მერყეობს.

მათ ბრალად ედებათ “ტერორისტულ ორგანიზაციაში გაწევრებისათვის გადაბირება, უცხო ქვეყნის ტერორისტულ ორგანიზაციაში გაერთიანება და ტერორისტულ საქმიანობაში დახმარება.”

შსს-ს ინფორმაციით,  გამოძიებამ დაადგინა, რომ აიუფ ბორჩაშვილი არის სირია-ერაყის ტერიტორიაზე მოქმედი ტერორისტული ორგანიზაცია „ისლამური სახელმწიფოს“ წარმომადგენელი საქართველოში. ის  ტერორისტულ ორგანიზაციაში გაწევრიანების მიზნით მოქალაქეების გადაბირებას ახდენდა და შემდგომში საომარ მოქმედებებში მონაწილეობის მისაღებად, მათ სირიაში გამგზავრებას უზრუნველყოფდა.

„დადგინდა, რომ აიუფ ბორჩაშვილმა, თავისი თანამზრახველების დახმარებით, სხვადასხვა რელიგიური ლიტერატურის, ინტერნეტ-საიტების და სოციალურ ქსელში არსებული ჯგუფების გამოყენებით გადაიბირა პანკისის ხეობაში მცხოვრები არასრულწლოვან(ებ)ი, მუსლიმ კუშტანაშვილი და რამზან ბაღაკაშვილი,“ – ნათქვამია შსს-ს განცხადებაში.

ამავე ინფორმაციის თანახმად,  ეს პირები 2015 წლის 2 აპრილს თბილისის საერთაშორისო აეროპორტიდან სტამბულში გაემგზავრნენ. თურქეთში მათ აიუფ ბორჩაშვილის თანამზრახველები დახვდნენ და მათი დახმარებით მუსლიმ კუშტანაშვილი და რამზან ბაღაკაშვილი სირიაში, „ისლამური სახელმწიფოს“ რიგებში საბრძოლველად გადავიდნენ.

„გამოძიებით ასევე დადგინდა, რომ აიუფ ბორჩაშვილმა და მისმა თანამზარხველებმა მოახდინეს იდეოლოგიური ზემოქმედება საქართველოს სხვა მოქალაქეებზე, რომლებიც (ისლამის რადიკალური მიმდინარეობა) ვაჰაბიზმის მიმდევრები გახდნენ,“  – ნათქვამია განცხადებაში.

დანარჩენი სამი პირი კი მაშინ დააკავეს, როდესაც ისინი ქვეყნის დატოვებას აპირებდნენ.

შსს-ს ინფორმაციით, სამართალდამცველებმა თბილისში გიორგი კ. დააკავეს, რომელსაც თურქეთის მიმართულებით ავიაბილეთები ჰქონდა შეძენილი და აიუფ ბორჩაშვილის დახმარებითა და ორგანიზებით სირიაში გადასასვლელად ემზადებოდა. შსს-ს კონტრტერორისტული ცენტრის თანამშრომლებმა თბილისის საერთაშორისო აეროპორტში, სასაზღვრო კონტროლის გავლის დროს, ასევე,  დააკავეს გიორგი ხ. და დავით ფ..

ისინი აიუფ ბორჩაშვილის ორგანიზებით თურქეთის მიმართულებით მიემგზავრებოდნენ, საიდანაც სირიაში, საომარ მოქმედებებში მონაწილეობის მისაღებად აპირებდნენ გადასვლას, ნათქვამია განცხადებაში.

კვირას პანკისში ჩატარებული სპეცოპერაციის დროს ბორჩაშვილთან ერთად  კიდევ რამდენიმე პანკისელი დააკავეს, მათ შორის იყვნენ თარხან ბათირაშვილის ნათესავები,  რომელიც სირიაში “ისლამური სახელმწიფოს” სამხედრო მეთაურია და იბრძვის სახმედრო ფსევდონიმით აბუ ომარ ალ-შიშანი (“შიშანი” არაბულად ნიშნავს “ჩეჩენს”).  დაკითხეს მისი მეგობრებიც.

თუმცა, პანკისში დაკავებულები, ბორჩაშვილის გარდა, უკვე გაათავისუფლეს. ბორჩაშვილს კი ბრალს ხვალ წაუყენებენ.

როგორც მისი ადვოკატი გელა ნიკოლაიშვილი ამბობს, მისი დაცვის ქვეშ მყოფს ბრალი ჯერ არ წარდგენია, თუმცა მას დაკავების დროს განუმარტეს, რომ ისლამურ სახელმწიფოსთან კავშირიშია ბრალდებული.

არაოფიციალური მონაცემებით, სირიაში საბრძოლველად 30-ზე მეტი ადამიანია წასული. თუმცა, იმის გამო, რომ საზღვარს ისინი სხვა მიზეზით  კვეთენ და წასვლის რეალური მიზეზი უცნობია, დაზუსტებული ოფიციალური მონაცემები არ არსებობს სირიაში საქართველოდან წასულ მებრძოლთა რაოდენობის შესახებ.

ბოლო პერიოდში პანკისიდან რამდენიმე არასრულწლოვანი და კიდევ რამდენიმე სრულწლოვანი სირიაში საბრძოლველად ჩუმად წავიდა და მათი წასვლის შემდეგ გახდა ცნობილი, რომ ისინი სირიაში იყვნენ საბრძოლველად წასულები. ამის გამო კი ადგილობრივმა მოსახლეობამ ხელისუფლებას დახმარება სთხოვა, რის გამოც გამკაცრდა კანონმდებლობა და  დაიწყო მონიტორინგის განხორციელება.

დაუზუსტებელი ცნობებით, სულ მცირე, საქართველოს 12 მოქალაქეა დაღუპული სირიის ომში.

The post შსს აცხადებს, რომ “ისლამური სახელმწიფოს” ემისარი დააკავა appeared first on Democracy & Freedom Watch.

(Facebook)

თბილისში მომხდარი სტიქიის გამომწვევ მიზეზებად  სხვადასხვა  ფაქტორები  სასხელდება და, შეიძლება ითქვას, რომ ეს მიზეზები  პოლიტიკური მხარდაჭერის მიხედვით ჯგუფდება. სტიქიის შდეგებს  ნაწილი სააკაშვილის ხელისუფლების დროს განხორციელებულ პროექტს აბრალებს, ნაწილი კი მიიჩნევს, რომ ეს პროექტი არაფერ შუაშია.

სტიქიის განვითარების სურათი

გარემოს დაცვის სამინისტრომ უკვე გამოაქვეყნა სტიქიის განვითარების სურათი, რომელიც კომპიუტერული პროგრამების მეშვეობით არის გაკეთებული და სამინისტროში განმარტავენ, რომ მომხდარის რეალური სურათის იდენტურია.

ამ გრაფიკის თანახმად, სტიქია თბილისის სამხრეთით მეწყერის ჩამოწოლით დაიწყო.

მდინარე ვერეს მარჯვენა ფერდობზე, სოფელ ახალდაბის მიმდებარე ტერიტორიაზე, წყნეთი-ბეთანიის საავტომობილო გზაზე ადგილი ჰქონდა კლდეზვავური ტიპის მეწყრული პროცესების განვითარებას.

კერძოდ, მოწყდა დაახლოებით მიწის მილიონი კუბური მეტრი, რამაც განაპირობა ღვარცოფული ნაკადის წარმოქნა. ამ ნაკადმა მდინარე ვერეს ხეობა დროებით ჩაკეტა.

ყოველივეს წინ უძღოდა უხვი ატმოსფერული ნალექების მოსვლა სეტყვისა და წვიმის სახით.

შექმნილი ხანმოკლე წყალშეგუბების გარღვევას მოჰყვა მდინარე ვერეს ხეობაში წყლის დონის აწევა, ღვაროცოფული ნაკადის გავლა და ცალკეული ადგილების დატბორვა.

სტიქიის ხელისშემწყობი ფაქტორები

სტიქიის გამომწვევ მიზეზებზე  საუბრისას  სპეციალისტები ორი რიგის საკითხებს გამოყოფენ –  ბუნებრივ და ურბანულ-კონსტრუქციულ ფაქტორებს.

სპეციალისტები თანხმდებიან, რომ სტიქიის გამომწვევი მთავარი ფაქტორი ძლიერი წვიმა იყო, რომელიც რამდენიმე საათის განმავლობაში გრძელდებოდა. თუმცა, მეტეოროლოგები იმასაც ამბობენ, რომ  სხვა დროს ამაზე მეტი ნალექიც მოსულა, თუმცა ასეთი დამანგრეველი  შედეგი არ ჰქონია.

ჰიდრომეტეოროლოგიური პროგნოზების სამმართველოს უფროსი და სინოპტიკოსი სვეტლანა ნიორაძე მეტი თვალსაჩინოებისათვის კონკრეტულ მონაცემებს ასახელებს. მისი ინფორმაციით, 14 ივნისს სამი საათის განმავლობაში 49 მილიმეტრი ნალექი მოვიდა, მაშინ როცა მაგალითად, 4 ივნისსაც ასევე ძლიერი წვიმა იყო – ერთ საათში 48 მილიმეტრი მოვიდა, 2012 წელს 3 საათში – 93 მილიმეტრი,  2011 წელს სამ საათში მოსული ნალექის რაოდენობა 78 მილიმეტრს გაუტოლდა. უფრო შორს, 1972 წელს  დღე-ღამეში 130 მილიმეტრიც კი დაფიქსირდა, უთხრა ნიორაძემ “რეზონანსს”.

თუმცა მაშინ შედეგები ასეთი მძიმე არ ყოფილა. შესაბამისად, სფეროს სპეციალისტები განმარტავენ, რომ ძალიან ძლიერ წვიმას სხვა ხელშემწყობი ფაქტორები რომ არ დართვოდა, სტიქია ნაკლებად დამანგრეველი იქნებოდა.

მეორე ფაქტორად უკვე მეწყერი სახელდება, რომელმაც სტიქიის მასშტაბებში გადამწყვეტი როლი ითამაშა.

“ყველაფერი იმან გაართულა, რომ ძალიან დიდი მოცულობის მეწყერი ჩამოწვა, რომელმაც მდინარე ვერეს ხეობა ჩაკეტა. მდინარე დაგუბდა და რეალურად ეს დრამატული შედეგი არა წვიმამ მოიტანა, არამედ უზარმაზარმა ღვარცოფმა, რომელიც მეწყერმა გამოიწვია,” – ამბობს კავკასიის გარემოსდაცვითი ორგანიზაციების ქსელის (CENN) პროექტის კოორდინატორი,  რეზო გეთიაშვილი.

ინფრასტრუქტურის როლი  სტიქიის განვითარებაში

ზემოთ დასახელებული მიზეზები სტიქიურ მიზეზებად ითვლება. კამათი კი უკვე ამის შემდეგ განვითარებულ მოვლენებთან დაკავშირებით მიდის, რადგან სპეციალისტების ნაწილი მიიჩნევს, რომ შედეგების მასშტაბურობა სტიქიის ზონაში აგებულმა ინფრასტრუქტურამ განაპირობა და ამაში პირდაპირ სააკაშვილის გუნდს  ადანაშაულებენ, რადგან მისი ინიციატივით აშენდა.

მეორე ნაწილი კი ამ მოსაზრებას არ იზიარებს. უფრო მეტიც, რიგ შემთხვევებში იმასაც კი ამბობენ, ეს ინფრასტრუქტურა რომ არ ყოფილიყო, შედეგები უფრო დამანგრეველი იქნებოდა.

აზრთა სხვადასხვაობაა როგორც გეოლოგებს, ასევე არქიტექტორებს შორის.

„საქართველოს მწვანეთა მოძრაობის“ ხელმძღვანელი, ნინო ჩხობაძე DFWatch-თან საუბრისას ამბობს, რომ თავის დროზე გმირთა მოედანზე ესტაკადის მშენებლობის დროს არ მომხდარა გარემოზე ზემოქმედების შეფასება და მშენებლობა დაიწყო მანამდე, ვიდრე შესწავლა დასრულდებოდა.

“თავის დროზე, როდესაც ესტაკადა შენდებოდა, ჩვენ ვამბობდით და დღესაც ვიმეორებთ, რომ სწორად არ იყო გათვლილი ყველაფერი. ეს რისკი უნდა ყოფილიყო მოდელირებული, რაც სამწუხაროდ არ მოხდა. მაშინ ძალიან გვეჩქარებოდა მშენებლობა და საზოგადოებამაც ვერ შევძელით ბოლომდე გაგვეტანა ჩვენი სიტყვა,” – აღნიშნა ჩხობაძემ.

ის ამბობს, რომ მაშინაც ამბობდა, „მდინარის ხარჯი არის მაღალი და ვერ გაატარებდა ეს მილები წყლის მოცულობას და ვერც გაატარა. მოხდა ამხელა ტრაგედია”.

რეზო გეთიაშვილი ამ ტერიტორიის ვერტმფრენიდან გადაღებული ფოტოების ანალიზის საფუძველზე “რეზონანსთან” ამბობს, რომ, „როგორც ჩანს, მდინარის ჩაკეტვა მეწყერით  არ მომხადარა, იმიტომ, რომ, სადაც მეწყერი ჩამოწვა მდინარესთან ცოცხლად არის მწვანე საფარი, რაც ცალსახად მიუთითებს იმას, რომ მეწყერი ბოლომდე რომ ჩამოსულიყო, ამოევსო  მდინარე  და ჩაეკეტა, ბუნებრივია სულ წაიღებდა ხეებს ბალახას, ბუჩქებს“.

„გამოდის, რომ საქმე გვაქვს  უფრო შეტბორვასთან, რაც ნიშნავს იმას, რომ მოვიდა ძალიან დიდი რაოდენობის ნალექი და ვერ მოხდა წყლის მასის გატარება, რომლის გამტარობაც ისედაც ძალიან შემცირებული იყო 2011 წლიდან. რა თქმა უნდა მეწყერს ჰქონდა თავისი უარყოფით ზეგავლენა ამ პროცესზე, მაგრამ  ეს ტრაგედია უფრო ჰიდროლოგიურ მოვლენასთან შეიძლება დავაკავშიროთ. ძალიან დიდი რაოდენობის წყლის ნაკადი იყო, რომელსაც ღვარცოფული მასა მოჰყვა, რომლის გასატარებლად ინფრასტრუქტურა მზად არ აღმოჩნდა,“ – ამბობს გეთიაშვილი.

ინფრასტრუქტურას აბრალებს არქიტექტორთა ერთი ნაწილიც.

„აქ არის ორი საკითხი, რა ამოცანა იყო დასმული და რა გზებით მოინდომეს ამის გადაწყვეტა. ამან განაპირობა ყველაფერი. რა თქმა უნდა, ყველაფერი არასწორად გაკეთდა და ამან განაპირობა ეს ტრაგედია. ამოცანა იყო დასმული, რომ ჩქაროსნული მაგისტრალი გაკეთებულიყო. ჩქაროსნული მაგისტრალი კი რაც შეიძლება სწორახაზოვანი გზის დაგებას მოითხოვს.  ამან კი მდინარის  კალაპოტის შეცვლა და გვირაბებში ჩასმა გამოიწვია. ამან განაპირობა კლდეების ჭრა და ეროზიული მონაკვეთების მორეცხვა. მდინარემ კი გასცა პასუხი. წყალი და განსაკუთრებით მთის მდინარე  ყოველთვის იბრძვის იმის წინააღმდეგ, თუ გზა გაუღობე. ამაშია მთელი ამბავი. ამოცანა იყო არასწორად დასმული, შესრულდა არასწორად, რომელიც ბუნებასთან წინააღმდეგობაში მოდიოდა და პასუხიც სათანადო მივიღეთ – ბუნებამ არ გვაპატია,“ – ამბობს არქიტექტორი გიგა ბათიაშვილი.

ხელოვნებათმცოდნე მარინა ხატიაშვილიც მის აზრს იზიარებს და ამბობს, რომ  „ვერსად გავექცევით იმას, რომ ეს იყო პიარისთვის გაკეთებული ძალიან ნაჩქარევი და უხარისხო  პროექტი და შესაბამისი შედეგიც მივიღეთ“.

ის იხსენებს არქიტექტორ კოკა ამირეჯიბის მოსაზრებასაც, რომელიც ცოტა ხნის წინ გარდაიცვალა და ამ პროექტის განხორციელების ყველაზე კატეგორიული წინააღმდეგი იყო სწორედ იმ მიზეზების გამო, რაზეც დღეს არქიტექტორთა ნაწილი საუბრობს.

თბილისის ყოფილი მთავარი არქიტექტორი ირაკლი მასხარაშვილი DFWatch-თან ამბობს, რომ  „ამ მაგისტრალს მდინარე ვერეს გაყოლებაზე არ უნდა გაევლო. მეორე, არავითარ შემთხვევაში არ შეიძლება მთის მდინარეების ხელოვნურ გვირაბებში გადაყავანა. ეს არ გაითვალისწინეს და ამიტომაც მოხდა ეს ყველაფერი.”

გია აბულაძე კი ამ ყველაფერს აქ არსებულ განაშენიანებსაც ამატებს და ამბობს, რომ არ შეიძლება, ამ ხეობაში სახლების აშენება. განსაკუთრებით კი კუსტარული მშენებლობები, რადგან სტიქიის დროს კუსტარული შენობები ინგრევა და გასასვლელებს ხერგავს. მით უმეტეს, რომ მდინარე ისედაც მილში იყო მოქცეული და, ცხადია,  მილს გახეთქავდა.

არქიტექტორი თამაზ შილაკაძე კი ესტაკადის ფაქტორს  არათუ გამორიცხავს, არამედ, მისი აზრით, სწორედ ამ ინფრასტრუქტურამ შეამცირა ზარალი.  ამის არგუმენტად კი ის იმას ასახელებს, რომ  „გზების მშენებელობისას  წყლის რეჟიმი არ შემცირებულა, პირიქით, გასუფთავდა. ტერიტორია ჩახერგილი იყო და გაიწმინდა. ამ მილებს ამაზე მეტი წყალიც გაუტარებია. ახლა პრობლემა იყო ის, რომ ჩამოწვა მეწყერი და წყალი შეაგუბა“.

ხელისუფლების პოზიცია

სპეციალისტების კომენტარებიდან სამი მიზეზი იკვეთება, რომელმაც სტიქიის შედეგები განაპირობა. 1. მეწყერის ჩამოწოლამ გამოიწვია მდინარე ვერეში წყლის დაგუბება, წყალმა გამოხეთქა და ვერეს მიმდებარე ადგილები წალეკა;  2. ყოველგვარი მეწყერის გარეშეც ყოფილა ვერეს ადიდების შემთხვევები და  3. პროექტი იყო არასწორად შედგენილი.

რომელი ვარიანტია აქედან სწორი და რა რეაგირების განხორციელებაა აუცილებელი, სპეციალისტები ამაზე ჯერჯერობით ვერაფერს ამბობენ.  მათი თქმით,  დასკვნის გასაკეთებლად საკითხის სერიოზული შესწავლაა საჭირო.

ორშაბათს გვიან ღამით განცხადება პრემიერ-მინისტრმაც გააკეთა. ირაკლი ღარიბაშვილმა საგანგებო შტაბის შეკრებაზე თქვა, რომ ”ვავალებ შესაბამის სამსახურებს, დაიწყონ ამაზე მუშაობა, უნდა შეიქმნას სამუშაო ჯგუფი და ამის შემდეგ არ გამოვრიცხავ, ამ საქმით პროკურატურაც დაინტერესდეს. მსგავს ფაქტებზე რეაგირება ყველა ცივილიზებულ ქეყანაში ხდება“.

თუმცა, როგორც ჩანს, ეს საკითხი შესაძლოა, კონკრეტულად სააკაშვილისა და თბილისის ყოფილი  მერის, გიგი უგულავას წინააღმდეგაც იქნას გამოყენებული.

„ვინც არ უნდა იყოს, უნდა მიეცეს პასუხისგებაში, არც ეს არის გამორიცხული. ჩვენ არ ვფიქრობთ მხოლოდ ამა თუ იმ პირის პასუხისგებაზე. საჭიროა, დადგინდეს რეალური მიზეზები, რომ მომავალში თავიდან ავიცილოთ ის, რაც მოხდა. გარანტია იმისა, რომ ეს აღარ განმეორდება, არ არსებობს. ჩვენ ვალდებული ვართ, შევისწავლოთ და მოვახდინოთ შესაბამისი პრევენცია,“  – აღნიშნა პრემიერ-მინისტრმა.

The post ვერეს ტრაგედიის მიზეზებზე სპეციალისტებს განსხვავებული ვერსიები აქვთ appeared first on Democracy & Freedom Watch.

Biletebi.ge-ის ადინისტრაციაში, რომელსაც სუპერთასის მატჩზე დასასწრები ბილეთების გაყიდვა უნდა უზრუველყო და ეს ვერ მოახერხა, აცხადებენ, რომ საიტზე მოხდა კიბერშეტევა და ამას ემატება მომხმარებელთა აურაცხელი რაოდენობა.
უეფას სუპერთასის მატჩზე ორ ესპანურ გრანდს, “ბარსელონასა” და “სევილიას” შორის, ბილეთების გაყიდვა ორშაბათს დილიდან უნდა დაწყებულიყო, ამის შესახებ ცნობილი ჯერ კიდევ რამდენიმე თვის წინ იყო ცნობილი და მუდმივად კეთდებოდა განცხადებები, რომ ამ მხრივ პრობლემა არ შეიქმნებოდა.
თუმცა საიტი საღამოს 7 საათისთვისაც გათიშული იყო, მიუხედავა იმისა, რომ Biletebi.ge-ის ადმინისტრაცია დილიდანვე ამტკიცებდა, რომ პრობლემების აღმოფხვრაზე მუშაობდა და ეცდებოდა საიტი რაც შეიძლება მალე ამუშავებულიყო.
ამასთან, მათი თქმით, იმ პრობლემების შესახებ, რაც სუპერთასის ბილეთების გაყიდვისას შეიქმნებოდა, UEFA-დან გაფრთხილებული იყვნენ.
„წამში მოდის 10 ათასზე მეტი ტრანზაქცია, ამას „ამაზონის“ სერვერი თუ გაუძლებს მხოლოდ,” – განაცხადა ერთერთმა დამფუძნებელმა.
კითხვაზე მომზადებული იყო, თუ არა ვებ-გვერდი სუპერთასის ბილეთების გასაყიდად, აცხადებენ, რომ ახალი სისტემა დააყენეს და მზად იყვნენ ნებისმიერი რაოდენობის მომხმარებელთა მომსახურებისთვის.
სუპერთასის საორგანიზაციო კომიტეტის ხელმძღვანელის, ლაშა დვალიშვილის თქმით, biletebi.ge მატჩის ბილეთების გასაყიდად, მისი გამოცდილებიდან გამომდინარე, UEFA-მ შეარჩია და ფეხბურთის ფედერაცია ამ საქმესთან კავშირში არ არის.
UEFA-ს სუპერთასის ბილეთების გაყიდვისთვის, biletebi.ge-მ ევროპული ფეხბურთის მმართველი ორგანოსგან 45 ათასი ევრო მიიღო.

The post უეფას სუპერთასის ბილეთების გაყიდვა კვლავ შეფერხებულია appeared first on Democracy & Freedom Watch.

ფინანსთა მინისტრი ნოდარ ხადური აცხადებს, რომ ყველაზე დიდი დანაკლისი განიცადა თავდაცვის და შინაგან საქმეთა სამინისტროებმა და “ორივე სამინისტრო ამას ძალიან გაგებით მოეკიდა”

ქვეყნის ბიუჯეტი დაახლოებით 140 მილიონი ლარით შემცირდება, ამის შესახებ განცხადება ფინანსთა მინისტრა სამშაბათს დილით გამართულ მთავრობის სხდომაზე გააკეთა.

მან ამ სხდომაზე მინისტრთა კაბინეტს ბიუჯეტის კორექტირებული ვარიანტი წარუდგინა.

დაახლოებით 8-მილიარდიანი სახელმწიფო ბიუჯეტი, 1,8%-ით მცირდება, თუმცა მთავრობა ამტკიცებს, რომ ეს  სოციალურ ხარჯებს არ შეეხება.

მინისტრ ნოდარ ხადურის განცხადებით, შემცირება მიმდინარე ხარჯებს შეეხო, რომელთა დიდი ნაწილიც კაპიტალური პროექტების განხორციელებისთვის იქნება მიმართული.

ის იმასაც ამბობს, რომ ბიუჯეტის კორექტირებისას 13 ივნისს თბილისში მომხდარი სტიქიის შედეგი და მისი ლიკვიდაცვიისთვის საჭირო თანხაც იქნა გათვალისწინებული.

„ბიუჯეტი საბოლოო ჯამში, დაახლოებით, 140 მილიონი ლარით მცირდება. ეს შეეხება მიმდინარე ხარჯებს, თუმცა აღნიშნული თანხის დიდი ნაწილი, შეიძლება ითქვას, რომ მიმართული იქნება კაპიტალური პროექტების განხორციელებისთვის,” – განაცხადა ხადურმა.

ეს კი, მისივე განმარტებით, თბილისსა და მის მიმდებარე სოფლებში სტიქიური უბედურებით მიყენებული ზიანის აღმოფხვრვისთვის, რეგიონული განვითარებისა და ინფრასტრუქტურის სამინისტროსთვის დამატებითი თანხების გამოყოფას ითვალისწინებს.

ამასთან, ბიუჯეტში ცვლილება კაპიტალურ და სოციალურ ხარჯებს არ შეხებია და მხოლოდ მიმდინარე ხარჯები შემცირდა.

“კაპიტალური და სოციალური ხარჯები არ შემცირებულა, შემცირდა მხოლოდ მიმდინარე ხარჯები. ჩვენ გვაქვს იმის რესურსი, რომ წლის განმავლობაში კაპიტალური ხარჯები პირიქით გავზარდოთ. ჩვენ ვმუშაობთ დონორებთან და მათი სახსრების დიდი ნაწილი სწორედ კაპიტალური ხარჯების ნაწილში იქნება მიმართული”, – აღნიშნა ფინანსთა მინისტრმა.

რაც შეეხება იმ უწყებებს, ვისაც დაფინანსება უმცირედება, ყველაზე მეტად ეს ძალოვნებს შეეხება.

ხადურის განმარტებით,  ყველაზე მეტად დაფინანსება  შს და თავდაცვის სამინისტროებს შეუმცირდათ.

“მინდა მადლობა გადავუხადო კოლეგებს, რომლებმაც გაგებით მიიღეს არსებული პრობლემები. ყველაზე დიდი დანაკლისი ამ თვალსაზრისით განიცადა თავდაცვის და შინაგან საქმეთა სამინისტროებმა და ორივე სამინისტრო ამას ძალიან გაგებით მოეკიდა”, – განაცხადა ნოდარ ხადურმა სახელმწიფო ბიუჯეტის კორექტირებაზე საუბრისას.

სეკვესტრირებული ბიუჯეტის პროექტის წარდგენისთვის ფინანსთა მინისტრს დედლაინი 10 ივნისამდე ჰქონდა.  ეს დავალება ფინანსთა მინისტრს პრემიერმა ივნისის დასაწყისში მისცა. თუმცა, დათქმულ ვადაზე ხადურმა  პროექტზე მუშაობისთვის კიდევ ერთი კვირა ითხოვა. ამ ვადის გასვლამდე კი თბილისში სტიქიის გამო ფორსმაჟორული ვითარება იყო და საბოლოოდ პროექტი დღეს წარადგინა.

ბიუჯეტის კორექტირების საკითხი ჯერ კიდევ წლის დასაწყისში დადგა, როდესაც ლარის კურსმა სწრაფი ვარდნა დაიწყო. მაშინ  ხელისუფლებას ფინანსისტების დიდი ნაწილი და ოპონენტები ვითარებიდან გამოსასვლელად სწორედ ბიუჯეტის კორექტირებას ურჩევდნენ. თუმცა, მაშინ ხელისუფლება აცხადებდა, რომ, მიუხედავად  კურსის ვარდნისა, ეროვნულ ვალუტასთან დაკავშირებით პრობლემა არ არსებობდა. ივნისის დასაწყისში კი პრემიერ-მინისტრმა განაცხადა, რომ ბიუჯეტი უნდა შემცირებულიყო.

პროექტის წარდგენის შემდეგ ღარიბაშვილმა აღნიშნა, რომ  ბიუჯეტში გარკვეული კორექტირება ნორმალური პროცესია, ვინაიდან მთელ რეგიონში სერიოზული კრიზისია.

“ეს ნორმალურია და შეიძლება ითქვას, რომ მანამდეც უნდა გაგვეკეთებინა, მაგრამ სჯობს გვიან ვიდრე არასდროს. რეგიონში თითქმის ყველა სახელმწიფომ მოახდინა ბიუჯეტის კორექტირება. ეს რა თქმა უნდა, განხორციელდა გამომდინარე იქედან, რომ მთელ რეგიონში არის ძალიან სერიოზული კრიზისი. ყველგან რთული ვითარებაა, მათ შორის უკრაინაში, რუსეთში. აქედან გამომდინარე, ჩვენც უნდა მოვერგოთ ახალ რეალობას და ამის მიხედვით განვითარდეთ,” – განაცხადა პრემიერ-მინისტრმა.

კორექტირებული ბიუჯეტის პროექტი პარლამენტმა უნდა დაამტკიცოს.

The post ბიუჯეტი 140 მილიონით მცირდება, ძირითადად შს და თავდაცვის სამინისტროების ხარჯზე appeared first on Democracy & Freedom Watch.

მსოფლიო ბანკის სამხრეთ კავკასიის რეგიონული დირექტორი ჰენრი კერალი მიიჩნევს, რომ თუკი კანონში ცვლილება მაინც შევა და საბანკო ზედამხედველობის ფუნქცია ახალი სამსახურის ხელში გადავა, აუცილებელია მისი დამოუკიდებლობის უზრუნველყოფა.

პარლამენტმა პრეზიდენტის, ოპოზიციის, არასამთავრობო ორგანიზაციების დიდი ნაწილის წინააღმდეგობის და საერთაშორისო ფინანსური ინსტიტუტების გაფრთხილების მიუხედავად ეროვნული ბანკის შესახებ ცვლილება, რომელიც მისთვის საზედამხედველო ფუნქციის ჩამოშორებას ითვალისწინებს, პირველი მოსმენით მიიღო. რაც იმას ნიშნავს, რომ დიდი ალბათობით, არც საბოლოო დამტკიცებისთვის შეიქმნება პრობლემა.

ეროვნულ ბანკს ზედამხედველობის ფუნქცია შორდება და ის პრემიერ-მინისტრის ხელში გადადის, რადგან, ორგანო, რომელსაც ეს ფუნქცია გადაეცემა, აქამდე არ არსებობდა და ახლა საგანგებოდ იქმნება. ის მთავრობის დაქვემდებარებაში იქნება.

ვიდრე პარლამენტი ამ საკითხს კენჭისყრაზე დააყენებდა, საერთაშორისო ფინანსურმა ორგანიზაციებმა  პარლამენტის თავმჯდომარეს  და პრემიერ-მინისტრს წერილიც მისწერეს და  მოსალოდნელ საფრთხეებზე გააფრთხილეს.

მიმართვა, რომელსაც ხელს მსოფლიო ბანკის, საერთაშორისო სავალუტო ფონდის, ევროპის განვითარებისა და აზიის ბანკის წარმომადგენლები აწერენ, საკმაოდ ვრცელია და დაწვრილებით არის საუბარი ამ ცვლილებისგან გამომდინარე პოტენციურ საფრთხეზე.  ამიტომ,  საერთაშორისო ფინანსური ორგანიზაციები ზედამხედველობის სამსახურის გამოყოფას ეწინააღმდეგებიან.

სპეციალური განცხადება გააკეთა მსოფლიო ბანკის სამხრეთ კავკასიის რეგიონულმა დირექტორმა, ჰენრი კერალიმაც.

“ჩვენ ერთობლივი წერილით მივმართეთ პრემიერ-მინისტრს და პარლამენტის თავმჯდომარეს, სადაც ვაცხადებთ, რომ მნიშვნელოვანია შენარჩუნდეს საქართველოს ეროვნული ბანკის დამოუკიდებლობა. ჩვენ ასევე ვამბობთ, რომ თუკი აუცილებელია ცვლილება კანონში, ახალი საბანკო საზედამხედველო სამსახურის დამოუკიდებლობა უნდა იქნას უზრუნველყოფილი. ეს მნიშვნელოვანია, რადგან საქართველომ ხელი მოაწერა ასოცირების შეთანხმებას, რომელიც ავალდებულებს მას უზრუნველყოს ამ დაწესებულებების დამოუკიდებლობა,” –  განუცხადა ჟურნალისტებს ჰენრი კერალიმ.

მედიასთან საუბრისას მან აღნიშნა ისიც, რომ თუკი ცვლილებები განხორციელდება, ეს სტანდარტების დაცვით უნდა მოხდეს.

საინტერესოა, რომ ამ ინიციატივასთან დაკავშირებით პრლამენტის იურიდიულ კომიტეტს უარყოფითი დასკვნა ჰქონდა იმ არგუმენტით, რომ ეს საქართველოს კონსტიტუციას ეწინააღმდეგება.

მიუხედავად ამისა, პარლამენტმა ეს პროექტი მაინც მიიღი და მნიშვნელოვანია, წინააღმდეგ ხმა მისცა მხლოდ ერთმა დეპუტატმ. კენჭისყრაში ოპოზიციას მონაწილეობა არ მიუღია.

პრეზიდენტი კი  ეროვნული ბანკის შესახებ კანონზე ვეტოს დასადებად ემზადება. თუმცა, მმართველ გუნდს ეს დიდად არ ადარდებს.  ისინი ამბობენ, რომ ვეტოს დაძლევენ. მარგველაშვილი ჯერ მხოლოდ წელიწადნახევარია, რაც პრეზიდენტია და  ვეტოს უფლება უკვე ორჯერ გამოიყენა,  ორივეჯერ ფარული მიყურადების შესახებ  კანონზე. თუმცა, იმის გამო, რომ მმართველ გუნდს ვეტოს დაძლევისთვის საჭირო ხმების რაოდენობა გააჩნდა,  პრეზიდენტის აზრი არ გაითვალისწინა.

The post ეროვნულ ბანკს ზედამხედველობის ფუნქციას ჩამოართმევენ appeared first on Democracy & Freedom Watch.

Bank of Greece (Interpressnews)

საბერძნეთის ხელისუფლებასთან ერთად საქართველოს ხელისუფლებამაც არ იცის, რა შეიძლება გაკეთდეს ამ ქვეყანაში შექმნილი კრიზისის გამო.  პრობლემა კი იმ 200 ათას ქართველს ეხება, რომლებიც არაოფიციალური მონაცემებით საბერძნეთში მუშაობენ და სამშობლოში საკუთარ ოჯახებსა და ახლობლებს მატერიალურად ეხმარებიან.

ქვეყანაში ამ დროისთვის შეჩერებულია როგორც ფულადი გზავნილების განხორციელება, ასევე სატვირთო გადაზიდვები.

არაოფიციალური მონაცემებით, საბერძნეთში დაახლოებით 200 ათასი საქართველოს მოქალაქე ცხოვრობს, და ამ მაჩვენებლით ის მხოლოდ რუსეთს ჩამორჩება (სადაც ასევე არაოფიციალური მონაცემებით 800 ათასამდე საქართველოს მკვიდრი ცხოვრობს).

საბერძნეთიდან საქართევლოში ყოველთვიურად საშუალოდ 17 მილიონი აშშ დოლარი ირიცხება. ამასთან, არ არსებობს ზუსტი მონაცემი იმის შესახებ, გადარიცხვის გარეშე, “ქეშად” რა რაოდენობის თანხა შემოდის, რადგან,  როგორც DFWatch -თან საუბრისას საბერძნეთში მცხოვრებმა ერთ-ერთმა ქართველმა, ნატო ალექსიძემ უთხრა, ხშირად იქაური ქართველობა სამშობლოში ფულს ახლობლებს ატანს.  განსაკუთრებით ისინი, ვისაც დაბალი შემოსავალი აქვს და ურჩევნია,  გადარიცხვის საკომისიოს ტვირთს აარიდოს თავი.

ეკონომისტები და ფინანსისტები ამ ვითარებაში ორ პრობლემაზე ამახვილებენ ყურადღებას.  ერთია საბერძნეთში მყოფი ქართველების მდგომარეობის მკვეთრი გაუარესება და მეორე, მათ მიერ გადმორიცხულ/გამოგზავნილი ფულის ნაკადის შეწყვეტა, რაც უკვე ქვეყნის ეკონომიკაზე აისახება ნეგატიურად.

ათენში მცხოვრები ნატო ალექსიძე  ამბობს, რომ სამსახური ჯერჯერობით არ დაუკარგავს, მაგრამ არ იცის, ხელფასს როდის და რა ოდენობით აიღებს.

თუმცა, კიდევ ერთი ქართველი,  სოფო კახიანი,  რომელსაც DFWatch  დაუკავშირდა,  ამბობს, რომ ის სამსახურიდან უკვე დაითხოვეს და 1 ივლისიდან აღარც სამსახური აქვს და აღარც საცხოვრებელი. საქართველოში დაბრუნებას კი ვერ ახერხებს.

მესამე ქართველი, ნინო გოგილაშვილი, რომელსაც DFWatch  „ფეისბუკის“ მეშვეობით ელაპარაკა, ამბობს, რომ გასაჭირში ჩავარდნილი ხალხის დასახმარებლად საქართველოდან თანხის  გადაგზავნასაც ვერ ახერხებენ, არა მარტო იმის გამო, რომ მათ ოჯახებს ამის საშუალება არა აქვთ, არამედ იმის გამოც, რომ ბანკები არ მუშაობს და, რაც მთავარია, გადარიცხული თანხის გამოტანას ვერ შეძლებენ.

„უკვე რამდენიმე წელია, აქ ვარ.  პრობლემები იყო, მაგრამ ასეთი, ახლა რომ არის, არასოდეს ყოფილა.  ბევს ვიცნობ და ყველა ამ მდგომარეობაშია. აქ ერთ კაცსაც ვერ ნახავთ, პრობლემა რომ არ ჰქონდეს,“ – ამბობს ნინო გოგილაშვილი.

ამას ემატება ისიც, რომ საკონსულო მომსახურეობის მიღებაც შეუძლებელი, რადგან იქ საქმის წარმოება უნაღდო ანგარიშსწორებით მიმდინარეობს.

ორშაბათს დილით საგარეო სამეთა სამინისტროს სპიკერმა, დავით კერესელიძემ სამინისტროს ტრადიციულ ორშაბათის ბრიფინგზე თქვა, რომ საქართველოს საბერძნეთში მყოფი ქართველების დახმარება არანაირად არ შეუძლია.

„კეთილი სურვილების გარდა, მეტი არაფერი შეგვიძლია,“ – თქვა ბრიფინგზე დავით კერესელიძემ.

პარლამემტში მმართველი გუნდის მხრიდან გაკეთდა განცხადებები, რომ აღმასრულებელმა ხელისუფლებამ აქტიურად უნდა იმოქმედოს. მათი თქმით, აუცილებელია, რომ მთავრობამ საბერძნეთი  ხელისუფლებასთან მოლაპარაკებები დაიწყოს.

თუმცა, დღის ბოლოს საგარეო საქმეთა სამინისტროში DFWatch -ს ისევ ვერაფერი ვერ უთხრეს, იგეგმება თუ არა რამე ქმედითი ნაბიჯის გადადგმა.

საბერძნეთში მყოფი ქართვეელების ბედის გაურკვევლობასთან ერთად კი ფინანსისტები  მეორე პრობლემად მათი გზავნილების შეწყვეტას ასახელებენ.

როგორც DFWatch-თან „ეკონომიკური განვითარების ცენტრის“ თავმჯდომარემ, რომან გოცირიძემ,  თქვა „საბერძნეთში არსებული პრობლემის გამო თავდაპირველად საქართველოში გზავნილებმა, შესაძლოა, 4-5 მილიონით დაიკლოს, თუმცა მთავარი პრობლემა საბერძნეთის გრძელვადიანი კრიზისია, რომელიც იქ მცხოვრებ საქართველოს მოქალაქეებს უმუშევრობით ემუქრება.”

მისი თქმით,  მათი ოჯახები საქართველოში არამარტო მძიმე ეკონომიკურ მდგომარეობაში აღმოჩნდებიან, არამედ გარკვეულ ნაწილში ეს აისახება საბანკო ვალდებულებების ვერშესრულებაზე, რამაც გრძელვდიან პერიოდში, შესაძლოა,  ბანკებსაც კი შეუქმნას პრობლემა.

„ჩვენ ზუსტად არ ვიცით, ამ 200 ათასი ადამიანიდან რამდენს აქვს საბანკო ვალდებულება და საერთო ჯამში აქედან რამდენი ვერ შეძლებს გადახდას.  ამიტომ ძნელია იმის თქმა, იქნება თუ არა ამ მხრივ ბანკებისთვის  ისეთი მნიშვნელოვანი, რომ  მათ სერიოზული ზარალი მიაყენოს. ერთი რამის თქმა კი ნამდვილად შეიძლება, ეს ამ ადამინების ოჯახებზე მძიმედ აისახება და  კიდევ ერთი დამატებითი პრობლემა იქნება ჩვენი ეკონომიკისთვის,“ – ამბობს გოცირიძე.

The post საბერძნეთის კრიზისმა ათასობით ქართველი გამოუვალ მდგომარეობაში ჩააგდო appeared first on Democracy & Freedom Watch.

ეროვნულმა ბანკმა რეფინანსირების განაკვეთი 5.5 პროცენტამდე გაზარდა (IPN)

ეროვნულმა ბანკმა ინფლაციის გაზრდის მოლოდინის გამო რეფინანსირების განაკვეთი გაზარდა, რაც იმას ნიშნავს, რომ კლიენტების გარკვეულ კატეგორიას სესხი კიდევ უფრო გაუძვირდება, რაც ცალკეული ადამიანებზეც აისახება და ეკონომიკის განვითარებაზეც.

ამის შესახებ გადაწყვეტილება  ეროვნულმა ბანკმა ოთხშაბათს მიიღო და არგუმენტად სწორედ ინფლაციის ზრდის მოლოდინი დაასახელა მაშინ, როცა ხელისუფლებაში ამ საფრთხეზე არაფერს ამბობენ.

რეფინანსირების განაკვეთი ამჯერადაც 50 პუნქტით გაიზარდა და 5,5% შეადგინა. ამასთან, უკვე გაცხადდა ისიც, რომ წლის ბოლომდე რეფინანსირების განაკვეთი იდევ გაიზრდება.

როგორც ეროვნულ ბანკში აცხადებენ,  მონეტარული პოლიტიკის გადაწყვეტილება ეფუძნება მაკროეკონომიკურ პროგნოზს, რომლის მიხედვით გაიზარდა ინფლაციის მოლოდინი და საპროგნოზო ინფლაციაზე მოქმედი  შიდა და გარე რისკი.

„არსებული პროგნოზის შესაბამისად მონეტარული პოლიტიკის კომიტეტი მიზანშეწონილად მიიჩნევს საპროცენტო განაკვეთის ეტაპობრივ ზრდას 2015 წლის ბოლოს 6.5 პროცენტამდე,“ – ნათქვამია  ეროვნული ბანკის განცხადებაში, სადაც  დეტალურად არის განმარტებული ამ გადაწყევტილების მიზეზები.

როგორც განცხადებაშია აღნიშნული, ბოლო თვეების განმავლობაში ინფლაციის მაჩვენებელი იზრდება. საწვავზე ფასის წლიური კლება ნაწილობრივ აბალანსებს ინფლაციის ზრდას. ჩვენს ძირითად სავაჭრო პარტნიორ ქვეყნებში არსებული ნეგატიური ეკონომიკური ტენდენციები განაგრძობს უარყოფითი გავლენის გადმოცემას საქართველოს ეკონომიკაზე. შემცირებულია საქონლის ექსპორტი და ფულადი გზავნილები. ტურისტული შემოდინების ზრდის ტემპი დაბალია.

ასევე, ეროვნული ბანკის პოლიტიკაზე წნეხი ზრდის გრძელვადიან საპროცენტო განაკვეთებს, ასუსტებს მონეტარული პოლიტიკის გადაცემის ეფექტიანობას და ხელს უწყობს ინფლაციის მოლოდინის ზრდას.

„მიმდინარე პროგნოზის მიხედვით, ინფლაცია სამიზნე მაჩვენებელს 2015 წლის მეორე ნახევარში მიაღწევს,“ – ნათქვამია განცხადებაში, სადაც ასევე აღნიშნულია, რომ „მონეტარული პოლიტიკის შემდგომი ცვლილების დინამიკა დამოკიდებული იქნება მოსალოდნელი ინფლაციის დინამიკაზე, ეკონომიკური აქტივობის ზრდის ტენდენციებზე, გლობალურ და რეგიონალურ ეკონომიკურ გარემოზე”.

ეს კი იმას ნიშნავს, რომ  მომხმარებელთა სააკმაოდ დიდ  ნაწილს სესხი გაუძვირდება.

ეკონომიკური საკითხების ექსპერტები  კი გაცილებით დიდ პრობლემას იმაში ხედავენ, რომ  ეროვნული ბანკის ეს ნაბიჯი შეიძლება ეკონომიკის განვითარების  შეფერხების ინდიკატორი იყოს.  მათი თქმით, შექმნილ ვითარებასა და ფასების მოსალოდნელი ზრდის თავიდან ასაცილებლად ეს ერთადერთი გამოსავალი იყო. თუმცა აღნიშნავენ, რომ რეფინანსირების განაკვეთის გაზრდა საბოლოოდ ბანკებისთვის და ზოგადად ქვეყანაში ბიზნესის განვითარებისთვის უარყოფითი შედეგის მომტანი იქნება.

“რეფინანსირების განაკვეთის გაზრდა არის ერთ-ერთი საშუალება  ლარის სტაბილურობისთვის, მაგრამ ბიზნესის აქტიურობის შეკვეცის ხარჯზე. ეს არის იძულებითი ნაბიჯი და, ცხადია, ამით ბანკების საკრედიტო აქტივობა შემცირდება, რადგან პროცენტი იწევს. ეს ნიშნავს ბიზნესისთვის სესხების გაძვირებას და აქტივობის შეკვეცას ლარის სტაბილურიბის  მიღწევის მიზნით,”  – ამბობს DFWatch-თან ეროვნული ბანკის ყოფილი პრეზიდენტი (2005-07 წწ.) და არასამთავრობო ორგანიზაცია  “ეკონომიკური  განვითარების ცენტრის” ხელმძღვანელი, რომან გოცირიძე.

მისი თქმით, ეროვნული ბანკის მოტივაცია ასეთ შემთხვევებში, როდესაც რეფინანსირების განაკვეთს ზრდის, არის ის, რომ საპროცენტო განაკვეთი აიწიოს, რაც ფასების ზრდის შენელების ერთ-ერთი მეთოდად ითვლება.

„მაგრამ პროცენტის აწევა იწვევს ეკონომიკის მიერ მოქნილობის კიდევ უფრო დაკარგვასა და ბიზნესის შენელებას,” – ამბობს გოცირიძე.

ის აქცენტს აკეთებს იმაზე, რომ ეროვნული ბანკის  ეს ნაბიჯი ზოგადად იმის მაჩვენებელია, რომ სავალუტო კრიზისი სულ უფრო ღრმავდება და ეს პირველ რიგში ეკონომიკაზე აისახება, რაც შემდეგ უკვე თითოეულ მოქალაქესაც შეეეხება.

ეროვნულმა ბანკმა  ამ წლის განმავლობაში რეფინანსირების განაკვეთი უკვე მესამედ გაზარდა და  ყველა ჯერზე 50 პუნქტით ზრდიდა, რამაც საერთო ჯამში 150 პუნქტი შეადგინა.  წლის დასაწყისში რეფინანსირების განავეთი 4% იყო, ახლა უკვე 5,5%-ია და წლის ბოლომდე კიდევ 100 პუნქტით გაზრდას პროგნოზირებენ.

რეფინანსირების განაკვეთის შემდეგი შეცვლა კი 12 აგვისტოსთვის არის დაგეგმილი, როდესაც  გადაწყვეტილების მიმღები საბჭო შეიკრიბება.

The post რეფნანსირების განაკვეთის ზრდა შეიძლება ეკონომიკის შეფერხების ინდიკატორი იყოს appeared first on Democracy & Freedom Watch.

ზვიად დარსაძე

ესპანეთში ორგანიზებული დანაშაულებრივი საქმიანობის ბრალდებით 36 ადამიანი დააკავეს, ძირითადად ქართველები, მათ შორის 42 წლის “კანონიერი ქურდი”.

ოპერაცია, რომელსაც ევროპოლმა, ინტერპოლის ერთგვარმა ევროპულმა ანალოგმა, “2015 წელს ორგანიზებულ დანაშაულთან ბრძოლის ყველაზე მნიშვნელოვანი მოვლენა” უწოდა, მადრიდში, ვალენსიასა და სხვა ქალაქებში ჩატარდა.

ესპანეთის პოლიცია ამტკიცებს, რომ ზვიად დარსაძე, ე.წ. “კანონიერი ქურდი”, სათავეში ედგა დიდ დანაშაულებრივ დაჯგუფებას, რომელიც ძირითადად ბინების ძარცვაში იყო “დახელოვნებული”, თუმცა არც

დოკუმენტების გაყალბებას, იარაღისა და ფულის უკანონი ბრუნვას, ფულის გათეთრებასა და სხვა კრიმინალურ საქმიანობას თაკილობდა.

(“კანონიერი ქურდი” პოსტსაბჭოურ სივრცეში დამნაშავეთა სამყაროს უმაღლეს იერარქიულ რგოლს წარმოადგენს.)

ზვიად დარსაძეს, რომელიც წარმოშობით ქუთაისელია, ესპანელი გამომძიებლების მტკიცებით, თავის დაჯგუფებაში რკინისებური დისციპლინა ჰქონდა დამყარებული. ნაძარცვის ლომის წილი ე.წ. “ობშიაკში” მიდიოდა, რომელიც დამნაშავეთა სამყაროს ერთგვარი საერთო ფონდია, რომელსაც “ქურდები” მართავენ.

ესპანეთის გარდა ეს ჯგუფი დანაშაულებრივ საქმიანობას, როგორც მინიმუმ, კიდევ გერმანიასა და საფრანგეთშიც აწარმოებდა.

ჯგუფი ძირითადად ძვირფასეულობას იპარავდა, რომლის ნაწილსაც, ესპანური მედიის ცნობით, ოქროს ზოდებად ადნობდნენ-ხოლმე.

დაჯგუფება კარგად ორგანიზებულ ნახევრად-ავტონომიურ უჯრედებად იყო დაყოფილი და მისი წევრების რაოდენობა ესპანეთის პოლიციისთვის სრულად ახლაც უცნობია.

დაკავების ოპერაციაში მთელი ესპანეთის მასშტაბით 200-ზე მეტი ოფიცერი მონაწილეობდა, მათ შორის საერთაშორისო ორგანიზებულ დანაშაულთან ბრძოლის ევროპულის სააგენტოს, ევროპოლის გამომძიებლები და გერმანიის ფედერალური კრიმინალური პოლიციის წარმომადგენლები.

ზვიად დარსაძე ცნობილია თავისი მჭიდრო კავშირით ქართული მაფიის ბოსებთან, ძმებ ლაშა და კახა შუშანაშვილებთან. უფროსი ძმა, ლაშა, საქართველოსა და რუსეთში ერთ-ერთ ყველაზე გავლენიან “ქურდად” მიიჩნევა, კახა კი ესპანეთში ქართულ ორგანიზებულ დანაშაულს კურირებს.

შეგახსენებთ, რომ 2010 წელს მთელი ევროპის მასშტაბით არნახული პოლიციური აქცია ჩატარდა – ოპერაცია “იავა”, რომლის შედეგადაც ქართულ-რუსული მაფიის წევრობაში ეჭვმიტანილი 69 ადამიანი დაიჭირეს. 24 მათგანი ესპანეთში აიყვანეს, მათ შორი კახა შუშანაშვილი.

ესპანეთის ნაციონალური პოლიციის განცხადებით, დაკავებულების საბანკო ანგარიშები, მანქანები და სხვა ქონება დაყადაღებულია. ოპერაცია გრძელდება.

The post “ქართული მაფიის” საქმეს ევროპაში 2015-ის ყველაზე მნიშვნელოვანი მოვლენა” უწოდეს appeared first on Democracy & Freedom Watch.

საქართველოს ეროვნული ბანკი სავალუტო არასტაბილურობის თავიდან ასაცილებლად  მთავრობას მიმდინარე   ხარჯების შემცირებას და  საგადასახადო პოლიტიკის გადახედვას ურჩევს. თუმცა, მთავრობა  ამ რჩევის გათვალისწინებას არ აპირებს.

ეროვნული ბანკის  რეკომენდაციები წერილობითი სახით პარლამენტში უკვე გადაგზავნილია როგორც 2015 წლის ბიუჯეტის კორექტირებული პროექტის დასკვნა, სადაც ნათქვამია, რომ  პროექტში პრობლემების მოსაგვარებლად საჭირო მიმართულებები გათვალისწინებული არ არის.

“მსოფლიოში მიმდინარე პროცესების გამო, რამაც ყველა ძირითადი ვალუტის მიმართ  აშშ დოლარის გამყარება გამოიწვია და რეგიონში არსებული ძალიან რთული გეოპოლიტიკური მდგომარეობის გამო, ქვეყნის ეკონომიკა იმყოფება მნიშვნელოვანი საგარეო შოკის პირობებში. არსებულ შოკს აძლიერებს ქვეყნის შიგნით მიმდინარე პროცესები,“ – ნათქვამია ეროვნული ბანკის დასკვნაში, სადაც აქცენტი იმაზეა გაკეთებული, რომ მთავრობამ ნაბიჯები სწორერედ ამ საფრთხეების საპასუხოდ  და რაც მთავარია, გარკვეული პრევენციისთვისაც უნდა გადადგას, რათა რეაგირება დროული და ნაყოფიერი აღმოჩნდეს.

„არსებული შოკების პირობებში სწორი რეაგირება იქნებოდა ეკონომიკურ ზრდაზე კონცენტრირება და გაზრდილი შემოსავლების ფარგლებში სოციალური და სხვა პრობლემების მიზნობრივი გადაწყვეტა,“ – ნათქვამია დასკვნაში.

იქვე ისიც არის ნათქვამი, რომ გაცვლითი კურსის ხელშეწყობისთვის „ალტერნატიული პოლიტიკის“ შემუშავებაა საჭირო, რათა „მოსახლეობის შემოსავლებს მინიმალური ზარალი მიადგეს როგორც მიმდინარე ასევე მომვალ წლებში.”

ალტერნატიული პოლიტიკა კი, „ეროვნული ბანკის“  რეკომენდაციით, გულისხმობს ბიუჯეტის ხარჯების მნიშვნელოვან შემცირებასა და არსებული საგადასახადო მექანიზმების გამოყენებას, როგორც აღნიშნული იყო საერთაშორისო სავალუტო ფონდის მიერ მთავრობასთან კონსულტაციის ფარგლებში.

ამასთან, ხარჯების შემცირება უნდა მოხდეს უპირატესად მიმდინარე ხარჯების კლებით.

„ პროექტით, ასევე არ არის დაგეგმილი ცვლილებები საგადასახადო კუთხითაც, რაც ხელს შეუწყობდა მიმდინარე ანგარიშის დეფიციტის შემცირებას და შედეგად გაცვლით კურსზე წნეხის შერბილებას,“ – ნათქვამია  რეკომენდაციაში.

ეროვნული ბანკი ფინანსური და სავალუტო სტაბილურობის კუთხით პრობლემებს რომ პროგნოზირებს, ამაზე წინა კვირასაც ითქვა. სწორედ ამის გამო მან რეფინანსირების განაკვეთი 50 პუნქტით გაზარდა და წლის ბოლომდე კიდევ 100-პუნქტიან ზრდას პროგნოზირებს.

მიუხედავად ამისა, მთავრობა ეროვნული ბანკის რეკომენდაციების გათვალისწინებას არ აპირებს.

ფინანსთა მინისტრმა ჟურნალისტებთან უკვე განაცადა, რომ მას „ეროვნული ბანკის არ ესმის“.

„სამწუხაროდ, ეს დასკვნა არის ურთიერთგამომრიცხავი. მაგალითად, ერთ ნაწილში წერია, რომ საგადამხდელო ბალანსის დეფიციტის დაფარვისთვის სახელმწიფომ უნდა გაზარდოს გადასახადები. მე, სიმართლე გითხრათ, არ მესმის ეროვნული ბანკის ხელმძღვანელობის, რომელიც თავის თავზე იღებს გადაწყვეტილებას, მთავრობას და პარლამენტს ურჩიოს გადასახადების გაზრდა,”  – აღნიშნა ნოდარ ხადურმა.

თუმცა, ის აქცენტს მოლოდ გადასახადების გაზრდის ნაწილზე აკეთებს, რაც ასევე  საერთაშორისო სავალუტო ფონდის რეკომენდაციაცაა და არაფერს ამბობს  ხარჯების ადეკვატურ შემცირებაზე, რაც ასევე კრიტიკის საგანი გახდა ქართველი ფინანსისტების მიერაც, რადგან მიაჩნიათ, რომ ბიუჯეტის  ხარჯები არასათანადოდ და არასწორი მიმართულებებით მცირდება.

2015 წლის ბიუჯეტი, რომელიც 8 მილიარდ ლარამდეა (დაახლ. 3,5 მილიარდი დოლარი), 140 მილიონი ლარით (62 მლნ დოლარი) მცირდება.

პარლამენტში ბიუჯეტის ცვლილებების განხილვის პროცესი დაწყებულია.

The post ეროვნული ბანკი მთავრობას ხარჯების შემცირებას ურჩევს appeared first on Democracy & Freedom Watch.

ლიკა კიკიანი (ipn)

თბილისის ახალგაზრდული კლუბის მენეჯერი  პოლიციელებს ცემაში ადანაშაულებს და საქმის გამოძიებას ითხოვს. შსს ამ ბრალდებას უარყოფს, თუმცა შემთხვევის ადგილზე არსებული ვიდეოკამერების ჩანაწერებს არ ასაჯაროებს.

გუშინ თავად სავარაუდო დაზარალებული შეეცადა ამ კადრების ამოღებას და აცახდებს, რომ შემთხვევის დროს გადაღებული ვიდეომასალა წაშლილია.

პროკურატურამ კი გუშინ ამ საქმის გამოძიება დაიწყო, რაც, ბრალის დამტკიცების შემთხვევაში, დამნაშავეებს შეიძლება 15 წლამდე პატიმრობას უქადის.

ახალგაზრდა გოგონას განცხადებით, რომელიც ორი დღის წინ სოციალური ქსელებით ფართოდ გავრცელდა და საზოგადოებაში დიამეტრულად განსხვავებული გამოხმაურება ჰპოვა,  6 ივლისს ღამით კუს ტბასთან ფასიან ავტოსადგომზე 20-მდე პოლიციელმა სცემა.

კუს ტბის ასახვევთან მდებარე კლუბ “ვიტამინის” თანამშრომლის, ლიკა კიკიანის მტკიცებით, შემთხვევა სათვალთვალო კამერებმაც გადაიღო.

ის ამბობს, რომ  კუს ტბაზე ახალგაზრდა ბიჭებს შორის მომხდარი დაპირისპირების განმუხტვას ცდილობდა, როდესაც მას პოლიციელები დაუპირისპირდნენ, აგინეს და სცემეს. ამტკიცებს, რომ ამაში დაახლოებით ოცამდე სამართალდამცველი მონაწილეობდა.

ამ განცხადების გაკეთების შემდეგ შსს-ს გენინსპექციამ მოკვლევა დაიწყო და  რამდენიმე საათში დასკვნა დადო, რომ კიკიანი ცრუ ინფორმაციას ავრცელებს.

შსს-ს მიერ  8 ივლისს გამოქვეყნებული განცხადებით, გენერალურმა ინსპექციამ  მოკვლევა ჩაატარა, ამოიღო ვიდეოჩანაწერები და გამოკითხა ამ ფაქტთან დაკავშირებული ყველა პირი. არც ვიდეო-მასალა და არც ეს ადამიანები, შსს-ს თანახმად, კიკიანის ცემას არ ადასტურებენ, თავად გოგონა კი გენინსპექციაში არ გამოცხადდა.

შსს-ს მიერ გავრცელებულ განცხადებაში ნათქვამია, რომ დაკითხული სასწრაფო დახმარების ბრიგადის წევრებმაც არ დაადასტურეს სხეულზე დაზიანებების არსებობის ფაქტი.

ჟურნალისტებმა კი გადაიღეს კიკიანის სხეულზე არსებული დალურჯებული ადგილები. ამასთან, კიკიანი ამბობს, რომ დალურჯებული აქვს სხეულის სხვა ნაწილებიც, რაც ტანსაცმლით არის დაფარული.

შსს-მ ვიდეომასალაც გაავრცელა, თუმცა ეს არის პოლიციის განყოფილების ვიდეოთვალის მიერ გადაღებული კადრები და არა იმ კამერების ჩანაწერი, რომლებიც კუს ტბაზე, შემთხვევის ადგილზეა დამონტაჟებული. ლიკა კიკიანი სწორედ ამ კამერებზე ასახული მასალის გასაჯაროებას ითხოვს.

ამ მიზნით ის, ადვოკატთან ერთად, გუშინ კუს ტბაზე გვიანობამდე ელოდებოდა გენინსპექციის წარმომადგენლების მისვლას, რათა ვიდეოკამერების ჩანაწერები ამოეღოთ და მისთვის გადაეცათ, თუმცა ისინი კუს ტბაზე არ მისულან.

იმ კომპანიის დაცვის სამსახური, რომელიც კუს ტბის მენეჯმენტს ახორციელებს, აცხადებს, რომ  ვიდეოჩანაწერებზე წვდომა მხოლოდ პოლიციას აქვს.

არადა, ჩანაწერებს თუ მალე არ ამოიღებენ, ისინი შეიძლება ავტომატურ რეჟიმში წაიშალოს. სწორედ ამიტომ კიკიანი ეჭვობს, რომ პოლიცია დროს შეგნებულად აჭიანურებს.

კუს ტბის დაცვის სამსახურში აცხადებენ, რომ ჩანაწერები  კრიმინალურმა პოლიციამ უკვე ამოიღო.

შსს-ში  „დფვოჩის“ კითხვაზე, ნამდვილად ამოღებულია თუ არა ეს მასალა ან დაკმაყოფილდება თუ არა კიკიანის მოთხოვნა, კომენტარს არ აკეთებენ.

დღეს კიკიანი ადვოკატთან და აი-ტი სპეციალისტთან ერთად იმ სერვერზე შეღწევას შეეცადა, სადაც შესაბამისი კადრებია ატვირთული. მართალია, სერვერში შესვლა მოხერხდა, მაგრამ, როგორც კიკიანი აცხადებს, იმ პერიოდის მასალა, როდესაც შემთხვევა მოხდა, წაშლილი აღმოჩნდა.

ხუთშაბათს გოგონამ მომხდარის გამოძიების მოთხოვნით პროკურატურას მიმართა. ცოტა ხანში პროკურატურის ვებგვერდზე გამოქვეყნდა განცხადება, რომლის თანახმადაც, პროკურატურამ ამ საქმის გამოძიება დაიწყო სისხლის სამართლის კოდექსის იმ მუხლით, რომელიც, ბრალის დამტკიცების შემთხვევაში 8-დან 15წლამდე პატიმრობას ითვალისწინებს.

The post კიკიანის საქმეს პროკურატურა გამოიძიებს appeared first on Democracy & Freedom Watch.

შს მინისტრმა ჯერ არ იცის, ამავე პოსტზე დატოვებენ თუ სახელმწიფო უსაფრთხოებას ჩააბარებენ (IPN)

ხელისუფლებაში მოსვლიდან სამი წლის შემდეგ მმართველმა გუნდა როგორც იქნა  წინასაარჩევნო დაპირება შეასრულა და შსს-ს სახელმწიფო უსაფრთხოების სამსახური ჩამოაშორა, რომელიც 1 აგვისტოდან ცალკე უწყებად ჩამოყალიბდება.

“სახელმწიფო უსაფრთხოების სამსახურის შესახებ” კანონპროექტი პარლამენტმა  საბოლოოდ მიიღო. უწყების ფორმირებისთვის კი ვადად მიმდინარე წლის 1 აგვისტოა განსაზღვრული.

ცვლილების მიხედვით, უსაფრთხოების სამსახური იქნება საქართველოს მთავრობის დაქვემდებარებაში არსებული აღმასრულებელი ხელისუფლების სპეციალურ დაწესებულებათა სისტემა.

ცვლილებით ასევე განისაზღვრება სახელმწიფო უსაფრთხოების თანამშრომლების მიერ სამსახურის გავლის წესი, მათი სამართლებრივი და სოციალური დაცვის გარანტიები.

შს სამინისტრო პირველი აგვისტოდან ორად გაიყოფა. ვინ უხელმძღვანელებს “ახალ” და “ძველ” სამსახურებს ამ დროისთვის უცნობია.

პრემიერ-მინისტრს ორი კვირა აქვს იმისათვის, რომ უწყების ახალი ხელმძღვანელის კანდიდატურა დაასახელოს, თუმცა კულუარებში უკვე განიხილება რამდენიმე კანდიდატურა, მათ შორის შინაგან საქმეთა მოქმედი მინისტრი ვახტანგ გომელაური.

თავად შს მინისტრმა განაცხადა, რომ მას აღნიშნულთან დაკავშირებით ინფორმაცია არ აქვს. გომელაურმა ჟუნრალისტებს უთხრა, რომ გადაწყვეტილებას ამ თემაზე ირაკლი ღარიბაშვილი მიიღებს.

“პრემიერმა მთავრობას კანდიდატი უნდა წარუდგინოს, მოწონების შემთხვევაში,  განხილვაში ჩაერთვება პარლამენტი და გაიმართება კენჭისყრა. დამტკიცების შემთხვევაში კი ახალი ხელმძღვანელი მუშაობას პირველი აგვისტოდან დაიწყებს,” – აცხადებს პარლამენტის იურიდიულ საკითხთა კომიტეტის თავმჯდომარე,  ვახტანგ ხმალაძე.

შსს-ს გაყოფის აუცილებლობაზე ოპოზიცია წლების განავლობაში საუბრობდა. სააკაშვილის ხელისუფლებაში მოსვლამდე,  უშიშროება ცალკე სამინისტროდ არსებობდა.  სააკაშვილმა ხელისუფლებაში მოსვლისთანავე  ეს სამინსიტრო შსს-ს შეუერთა იმ მოტივით, რომ ორი ძალოვანი უწყების ცალკ-ცალკე არსებობა ქვეყანას დამატებით ხარჯებად უჯდებოდა. თუმცა, ეს მაშინვე იქცა კრიტიკის საგნად, რადგან  სააკაშვილის მაშინდელი ოპონენტები ამბობდნენ, რომ ამით ხელისუფლება ძლიერ ძალოვან სტრუქტურას ქმნიდა იმისთვის, რომ საკუთარი პარტიული ინტერესებისთვის გამოეყენებინა.

სააკაშვილის მმართველობის დროს ეს მუდმივად კრიტიკის საგანი იყო და დღევანდელი ხელისუფლება 2012 წლის საპარალემენტო არჩვენების წინ ერთ-ერთ მთავარ საარჩევნო დაპირებად სწორედ ამ უწყების დაშლას ასახელებდა. მაგრამ ამის გაკეთებაზე ხელისუფლებაში მოსვლისთანავე უარი თქვეს.

ეს საკითხი კი აქტუალური ცოტა  ხნის წინ გახდა, რაც  საერთაშორისო ორგანიზაციების და განსაკუთრებით ევროკავშირის რეკომენდაციებში აქცენტი სულ უფრო ხშირად კეთდებოდა იმაზე, რომ შსს-ში რეფორმის გატარება აუცილებელი იყო.  შსს-ს გაყოფაზე მუშაობა კი მაისში დაიწყო.

“ეს ცვლილებები ხელს უწყობს, ერთი უწყებიდან ერთი განშტოების რამდენიმე უწყებაში კონცენტრირებას, სადაც ჩართული იქნება არა ერთი განშტოება, არამედ ორი საკანონმდებლო და აღმასრულებელი ხელისუფლება. ეს რეფორმა ხელს შეუწყობს ძალაუფლების დეკონცენტრირებას და დანაპირების შესრულებას,”- განაცხადა ჟურნალისტებთან საუბრისას ზაქარია ქუცნაშვილმა.

საპარლამენტო ოპოზიციაში კი ფიქრობენ, რომ ახალი სამსახურის შექმნით რეალობა არ შეიცვლება.

The post შსს დაიშალა – სახელმწიფო უსაფრთხოება ცალკე სამსახურად ჩამოყალიბდება appeared first on Democracy & Freedom Watch.

“ყირიმი რუსეთის ნაწილია” – ნინო ბურჯანაძე (IPN)

პარლამენტის ყოფილი თავმჯდომარე ნინო ბურჯანაძე აცხადებს, რომ ყირიმი რუსეთის ნაწილია და უკრაინას არასოდეს არ დაუბრუნდება.

ბურჯანაძე გუშინ რუსეთის პარლამენტის ქვედა პალატის – სახელმწიფო დუმის – სპიკერს, სერგეი ნარიშკინს შეხვდა, რომელიც ევროკავშირის “შავ სიაშია” შეყვანილი და ახლახან ფინეთში არ შეუშვეს.

როგორც რუსეთის დუმის ვებგვერდზე განთვსებულ ინფორმაციაშია აღნიშნული, ნარიშკინმა და ბურჯანაძემ რუსეთ-საქართველოს დიალოგის საკითხები განიხილეს.

საიტის ცნობით, ნინო ბურჯანაძე მოსკოვში სწორედ დუმის მიწვევით იმყოფება და მონაწილეობას იღებს საერთაშორისო მრგვალი მაგიდის მუშაობაში “21-ე საუკუნის აქტუალური საერთაშორისო-სამართლებრივი პრობლემები”.

ბურჯანაძის შეხვედრების შესახებ მის პარტიაში ჯერჯერობით განმარტებები არ კეთდება და ინფორმაცია მხოლოდ მისი მოსკოვში ვიზიტის შესახებ გავრცელდა.

ბურჯანაძემ ინტერვიუ რუსულ მედიასაშუალებებს მისცა, სადაც საქართველოს მოქმედი და ყოფილი მთავრობები გაკრიტიკა და საქართველოს ევროინტეგრაციის გზა დაიწუნა.

„საქართველო დასავლური ტიპის დემოკრატიული ქვეყანა უნდა იყოს, თუმცა  ეს არ ნიშნავს,  რომ აუცილებლად საჭიროა რომელიმე ორგანიზაციის წევრობა ,“ – ეს კომენტარი “დემოკრატიული მოძრაობის” ლიდერმა ტელეკომპანია “ენტევესთან” ინტერვიუში გააკეთა.

“ჩემი აზრით, რაც ახლა ხდება საქართველოში, რომ სახელმწიფოს მთავარ მიზანს ნატო-ში ან ევროკავშირში გაწევრიანება წარმოადგენს – არის ფუნდამენტურად არასწორი. ჩვენ უნდა ვაღიაროთ, რომ ნატო-ში არავინ გველოდება, და არავინ მიგვიღებს. ნატო-ში გაწევრიანებაზე საუბარი არ არის რეალისტური და არ შედის  საქართველოს ინტერესებში”, – აღნიშნა ბურჯანაძემ.

ამბობს, რომ მოსკოვში შეხვდა პოლიტიკოსებს, რომლებიც საქართველოსთან დიალოგისთვის მზად არიან. თუმცა, საქართველოს მთავრობა კვლავ აშშ-ზეა დამოკიდებული.

“თუ ჩვენი წარმომადგენლები მოისურვებენ გამოთქვან ისეთი მზადყოფნა, როგორიც მე დღეს დავინახე რუსეთის ხელისუფლების წარმომადგენლების მხრიდან, ამას მე სიამოვნებით შევუწყობ ხელს”, – აღნიშნა ბურჯანაძემ.

“ენტევესთან” ინტერვიუში ნინო ბურჯანაძე ასევე ამბობს, რომ ქართველი ხალხის განწყობა იცვლება და თანდათან უფრო მეტი ქართველი აღარ მიიჩნევს რუსეთს მტრად.

“დემოკრატიული მოძრაობის” ლიდერი უკრაინაში არსებულ ვითარებაზე და სააკაშვილზეც საუბრობს. “ვწუხვარ უკრაინისა და უკრაინელი ხალხის გამო, ვინაიდან ვიცი სააკაშვილის და მისი რეფორმების ნამდვილი ფასი. მეორე მხრივ, მე, ისევე როგორც ბევრი საქართველოში, თავს შეურაცხყოფილად ვგრძნობ უკრაინის მთავრობისგან, რომელმაც ამ დანიშვნებით უბრალოდ სილა გააწნა საქართველოს მთავრობას და ქართველ ხალხს. სააკაშვილი ბრალდებულია საქართველოს სახელმწიფოსა და ქართველი ხალხის წინააღმდეგ ჩადენილ დანაშაულში. მსგავსი ადამიანების იმ მთავრობაში დანიშვნა, რომელსაც საქართველო მეგობრად მიიჩნევს, შეურაცხყოფა და აღმაშფოთებელია”, – ამბობს ბურჯანაძე რუსულ მედიასთან საუბრისას.

მისივე თქმით, უკრაინის მთავრობაში სააკაშვილის დანიშვნა აშშ-ის პროექტს უკავშირდება: “ეს მარტივი პროექტია, რომელიც უკრაინაში ახლა ხორციელდება. აშშ-ში კონკრეტულმა წრეებმა განახორციელეს პროექტი საქართველოში, რომლის მონაწილეებიც საააკაშვილი და მისი გუნდი იყო. ახლა იგივე გუნდი იგივე პროექტს უკრაინაში ახორციელებს,” – აცხადებს ნინო ბურჯანაძე, რომელიც “ვარდების რევოლუციის” ერთ-ერთი ლიდერი იყო, ახლა კი საქართველოში ყველაზე პრორუსულ პოლიტიკოსად ითვლება, მას შემდეგ, რაც ის 2010 წელს მოსკოვში ჩავიდა და პრეზიდენტ ვლადიმირ პუტინს შეხვდა.

2013 წლის საპრეზიდენტო არჩევნებზე ნინო ბურჯანაძემ მესამე ადგილი დაიკავა და ხმების 10.2% აიღო.

The post ნინო ბურჯანაძე: “ყირიმი უკრაინას არასოდეს არ დაუბრუნდება” appeared first on Democracy & Freedom Watch.

MFA

ეს არის 2008 წლის ოკუპაციის გაგრძელება, –  ეს იყო ხელისუფლების მხრიდან გაკეთებული განცხადებების მთავარი გზავნილი რუსეთის მიერ ოკუპირებულ ცხინვალის რეგიონში  ე.წ. საზღვრის გადმოწევასთან დაკავშირებით.

2008 წლის აგვისტოს ომის კვალდაკვალ რუსეთის მიერ სამხრეთ ოსეთის დამოუკიდებლობის აღიარებისა და იქ სამხედრო კონტინგენტის განთავსების შემდეგ, ე.წ. საზღვრის ხაზი პერიოდულად იწევა და მხოლო ერთი მიმართულებით – ცენტრალური ხელისუფლების მიერ კონტროლირებადი ტერიტორიების სიღრმეში. ამჯერად  ოკუპაციის ზოლში ტრანსკავკასიური მაგისტრალიც მოექცა, რომელსაც „ბრიტიშ პეტროლეუმი“ მართავს.

10 ივლისს ე.წ. საზღვარი საოკუპაციო რეჟიმმა ხურვალეთში კიდევ 1 კილომეტრით გადმოწია და ბრითიშ პეტროლიუმის მილამდე 50 მეტრის მოშორებით ბანერი განათავსა. ე.წ. სასაზღვრო რეჟიმის მიხედვით კი ტერიტორია ბანერიდან 100 მეტრის რადიუსის ფარგლებში სასაზღვრო ზონად მიიჩნევა. შესაბამისად, მსხვილი ნავთობსადენი ოკუპანტმა საკუთარი გავლენის სფეროში მოიქცია.

დამატებით 10 ჰექტარის რუსეთის მიერ მითვისება განსაკუთრებით მოულოდნელი სოფლის მოსახლეობისთვის იყო, ვინაიდან ჯერ კიდევ გუშინ ისინი აქ მიწას ამუშავდნენ და მარცვლეული მოჰყავდათ.

მუშაობას ისინი ახლაც განაგრძობენ. ე.წ. მესაზღვრეებმა მათ ფართობზე შესვლის უფლება მოსავლის აღებამდე მისცეს.

გაცილებით დიდი პრობლემა კი BP-ის ნავთობსადენთან დაკავშირებით არსებობს, რადგან ამ მონაკვეთის დაცვა და გაკონტროლება შეუძლებელი ხდება იმ მიზეზის გამო, რომ რუსი სამხედროები მათ მიერ დაწესებულ საზღვართან ახლოს გავლის შემთხვევაში ადამიანებს აკავებენ.

საოკუპაციო რეჟიმის მიერ ე.წ. საზღვრის აღმნიშვნელი ბანერების უკანონოდ განთავსების შესახებ საქართველოს შს და საგარეო საქმეთა სამინისტორებმა განცხადება 11 ივლისსვე გაავრცრელეს.

შსს  ადასტურებს, რომ ამ უკანონო ქმედების შედეგად, ოკუპირებულ ტერიტორიაზე მოექცა ბაქო-სუფსას ნავთობსადენის ნაწილი.

„მიმდინარე წლის 10 ივლისს, რუსეთის საოკუპაციო ძალების მიერ, გორის რაიონის სოფელ წითელუბნისა და ოკუპირებული ახალგორის რაიონის სოფელ ორჭოსანის მიმდებარე ტერიტორიაზე, თბილისი-გორის ცენტრალური ავტომაგისტრალის სიახლოვეს ე.წ. ,,საზღვრის” აღმნიშვნელი ბანერები უკანონოდ იქნა აღმართული.

„მნიშვნელოვანია, რომ ორივე ტერიტორიის სიახლოვეს ბაქო-სუფსას მილსადენის გარკვეული სეგმენტები მდებარეობს და განხორციელებული უკანონო ქმედებით სოფელ ორჭოსანის მიმდებარე ტერიტორიაზე ნავთობსადენის გარკვეული ნაწილი ოკუპირებულ ტერიტორიაზე მოექცა.

„საქართველოს შინაგან საქმეთა სამინისტრო ღრმა შეშფოთებას გამოთქვამს რუსეთის საოკუპაციო ძალების მიზანმიმართულ პროვოკაციული ქმედების გამო, რომელიც მიმართულია სიტუაციის დესტაბილიზაციისკენ და საფრთხეს უქმნის ადგილზე მშვიდობისა და სტაბილურობის უზრუნველყოფას,” – ნათქვამია შსს-ს განცხადებაში.

საგანგებო განცხადება გაავრცელა საგარეო უწყებამაც.

შერიგებისა და სამოქალაქო თანასწორობის საკითხებში სახელმწიფო მინისტრის აპარატს ოფიციალური კომენტარი არ გაუკეთებია. ჟურნალისტებთან საუბრისას კი სახელმწიფო მინისტრის მოადგილემ, ქეთევან ციხელაშვილმა თქვა, რომ ხელისუფლება რეაგირებისთვის საერთაშორისო საზოგადოებას მიმართავს.

„ქვეყნის 20% ოკუპირებულია და 2 კილომეტრით მეტს გადმოწევენ საზღვარს თუ 20 მეტრით რუსები, ეს ძალიან ცუდია, მაგრამ იმავე ხაზის გაგრძელებაა, რაც ქვეყანაში დიდი ხანია ხდება ,“ – განაცხადა  თავდაცვის მინისტრმა, თინა ხიდაშელმა. „ სწორედ ეს არის ერთ-ერთი მთავარი მიზეზი იმისა, თუ რატომაც გვინდა გავხდეთ ცივილიზებული სამყაროს ნაწილი“.

საქართველოს პრეზიდენტი გიორგი მარგველაშვილი ევროკავშირის სადამკვირვებლო მისიის ხელმძღვანელს კიასტუტის იანკაუსკასს, ასევე საქართველოს ნავთობისა და გაზის  კორპორაციის და “ბრითიშ პეტროლეუმის“ წარმომადგენლებს შეხვდა.

“საქართველოს თითოეული მოქალაქისათვის და, ბუნებრივია, ჩემთვის, მიუღებელია სუვერენულ ქართულ მიწაზე გამყოფი ზოლის ყოველი ახალი მეტრი. განსაკუთრებით მაშინ, როდესაც ასეთი გამყოფი ხაზი გადის სტრატეგიული ობიექტების მახლობლად. მაგრამ, მინდა ყველას შევახსენო, რომ ურთულეს ვითრებაში, საქართველოს ყველა ხელისუფლება ახერხებდა, პარტნიორებთან ახლო კოორდინაციის გზით, დაეძლია ეს სირთულეები და ასე იქნება მომავალშიც. ჩვენი ქვეყნის ფუნქცია, როგორც სატრანზიტო ქვეყნის, რომელსაც ჩვენ ასე ეფექტიანად ვავითარებთ, არ დაკნინდება, არამედ მომავალში კიდევ უფრო გაძლიერდება,”- განაცხადა გიორგი მარგველაშვილმა.

The post ბაქო-სუფსას ნავთობსადენის ნაწილი ოკუპაციის ზონაშია appeared first on Democracy & Freedom Watch.

რეფორმა, რომელიც პროკურატურის სრულ დეპოლიტაზიციას ვერ უზრუნველყოფს, – ასე შეაფასა ვენეციის კომისიამ, ეუთომ და ევროპელ პროკურორთა საკონსულტაციო საბჭომ იუსტიციის სამინისტროს მიერ შემუშავებული კანონპროექტი, რომლითაც პროკურატურის რეფორმაა დაანონსებული.

კანონპროექტი პარლამენტს უკვე წარედგინა და მისი განხილვა სავარაუდოდ საშემოდგომო სესიაზე მოხდება. განხილვის ზუსტი თარიღი ჯერჯერობით უცნობია.

საერთაშორისო ორგანიზაციების ერთ-ერთი მთავარი შენიშვნა იუსტიციის მინისტრისთვის საპროკურორო საბჭოს თავმჯდომარეობის უფლების მინიჭებაა.

რეფორმის არსი იმაში მდგომარეობს,  რომ პროკურატურის საერთო ხელმძღვანელობას იუსტიციის მინისტრი  საპროკურორო საბჭოს მეშვეობით განახორციელებს, მთავარი პროკურორის დანიშვნის უფლებამოსილება კი გადანაწილდება საპროკურორო საბჭოზე, მთავრობასა და პარლამენტზე.

კონსტიტუციით, პროკურატურა იუსტიციის სამინისტროს სისტემაშია და მას იუსტიციის მინისტრი ხელმძღვანელობს.  იმის გამო, რომ კონსტიტუციის შეცვლა გართულებული პროცედურაა და  მმართველ გუნდს პარლამენტში ამისთვის საჭირო რაოდენობის ხმების მოგროვება არ შეუძლია, იუსტიციის სამინისტროში, სადაც ეს პროექტი მომზადდა, ითქვა,  რომ აღნიშნული პრინციპი ამ პრობლემას მოაგვარებდა.

პროექტის თანამად, საპროკურორო საბჭოს შემადგენლობაში შევლენ იუსტიციის მინისტრი − საპროკურორო საბჭოს თავმჯდომარე; პარლამენტის 2 წევრი, რომლებსაც პარლამენტი სიითი შემადგენლობის უმრავლესობით აირჩევს. ასევე სამოქალაქო საზოგადოების მიერ წარდგენილი 2 წევრი და მათაც წარდგენილი კანდიდატებიდან პარლამენტი უმრავლესობით აირჩევს და პროკურორთა კონფერენციის მიერ არჩეული 4 წევრი.

საბჭოს ექნება უფლება, დაამტკიცოს საქართველოს მთავარი პროკურორის კანდიდატურა, წარადგინოს მთავრობისათვის მთავარი პროკურორის თანამდებობიდან გათავისუფლების წინადადება, განახორციელოს მთავარი პროკურორისა და მისი მოადგილეების წინააღმდეგ დისციპლინური სამართალწარმოება. თუმცა საბჭო საპროკურორო უფლებამოსილების განხორციელების პროცესში არ ჩაერევა.

მთავარი პროკურორის კანდიდატურას ასახელებს და საბჭოს დასამტკიცებლად წარუდგენს  იუსტიციის მინისტრი; საბჭო ხმათა 2/3-ით დაამტკიცებს და წარედგინება მთავრობას, შემდეგ კი − პარლამენტს. მთავარი პროკურორის უფლებამოსილების ვადა 6 წელია.

მთავარი პროკურორის ვადამდე გათავისუფლება მოხდება იმ შემთხვევაში, თუკი ის  სისხლის სამართლის დანაშაულს ჩაიდენს ან იქნება დისციპლინარული გადაცდომის მძიმე შემთხვევა. თუმცა, ამის შესახებ დასკვნა საგანგებოდ დანიშნულმა პროკურორმა უნდა მოამზადოს და საბჭოს  წარუდგინოს.

თუკი საბჭო 2/3-ით დაადასტურებს მთავარი პროკურორის მიერ დანაშაულის სავარაუდო ჩადენას, ის მიმართავს საქართველოს მთავრობას მთავარი პროკურორის თანამდებობიდან გადაყენების თაობაზე თანხმობის მიღების წინადადებით. თუ მთავრობა თანხმობას განაცხადებს საპროკურორო საბჭოს წინადადებაზე, ის მიმართავს პარლამენტს, რომელიც წევრთა სრული შემადგენლობის უმრავლესობით გადაწყვეტს მთავარი პროკურორის თანამდებობიდან გადაყენების საკითხს.

თუკი მთავრობა ან პარლამენტი უარს განაცხადებს პროკურორის თანამდებობიდან გადაყენებაზე, საკითხი დღის წესრიგიდან მოხსნილად ჩაითვლება.

პროკურატურა, რომელიც დღეს მთავარი საგამოძიებო ორგანოა, ძველი ხელისუფლების დროსაც და განსაკუთრებით ახლა მუდმივად კრიტიკის საგანია იმ მიზეზის გამო, რომ  პროკურატურის საქმიანობა ხშირ შემთხვევაში ისეთ კითხვება აჩენს, რაც სახელისუფლებო ინტერესზე მიუთითებს. იგივე  ყოფილი  ხელისუფლების მაღალჩინოსნების  საქმეებთან  დაკავშირებით დღემდე კითხვები არსებობს.

პროკურატურის მუშაობის სტილი კრიტიკის საგანი იყო სააკაშვილის მმართველობის დროს, მათ შორის იმ პოლიტიკური ძალის მხრიდან, რომელიც ახლა ხელისუფლებაშია. “ქართული ოცნების” წინასაარჩევნო დაპირება იყო,  რომ ამ სტრუქტურის რეფორმირება მოხდებოდა.

დღეს მოქმედი კანონმდებლობით, მთავარი პროკურორს, რომელიც ამ უწყების ხელმძღვანელია,  პრემიერ-მინისტრი ნიშნავს და ათავისუფლებს. ეს პრინციპი კი მუდმივად დავის საგანია, რადგან ითვლება, რომ ამის გამო, პროკურორი შეიძლება მმართველი ძალისა და პირადად პრემიერის ინტერესების გამტარებელი იყოს.

ხელისუფლების განცხადებით,  ეს ინიციატივა სწორედ პოლიტიკური გავლენისგან გასათავისუფლებლად შემუშავდა. თუმცა, საერთაშორისო ორგანიზაციები მიიჩნევენ, რომ ინიციატივა ამ მიზანს არ პასუხობს.

ამ რეკომენდაციების საპასუხოდ იუსტიციის მინისტრმა სამშაბათს განაცხადა, რომ წარდგენილ ინიციატივაში იუსტიციის მინისტრის როლი  შემცირდება.  კონკრეტულად რა მოდელი იქნება წარმოდგენელი, ამაზე საუბარს ის ჟურნალისტებს კვირის ბოლოს ჰპირდება.

საპარლამენტო ოპოზიცია  ამ კანონპროექტს “ფორმალურ ცვლილებას” უწოდებს და აცხადებენ, რომ “რეალურად ეს უწყება ამ ცვლილებებითაც რჩება პოლიტიზირებული”.

მთავრობის ინიციატივაზე არაერთი შენიშვნა აქვს პრეზიდენტის ადმინისტრაციასაც.

The post პროკურატურის დაწუნებული რეფორმა appeared first on Democracy & Freedom Watch.

ეროვნული ბანკის პრეზიდენტი გიორგი ქადაგიძე აცხადებს, რომ წელს საქართველოში გასულ წელთან შედარებით მილიარდი დოლარით ნაკლები შემოვა და ეკონომიკური სტაბილურობის უზრუნვესაყოფად, ისევე როგორც ლარის კურსის განსამტკიცებლად, მთავრობამ სახელმწიფო აპარატის შენახვის ხარჯი ხარჯების მნიშვნელოვნად უნდა  შეამციროს.

“მარტივად რომ ვთქვათ, ჩვენ გვაქვს უფრო დიდი, მდიდარი სახელმწიფო აპარატი და ბიუროკრატია, ვიდრე ეკონომიკას დღეს შეუძლია ეს აიტანოს… ამიტომ ჩვენი მთავარი რჩევა, რომელიც ბიუჯეტთან დაკავშირებით ეროვნული ბანკის დასკვნაშია, არის ის, რომ შემცირდეს მიმდინარე და ბიუროკრატიის აპარატის შენახვის ხარჯები”, – განაცხადა ქადაგიძემ ჟურნალისტებს ეროვნული ბანკის მიერ ბიუჯეტის კორექტირებულ ვარიანტთან დაკავშირებით მომზადებულ დასკვნაზე კომენტირებისას.

მისი თქმით, მთავრობის მიერ დაგმილი ცვლილებები ბიუჯეტში საკმარისი არ არის და არ ასახავს იმ გამოწვევებს და რეალობას, რომელიც ქვეყანაშია.

ბოლო თვეების განმავლობაში, რაც ლარის კურსმა ვარდნა დაიწყო, ეროვნული ბანკის პრეზიდენტი  მთავრობას მუდმივად ხარჯების შემცირებისკენ მოუწოდებდა. ცოტა ხნის წინ, როდესაც პარლამენტში განსახილველად  მიმდინარე წლის სეკვესტრირებული ბიუჯეტის პროექტი შევიდა, მაშინ  ეროვნულმა ბანკმა წერილობით გაგზავნა რეკომენდაციები, სადაც ხარჯების შემცირების აუცილებლობაზე იყო საუბარი.

რეკომენდაციებში საუბარია იმაზე, რომ მოსახლეობის სოციალური მდგომარეობის სტაბილურობისთვის გაცვლითი კურსის სტაბილიურობაა საჭირო, რისთვისაც უნდა მოხდეს ხარჯების შემცირება.

The post ეროვნული ბანკი მთავრობას ხარჯების შემცირებისკენ მოუწოდებს appeared first on Democracy & Freedom Watch.

ზურაბ აბაშიძე არ აკონკრეტებს იყო თუ არა შეხვედრაზე საუბარი აფხაზეთთან რკინიგზის აღდგენის შესახებ (IPN)

საქართველოს მთავრობა  აცხადებს, რომ რუსეთი საქართველოს მოქალაქეებისთვის  სავიზო რეჟიმის შემსუბუქების დაპირებას იძლევა. თუმცა, დეტალები  ჯერჯერობით უცნობია.

ამის შესახებ  მთავრობის ოფიციალურ განცადებაშია ნათქვამი, რომელიც პრაღაში გამართული აბაშიძე-კარასინის შეხვედრის შემდეგ გაავრცელეს.

„რუსეთის მხარემ დაადასტურა, რომ პრაქტიკულ ჭრილში განიხილება საკითხი საქართველოს მოქალაქეებისთვის სავიზო რეჟიმის გარკვეული შემსუბუქების შესახებ, რის თაობაზეც მომავალში დეტალურად ეცნობება ქართულ მხარეს,“ – ნათქვამია განცხადებაში.

თუმცა, ამ საკითხის დეტალები ჯერჯერობით ისევ უცნობია. აბაშიძეს ამ თემაზე საუბარი არ სურს. მთავრობაში კი აცხადებენ, რომ დეტალები საზოგადოებისთვის მაშინ გახდება ცნობილი, როდესაც გადაწყვეტილებები იქნება მიღებული.

მოლაპარაკების ეს ფორმატი თავდაპირველად მხოლოდ სავაჭრო საკითხებთან დაკავშირებით შეიქმნა, მაგრამ ნელ-ნელა ფართოვდება, რაც პოლიტიკური ოპოზიციის გაღიზიანებას იწვევს.

ოთხშაბათს გამართულ შეხვედრაზე, პრემიერის პირადი წარმომადგენლის ზურაბ აბაშიძეთან ერთად, საქართველოდან იმყოფებოდნენ ასევე საგარეო საქმეთა სამინისტროს მეზობელ ქვეყნებთან და რეგიონებთან ურთიერთობის დეპარტამენტის დირექტორის მოადგილე ირაკლი კვანჭახაძე და ეკონომიკისა და მდგრადი განვითარების სამინისტროს სახმელეთო ტრანსპორტის სააგენტოს დირექტორი მიხეილ ხმალაძე.

ამიტომ იყო ვარაუდი, რომ შეხვედრაზე საუბარი იქნებოდა აფხაზეთთან რკინიგზის გახსნის საკითხზეც. თუმცა, ხელისუფლება ამ საკითხის განხილვას უარყოფს.

მთავრობის განცხადებაში ისიც არის ნათქვამი, რომ „ შეხვედრაზე ხაზი გაესვა ჟენევის საერთაშორისო დისკუსიების მნიშვნელობას, როგორც აფხაზეთსა და ცხინვალის რეგიონში კონფლიქტების მოგვარების ერთადერთ ფორმატს“.

განხილულ საკითხებში კი ნახსენებია „პრაღის ფორმატის დღის წესრიგით გათვალისწინებული სავაჭრო-ეკონომიკური, სატრანსპორტო და ჰუმანიტარული ხასიათის საკითხები“. ასევე ნათქვამია, რომ საუბარი შეეხო სავაჭრო-ეკონომიკური ურთიერთობების დინამიკას.

„აღინიშნა, რომ 2014 წლის ანალოგიურ პერიოდთან შედარებით ორ ქვეყანას შორის სავაჭრო ბრუნვა წელს შემცირდა 8,9%-ით. 2014 წელს ქართულმა კომპანიებმა რუსეთში გაიტანეს 275 მლნ აშშ დოლარის ღირებულების სხვადასხვა სახის პროდუქცია. მიმდინარე წლის პირველ ნახევარში ეს რიცხვი შეადგენს 65,8 მლნ აშშ დოლარს,“ – ნათქვამია განცხადებაში.

ამასთან, ხაზგასმულია, რომ „მნიშვნელოვნად გაიზარდა საავიაციო მიმოსვლის მოცულობა, შემცირდა ავიაბილეთების ღირებულება, რაც ხელს უწყობს საქართველოში რუსი ტურისტების რაოდენობის ზრდას. 2014 წლის ანალოგიურ პერიოდთან შედარებით ეს მაჩვენებელი გაიზარდა 14,6 %-ით“.

განხილულ იქნა ასევე ზოგიერთი ახალი სახეობის ქართული პროდუქციის რუსულ ბაზარზე დაშვების საკითხი. თუმცა, არ კონკრეტდება, რა პროდუქციაზეა საუბარი.

ქართული მხარე აცხადებს, რომ  აბაშიძე-კარასინის შევედრების ფორმატი კონკეტულად ვაჭრობას ეხება და არ ცდილობს ქართული მხარე ამ ფორმატის გაფართოებას. თუმცა, ამ განცხადებაში  ე.წ. ჰუმანიტარულ საკითებზეც არის საუბარი. მათ შორის ვიზების გამარტივებაზე.

რუსეთმა ქართულ მხარესთან სავიზო რეჟიმი პირველად 2006 წელს გაამკაცრა, როდესაც ქართულ მხარეს ემბარგო დაუწესა და ასევე  რუსეთში მცხოვრებ ქართველებს პორბლემები შეუქმნა და მცირე ნაწილის დეპორტაცია არაადამიანური პიობებით მოახდინა, რაზეც სტრასბურგში სასამართლო დავა მიმდინარეობს.

2008 წლის აგვისტოს ომის შემდეგ კი რუსეთთან გაწყდა დიპლომატიური ურთიერთობა და უფრო მეტად გართლდა ქართველებისთვის რუსეთში წასვლის  პროცედურები და ეს არ შეცვლილა დღემდე მიუხედავად იმისა, რომ მოქმედი ხელისუფლება რუსეთთან ურთიერთობის დათბობას ცდილობს. ამასთან, ქართულ მხარეს რუსეთთან ცალმხრივად აქვს უვიზო  რეჟიმი დაწესებული.

The post მთავრობა: რუსეთი საქართველოს სავიზო რეჟიმის შემსუბუქების ჰპირდება appeared first on Democracy & Freedom Watch.

შსს ოკუპირებული ცინვალის გადამოწეულ საზღვართან მოქალაქეებს არ უშვებს (MFA)

მას შემდეგ, რაც ქართველმა ჟურნალისტებმა რუსეთის მიერ ოკუპიებული საზღვრის კიდევ უფრო მეტად გადმოწევა გააპროტესტეს, ბანერი ჩამოხსნეს და მის ადგილას ქართული დროშა დაამაგრეს, რასაც  ოფიციალური რუსეთის საყვედური და დროშის ჩამოხსნა მოჰყვა,  საქართველოს შსს-მ ამ ტერიტორიაზე რიგითი მოქალაქეების მიახლოება აკრძალა.

ამის შესახებ გადაწყვეტილება პარასკევს, საზღვრის გადმოწევიდან ზუსტად ერთ კვირაში იქნა მიღებული.

საზღვრის გადმოწევა ქართლმა მხარემ  დიპლომატიურ დონეზე გააპროტესტა და საერთაშორისო საზოგადოების მხრიდანაც გაკეთდა განცხადება, რომ რუსეთი არღვევს  შეთანხმებას.

ამის პარალელურად კი შსს-მ  გადმოწეულ საზღვართან შეზღუდვები დააწესა.

როგორც შინაგან საქმეთა სამინისტროს ანალიტიკური დეპარტამენტის ხელმძღვანელმა, შალვა ენუქიძემ განაცხადა, ეს შეზღუდვა ჟურნალისტებსაც ეხება. შეზღუდვის მიზეზად შინაგან საქმეთა სამინისტრო პროვოკაციის თავიდან აცილებას ასახელებს.

“საფრთხე ორივე მხრიდან არსებობს. ანდრო ბარნოვის გუშინდელი ქმედება არ იყო მიზნობრივად გამართლებული, რადგან ასეთმა ფაქტებმა, შესაძლოა, მეორე მხრიდან პროვოკაცია გამოიწვიოს და დაპირისპირება მოხდეს,“ – განაცხადა შალვა ენუქიძემ.

იურისტი ლევან ალაფიშვილი DfWatch-თან საუბრისას განმარტავს, რომ ამ გადაწყვეტილების პოლიტიკური მნიშვნელობა რომ გამოვრიცხოთ,  იურიდიული თვალსაზრისით ეს შეზღუდვა უკანონოა.

მისი განმარტებით, ჟურნალისტებისთვის, ისევე როგორც ნებისმიერი სხვა მოქალაქისთვის, გადაადგილებისა და ინფორმაციის მოპოვება-გავრცელების კონსტიტუციური უფლების შეზღუდვას უნდა ჰქონდეს ლეგიტიმური საფუძველი და დაცული უნდა იყოს კონსტიტუციური პროცედურები. ანუ, იმ ტერიტორიაზე გამოცხადებული უნდა იყოს და მოქმედებდეს საგანგებო ან საომარი მდგომარეობა და გამოცემული იყოს პრეზიდენტის დეკრეტი აღნიშნული უფლებების შეზღუდვის შესახებ, რომელსაც ასევე  პარლამენტის დამტკიცება სჭიდება.

„ეს ყველაფერი კონსტიტუციით არის გარანტირებული და  შსს-ს ეს გადაწყვეტილება იმას ნიშნავს, რომ კონსტიტუციის საწინააღმდეგოდ არის მიღებული.  ამიტომ ეს ვერც პოლიტიკური თვალსაზრისით ვერ იქნება გამართლებული,“ – ამბობს ლევან ალაფიშვილი.

The post შსს ოკუპირებული ცინვალის გადამოწეულ საზღვართან მოქალაქეებს არ უშვებს appeared first on Democracy & Freedom Watch.

იუსტიციის სამინისტრომ  “პროკურატურის შესახებ” კანონში ცვლილებების საბოლოო რედაქცია  ორშაბათს  გამოაქვეყნა, მას შემდეგ, რაც წინა კვირას პროკურატურის რეფორმასთან დაკავშირებით იუსტიციის სამინისტროს მიერ შემუშავებული პროექტი ვენეციის კომისიამ, ეუთომ და ევროპელ პროკურორთა საკონსულტაციო საბჭომ ფაქტობრივად დაიწუნა და თქვა, რომ  ეს არის „რეფორმა, რომელიც პროკურატურის სრულ დეპოლიტაზიციას ვერ უზრუნველყოფს“.

სწორედ ამ ხარვეზის გამოსასწორებლად იუსტიციის სამინისტრომ პროექტი გადაამუშავა, მაგრამ ძირითადი მოთხოვნები გათვალისწინებული კვლავ არ არის.

იუსტიციის მინისტრის მოადგილემ, სანდრო ბარამიძემ გუშინ „მოამბეში“ განაცხადა, რომ ვენეციის კომისიის დასკვნა პროკურატურის რეფორმის წარმოდგენილ მოდელზე არის „მთლიანობაში პოზიტიური.“

„დასკვნა იწყება იმ სიტყვებით, რომ ეს არის რეფორმა, რომელიც დგას სწორ გზაზე. ახლა ამაზე მეტი რა შეიძლება ითქვას?“ განაცხადა ბარამიძემ.

გადამუშავებული ვარიანტის თანახმად, 15-კაციან საპროკურორო საბჭოში იქნებიან პროკურორები, იუსტიციის უმაღლესი საბჭოს 2 მოსამართლე, აკადემიური წრეებიდან და არასამთავრობო სექტორიდან თითო ადამიანი, ერთი დეპუტატი უმრავლესობიდან და ერთი ისეთი დეპუტატი, რომელიც უმრავლესობაში არ შედის. საპროკურორო საბჭოს იუსტიციის მინისტრი უხელმძღვანელებს.

თეა წულუკიანის ინიციატივით, საპროკურორო საბჭოში სახალხო დამცველიც უნდა შესულიყო. თუმცა, უჩა ნანუაშვილმა უარი თქვა  იმ არგუმენტით, რომ მისი ოფისი ამ უწყებაში ჩართვით ნეიტრალურობას ვერ შეინარჩუნებს.

გადამუშავებულ პროექტში ისევ სადავო საკითხად რჩება მთავარი პროკურორის დანიშვნის წესი.

ოპოზიცია ითხოვს, მთავარი პროკურორის წარდგინება პრეზიდენტის პრეროგატივა იყოს. ამ უფლების მინიჭებას ითხოვს თავად პრეზიდენტიც. თუმცა, მმართველი გუნდი ამ შენიშვნას არ იღებს.

პრეზიდენტის ადმინისტრაციის განცხადებით, პრეზიდენტის ვალდებულებაა პროცესში ჩართვა და  პრეზიდენტი  მხარს უჭერს პროექტს, რომელიც იყო „ქართული ოცნების“ სამთავრობო პროგრამაში.

„დეპოლიტიზაცია ვერ მოხდება, თუკი მთავარი პროკურორის დასახელება, შემდეგ არჩევა და გადაყენება კვლავ იქნება ერთი და იგივე პოლიტიკური ჯგუფის ხელში. სწორედ ამიტომ ჩვენ უპირატესობას ვანიჭებდით იმ მოდელს, რაც არსებობდა სამთავრობო პროგრამაში,“ – აცხადებს პრეზიდენტის მრჩეველი კახა კოჟორიძე.

ზუსტად იგივე არგუმენტი აქვთ ოპოზიციის წარმომადგნელებსაც.

„არავითარი დეპოლიტიზება არ ხდება და პროკურატურა ისევ იქნება იარაღი მმართველი პოლიტიკური პარტიის ხელში. ველოდებით „ნაციონალური მოძრაობის“ შეხმიანებასაც. თუ ისინი მზად იქნებიან, რომ მხარი დაუჭირონ ჩვენს მიერ შეთავაზებულ პროექტს, მაშინ „ქართულ ოცნებაზეა“ დამოკიდებული, რომ მიიღონ ნორმალური რეფორმა,“ – აცხადებს  საპარლამენტო ოპოზიციური პარტიის, „თავისუფალი დემოკრატების“ წარმომადგენელი,    ნინო გოგუაძე.

პროკურატურის შესახებ კანონპროეტში ცვლილებებს პარლამენტი, სავარაუდოდ, მომავალ კვირაში, რიგგარეშე სესიაზე  განიხილავს.

The post ოპოზიცია შიშობს, რომ პროკურატურა რეფორმის შემდეგაც პოლიტიზირებული იქნება appeared first on Democracy & Freedom Watch.

ჯაჭვლიანი ოლიმპიური სოფელს სტუმრობს (Facebook)

„ქართული ოცნების“ მმართველი გუნდის წარმომადგენელი პარლამენტში, რომელიც მსოფლიო და ევროპის ჩემპიონია მკლავჭიდში, ოთხშაბათს მთელი ქვეყნის ყურადღების ცენტრში მოექცა პარლამენტის ტრიბუნიდან გაკეთებული კურიოზული განცხადების გამო.

სოსო ჯაჭვლიანმა, რომელიც გარდა იმისა, რომ საკმაოდ დამსახურებული სპორტსმენია, ასევე პოპულარული მსახიობი გახლავთ, პარლამენტის ტრიბუნიდან საკმაოდ ბუნდოვანი განცხადება გააკეთა, რომლის შინაარსი საზოგადოებამ ისე გაიგო, თითქოს მას ერთმანეთში აერია ევროპის რეკონსტრუქციისა და განვითარების ბანკი, EBRD, გინდათ „იბიარდი“, და… საროსკიპო.

მან ოპოზიციას უსაყვედურა, თითქოს მისი ოჯახის დანგრევა უნდოდათ,  რადგან თქვეს, რომ ჯაჭვლიანი „იბიარდის“ ფორუმზე იმყოფებოდა.

EBRD-ის ფორუმი თბილისში მაისში გაიმართა, ამას დაემთხვა პარლამენტის სესია, სადაც კვორუმი არ შედგა. ამის გამო ბევრ დეპუტატს საპარლამენტო სესიაზე გაცდენები საპატიოდ ჩაეთვალა.

მაშინ ეკა ხერხეულიძემ „ნაციონალური მოძრაობიდან“ უმრავლესობის წევრები სესიაზე გამოუცხადებლობის გამო გააკრიტიკა და სარკასტულად დასძინა, „რა, ბატონი ჯაჭვლიანი ახლა „იბიარდის“ კონეფერციაზე სიტყვით გამოდის“ და იმიტომ არ იყო სესიაზეო?

ეს განცხადება 9 მაისს გაკეთდა, მაგრამ პარლამენტის ტრიბუნიდან სოსო ჯაჭვლიანის რეაგირება ოთხშაბათს მოჰყვა. თუმცა, როგორც ჩანს, მას ევროპის რეკონსტრუქციისა და განვითარების ბანკის აბრევიატურის შინაარსი არასწორად ჰქონდა გაგებული.

მან პარლამენტის სესიაზე ეკა ხერხეულიძის განცხადება გაიხსენა და ოპოზიციონერი დეპუტატი მისი ოჯახის  დანგრევის მცდელობაში დაადანაშაულა.

„ქალბატონ ეკა ხერხეულიძეს ჩემი ოჯახის დანგრევის მცდელობა ჰქონდა. მან ბრძანა ამ რამდენიმე თვის წინ, რომ პარლამენტის სესია იმიტომ ჩაიშალა და კვორუმი იმიტომ არ შედგა, სოსო ჯაჭვლიანი იბიარდზე იყოო. რატომ მაყენებთ შეურაცხყოფას, ქალბატონო ეკა? მე იბიარდზე ვერასოდეს ვერ ვიქნები, მე ერთგული მეუღლე ვარ. თქვენი გუნდი დადიოდა ამ იბიარდზე 10 წლის განმავლობაში,“ – განაცხადა სოსო ჯაჭვლიანმა.

ამას კურიოზულ განცხადებას წინ უძღვოდა კიდევ უფრო უხერხული სიტყვები.

„მე ბოზებში არასოდეს არ დავდიოდი, არც მაშინ და არც ახლა. ჩემთვის შეურაცხმყოფელი იყო 10 მანეთის გადახდა. 10 მანეთის გარეშეც ვახერხებდი ამ საკითხებს. ისე, ცნობისთვის, თუ ვინმე ლამაზი ქალბატონი იყო საბჭოთა კინოში, ყველასთან ვარ „ნამუშევარი“ 10 მანეთის გარეშე,“ განაცხადა სოსო ჯაჭვლიანმა.

პარლამენტის ვიცე-სპიკერმა „ქართული ოცნებიდან“, მანან კობახიძემ, რომელიც ამ სხდომას უძღვებოდა, რამდენჯერმე სცადა თანაპარტიელისთვის სიტყვა გაეწყვეტინებინა, მაგრამ ვერ მოახერხა.

„მე ბოდიშს ვუხდი საზოგადოებას, ამომრჩევლებს, ჩვენს მომხრეებს თუ მოწინააღმდეგეებს, განსაკუთრებით ყველა ქალს, ვინც დარბაზში იჯდა ან ეთერში გვისმენდა… იმ უხამსი შინაარსის გამონათქვამებისთვის, რაც ბატონი სოსო ჯაჭვლიანის განცხადებაში იყო და, ჩემი აზრით, ყოველგვარი იუმორის, ხუმრობის ფარგლებს ცდება,“ დაწერა სხდომის შემდეგ მანანა კობახიძემ თავის ფეისბუქში.

„ვწუხვარ, რომ მე, როგორც სხდომის წამყვანმა, ვერ შევძელი მისი შეჩერება… დღეს მე პირადად შემრცხვა ჩემი კოლეგის გამო და არ მრცხვენია ამის აღიარების!“ წერს მანანა კობახიძე.

სოსო ჯაჭვლიანი მმართველი კოალიციის წარმომადგენელია და ის  პარლამენტის წევრია 2012 წლიდან. ის 57 წლისაა, არის მსოფლიოს და ევროპის ჩემპიონი მკლავჭიდში.  აქვს უმაღლესი განათლება.  დამთავრებული აქვს საქართველოს ფიზკულტურის ინსტიტუტი. არის შოთა რუსთაველის სახელობის თეატრალური უნივერსიტეტის რეჟისორი, საერთაშორისო კინოფესტივალების ჯილდოების მფლობელი, კინოსტუდია „ქართული ფილმის“ სამეთვალყურეო საბჭოს თავმჯდომარე, საქართველოს მკლავჭიდის ფედერაციის პრეზიდენტი.

The post უხერხული კურიოზი პარლამენტში – დეპუტატს საერთაშორისო ბანკი საროსკიპოში აერია? appeared first on Democracy & Freedom Watch.

ინტერპოლი წითელი ცირკულარით თავდაცვის ყოფილი მინისტრის, დავით კეზერაშვილის ძებნას წყვეტს. ყოფილი პრეზიდენტის და ოდესის დღევანდელი გუბერნატორის, მიხეილ  სააკაშვილის ძებნაზე კი უარს ამბობს.  

ამის შესახებ პარასკევს ინფორმაცია კეზერაშვილის ადვოკატმა, შოთა მინდელმა გაავრცელა და თქვა, რომ ასეთი შინაარსის შეტყობინება ინტერპოლიდან მიიღო.

ამ დროისთვის კეზერაშვილი ინტერპოლის ძებნილთა სიიდან უკვე ამოღებულია.

როგორც კეზერაშვილის ადვოკატი განმარტავს, ინტერპოლის ამ გადაწყვეტილების მიზეზი ამჯერადაც ის გახდა, რომ საქმეში პოლიტიკური მოტივი იკვეთება.

დაახლოებით ორი თვის წინ  ინტერპოლმა წითელი ცირკულარით ძებნილთა სიიდან საქართველოს იუსტიციის  ყოფილი მინისტრი, ზურაბ ადეიშვილი ამოიღო. მიზეზად მაშინაც საქმეში არსებული შესაძლო პოლიტიკური მოტივი დასახელდა.

ამ ინფორმაციის გავრცელებიდან ცოტა ხანში სააკაშვილის ადვოკატმა, ოთო კახიძემ ფეისბუკის საკუთარ გვერდზე დაპოსტა, რომ საქართველოს ხელისუფლებამ  ინტერპოლს სააკაშვილის წითელი ცირკულარით მოძებნა მოსთხოვა, რაზე უარი მიიღო.

დღის ბოლოს ამ ამბავს პრემიერ-მინისტრი ირაკლი ღარიბაშვილი გამოეხმაურა და თქვა, რომ ინტერპოლის ეს გადაწყვეტილება  ამ ორგანიზაციის „მეთოდოლოგიის შეცვლამ“ განაპირობა.

“იანუკოვიჩს მოეხსნა ძებნა, ის ამოიღეს ინტერპოლის ძებნილთა სიიდან. ადრე უკვე ითქვა, რომ ინტერპოლში გარკვეული მეთოდოლოგია შეიცვალა და ამით არის ეს ყველაფერი განპირობებული.  ამიტომ ვერაფრით გაგახარებთ,” – აცხადებს ირაკლი ღარიბაშვილი.

საგანგებო განცხადება გაავრცელა მთავარმა პროკურატურამაც, სადაც ნათქვამია, რომ  „ინტერპოლის გენერალურმა სამდივნომ გადაწყვეტილება მიიღო ისე, რომ ქართულ მხარეს არ მისცემია შესაძლებლობა წარედგინა საკუთარი არგუმენტები დავით კეზერაშვილის საჩივარში მითითებულ გარემოებებთან დაკავშირებით.“

პროკურატურის განცხადებაში იგივე არგუმენტია დასახელებული სააკაშვილთან დაკავშირებითაც.

„მსგავსად დავით კეზერაშვილის შემთხვევისა, საქართველოს პროკურატურამ ინტერპოლის გენერალურ სამდივნოს რამდენჯერმე  მიაწოდა შესაბამისი ინფორმაცია და მასალები მიხეილ სააკაშვილის მიმართ საერთაშორისო ძებნის გამოცხადებასთან დაკავშირებით, ვინაიდან ამ უკანასკნელმა აგრეთვე საჩივრით მიმართა ინტერპოლს და მოითხოვა არ დაკმაყოფილებულიყო ქართული მხარის თხოვნა,” – ნათქვამია  განცხადებაში.

აქვე ისიც არის აღნიშნული, რომ  საქართველოს მთავარი პროკურატურა გეგმავს მიმართოს ინტერპოლის შესაბამის დანაყოფს და არსებულ მტკიცებულებებზე დაყრდნობით მოითხოვოს სააკაშვილის მიმართ საერთაშორისო ძებნის გამოცხადება, ხოლო კეზერაშვილის მიმართ საერთაშორისო ძებნის აღდგენა.

კეზერაშვილი საქართველოში რამდენიმე სისხლის სამართლის საქმეზეა ბარლდებული.

2013 წლის ოქტომბერში ის საფრანგეთში დააკავეს. თუმცა, რამდენიმე თვეში გაათავისუფლეს და ქართულ მხარეს მის ექსტრადიციაზე უარი იმ არგუმენტით უთხრეს, რომ შესაძლოა, საქმეში პოლიტიკურ მოტივებს ჰქონოდა ადგილი.

რაც შეეხება სააკაშვილს, მის წინააღმდეგ საქმე მას შემდეგ აღიძრა, რაც პრეზიდენტობის ვადა ამოეწურა და საქართველო დატოვა. სააკაშვილს ბრალდება წარდენილი აქვს სისხლის სამართლის ოთხ საქმეზე: პირადი მიზნებით დიდი ოდენობით საბიუჯეტო თანხების გაფლანგვა; გირგვლიანის საქმე, რომელიც სააკაშვილის მმართველოის დროინდელ ერთ-ერთ  ყველაზე გახმაურებულ საქმეს წარმოადგენს, როდესაც მაშინდელ შს მინისტრ ვანო მერაბიშვილთან დაახლოებულმა პირებმა, რომლებიც ასევე შსს-ს მაღალჩინოსნები იყვნენ, პირადი დაპირისპირებისას ახალგაზრდა კაცი მოკლეს.  2007 წლის 7 ნოემბერს მომიტინგეთა მასობრივად დარბევა, ჯარის უკანონოდ გამოყვანა, ტელეკომპანია “იმედში” შეჭრისა და  ამ ტელეკომპანიის მფლობელი ბადრი პატარკაციშვილის კუთვნილი ქონების დანაშაულებრივად ხელში ჩაგდება; საქართველოს პარლამენტარ ვალერი გელაშვილზე შეიარაღებული თავდასხმა.

ცოტა ხნის წინ ინტერპოლმა წითელი ცირკულარით ძებნილთა სიიდან იუსტიციის ყოფილი მინისტრი, ზურაბ ადეიშვილიც ამოიღო.

The post ინტერპოლი სააკაშვილის ძებნაზე უარს ამბობს, კეზერაშვილის წითელი ცირკულარით ძებნას წყვეტს appeared first on Democracy & Freedom Watch.